Read Thado Chin John 17 Bible Online

John 17 - Thado Chin bible

John 17

¹Jesu'n thu hiche chu aseijin, van lam ave, Pa, phat chu ahung lhungtai; Na Chapan jong nangma nachoi-at theina dingin, na chapa choi-anin;

²Nangman ama napeh ho jouse chu, aboncha aman tonsot hinna apeh dinga, nangman ama chu mi jouse chunga thuneina napeh ahi.

³Pathen tahbeh khatseh nangma, chule nangman nasol Jesu Khrista ahetdoh dingu hi, tonsot hinna ahi.

⁴Nangman bol dinga thil neipeh chu kajouvin, leiset chungah nangma kachoi-an tai.

⁵Chule tun, Pa, vannoi um masanga nangma toh kaneikhom loupina-a chun, nangma tahtoh kigomin neichoi-anin.

⁶Nangman vannoi'a kona neipeh miho jah-a namin kaphon ahitai; amaho nanga ahiuvin, nangin amaho chu keima neipeh ahi; chule amahon nathu anit taove.

⁷Tun amahon nangman keima neipeh thil chengse hi nanga kon ahi ahetauve.

⁸Ijeh-inem itile nangman keima neipeh thuho chu keiman amaho kapen; chule amahon hitiho chu asangun, chule keima nanga kona hung kahi kichenin aheuvin, chule nangma sol kahi atahsan taove.

⁹Amaho dinga katao ahi. Vannoi dinga katao ahipoi, ahin nangman keima neipeh ho dinga bou katao ahi, ijeh-inem itile amaho nanga ahiuve.

¹⁰Chule keija jouse chu nanga ahin, nanga chu keija ahi; chule amaho-a hin choi-atnin kaume.

¹¹Chule tu-a hi keima vannoi'a hi umlouva kahitai, amaho vanghi vannoi'a aumna laijuve, chule keima nahenga hung kahitai. Ka Pa Theng, eini pumkhat ihi banga, amaho jong pumkhat ahi theina dingun, nangman neipeh chengse hi, naminin hongin.

¹² Keima amahotoh vannoi'a kaum lai chun, namina amaho chu kanahon ahi; nangman neipeh chengse chu kahong bitnin, khatcha jong amangthah aumpoi; Pathen lekhabua thu guilhunan, mangthah chapa bouchu amangthah tai.

¹³Tu vangin nahenga hung kahitai; chule kakipana amahon aneikim nadinguva, vannoi'a hiche thuhi kasei ahi.

¹⁴Keiman nathu amaho kapetai; chule keima vannoi'a kahilou banga amaho jong vannoi'a ahilou jeh-un, vannoi miten ahotauve.

¹⁵Nangman amaho hi vannoi'a konin ladoh-in tia katao ahipoi, agilouva kona nahuhdoh nadinga katao joh ahibouve.

¹⁶Keima vannoi'a kahilou bangin, amaho jong vannoi'a ahipouve.

¹⁷Na Thutah chun amaho hi suthengin; nangma thu chu thutah ahi.

¹⁸Nangman keima vannoi'a neisol banga, keiman jong amaho hi vannoi'a kasol ahi.

¹⁹Chule amaho hi thutah-a suhthenga aum theina dinguva, amaho jala keima kakisuhtheng ahi.

²⁰Hitiho chang jeng dinga tao kahipoi, amaho thua kona keima eihin tahsan ding ho jouse dinga jong katao ahi;

²¹Pa, keima nangma sol kahi hi vannoi miten atahsan theina dinguva; nangma keija na-uma, keima nanga kaum banga hi, amaho jong eini-a aum theina dinga katao ahi.

²²Chule eini pumkhat ihi banga, amaho jong pumkhat ahi nadingun; nangman keima neipeh loupina chu, keiman amaho kapetai.

²³Amaho chamkimtah-a pumkhat ahina dinguva, Keima amaho-a kauma, chule nangma keima-a na-uma; chule keima hi nangman neisola, keima nei nangailut banga amaho jong nangailut ahi ti vannoi'in ahetna dinga katao ahi.

²⁴Pa, nangman neipeh loupina chu, nangin neipehho hin amu theina dingun, keima umna-a chun kakoma amaho jong umleu kati ahi; ijeh inem itile vannoi bul kiphudoh masanga nangman neingailut ahitai.

²⁵Vo ka Pa chondihtah, vannoi miten nangma nahepouvin, kei vangin nangma kahen; chule nangman keima neisol hi, hiteho hin ahetauve.

²⁶Nangman kei neingailutna ngailut chu amaho-a auma, chule keima jong amaho-a kaumna dinga; namin amaho hi kahetsah ahitan, chule kahetsah kit jing ding ahi, ati.