Read Thado Chin John 18 Bible Online

John 18 - Thado Chin bible

John 18

¹Jesu'n thu hicheng chu asei jouvin, aseijuiho toh apotdoh-in, Kidron vadung gal lama hon umna-a chun agalkaijun, chuin hon sunga chun amale aseijuiho alut taove.

²Ama matsah-a pang Judas jong chun hiche kom mun chu ahet ahi; ijeh-inem itile Jesu'n aseijuite apuijia hikoma chu tamtah vei chejiuva ahi.

³Chutah-in Judas'in sepaihon chule thempu pipuiho leh Pharisai ho-a kona sottolleho aloijin, meivah, meisel, chule hem manchah athouvin, hiche kom mun chu alhung taove.

⁴Hichun achunga ipi ahung so ding Jesu'n abonchan ahen, apotdoh-in, amaho jah-a chun, Koi naholu ham? tin agadongin ahi.

⁵Amahon adonbutnun, Nazareth Jesu atiuve. Jesu'n ajah uva, Keima hi kahi, ati. Ama matsah-a pang Judas jong chu amaho lah-a chu dinga ahi.

⁶Hitia chu aman ajah uva, Keima hi kahi, ati chun, amaho anung chonun tolah alhu jengun ahi.

⁷Chuin aman adong kitleuvin, Nanghon koi naholu ham? ati. Amahon, Nazareth Jesu, atiuve.

⁸Jesu'n adonbutnin, Keima hi kahi, tia najah uva kaseitah chula em; hijeh chun keima neiholu ahile hiteho hi chesah-un, ati.

⁹Nangman keima neipeh chengse khatcha jong kamansahpoi, tia asei chu guilhuna dinga chutia ahi.

¹⁰Hichun Simon Peter'in chemjam khat anei ahin, asatdoh-in, thempu chungnung sohpa asatnin ahile, ajetlam bilkol asatlhan ahi. Sohpa min chu Malchus ahi.

¹¹ Chuin Jesu'n Peter jah-a, Chemjam chu apaija khumin. Pan eipeh khona chu kadon lou dingham? ati.

¹²Chuin sepaihon le apipuipau toh chule Judah ho sottollehon Jesu amanun akanun,

¹³Anna henga apui masaove; ijeh-inem itile chuche kum-a thempu chungnunga pang Caiaphas nupapa ahi.

¹⁴ Miho jouse dinga mi khat athi aphajoi, tia Judah ho thumop chu hiche Caiaphas hi ahi.

¹⁵Chuin Simon Peter'in Jesu nung ajuijin, chutobang chun aseijui dang khatnin jong ajuije. Chuche seijui chu thempu chungnung chutoh kihe-a ahin, Jesu toh thakhatnin thempu chungnung inpi tolah alut lhontan ahi.

¹⁶Peter vang chu kotpo lama adingin ahi. Chuin thempu chungnung toh kihe-a seijui chu ahung potnin, kot ngahnu jah-a chun aseijin, Peter chu asungah apuilut tai.

¹⁷Hichun hiche kot ngah nungahnu chun Peter jah-a, Nang jong hichepa seijui ho lah-a khat nahi hilouham? atile aman, Kahipoi, atitai.

¹⁸Chule hiche koma chu soh ho le sottolleho chu dinguva, adap jeh-a meihol akitiuva, kisang lumu ahi; Chuin Peter jong amaho to adingin, mei chu a-oijin ahi.

¹⁹Hichun thempu chungnung chun Jesu chu aseijuiho le athuhil thudol adongtan ahi.

²⁰Jesu'n ama adonbutnin, Keiman vannoi mite anga phongtah-a kasei anahitan; keiman Judah ho kikhop khomji namun kikhopna inho le houin'a jenga jong kanahil jingpeh ahi; guhthima kasei aumpoi.

²¹Ibola keima neidoh ham? Ajah uva ipi kasei aja-a amaho chu dongtan; ven, ipi thu kasei amahon ahenauve, ati.

²²Aman thu hicheng chu aseijouvin, akoma ding sottolleho lah-a khatnin Jesu chu akhutphanga angeiphe abengin, Thempu chungnung hitia chu kidonbut ngaijem? ati.

²³Jesu'n ama chu adonbutnin, Thu gilou kasei ahile, kathusei gilou aphotchenna neihetsah-in; thupha kasei ahile, ibola neiden ham? ati.

²⁴Chuin Annan ama chu akikan pumin Caiaphas thempu chungnung hengah asoltai.

²⁵Hichea chu Simon Peter'in dinmuna mei a-oi ahin; chuin amahon, Nangma jong aseijuiho lah-a khat nahim? tin adongun ahile, ama akilepmin, Kahipoi, ati.

²⁶Thempu chungnung soh ho lah-a mikhat, Peter'in abilkol asatlhah pehpa inko khatnin ajah-a, Keiman hona chu nangma amatoh kamu hilou nahim? ati.

²⁷Peter akilep kit tai. Chuin chupet tah chun ahchal akhongtan ahi.

²⁸Chuin amahon Jesu chu Caiaphas in'a konin thutanna in [4] lama akaitaove; hichu jingkah matah ahin; ahivangin kalchuh kut an aneh theina dinguva, akisuhboh louna dingun, thutanna in'a chun amaho alutpouve.

²⁹Hijeh chun Pilate apotdoh-in, amaho chu adongin, Hichepa hehna-a achunga ipi thu naneijum? ati.

³⁰Amahon adonbutnun, ajah-a, Ama hi khangse lou hile nangma khutna pedoh pouvinge, atiuve.

³¹Chuin Pilate'in ajah uva, Nanghon ama hi puijun lang, nangho dan ngaijin athu tantaovin, ati. Judah hon adonbutnun, Keiho dinga mi thading chu dan ngai ahipoi, atiuve.

³² Ama iti thia athi ding thudol Jesu'n asei chu guilhuna dinga chutia ahi.

³³Hiche chun Pilate thutanna in sungah alut kitnin, Jesu akouvin ajah-a, Nangma Judah te lengpa nahim? ati.

³⁴Jesu'n adonbutnin, Hichu nangman nachama naseiha, ole mi khattouvin keima thudol naseipeh ham? ati.

³⁵Pilate'in adonbutnin, Keima Judah mi kahim? Nanam mite le thempu pipuihon kakhutna eipehdoh nahi chu; ipi nabolset baham? ati.

³⁶Jesu'n adonbutnin, Keima kagam hiche vannoi hi ahipoi; ka lenggam hiche vannoi hi hile, Judah ho khutna eikipehdoh louna dinga kasohten asat dingu ahi; ahinla tun kalenggam hi hichea kon ahipoi, ati.

³⁷Chuin Pilate'in, Ahile nangma leng nahim? ati. Jesu'n adonbutnin, Leng kahi chu naseikhai. Thutah thu hettohsah dinga hiche dinga hi hung penga, hiche dinga hi vannoi'a hunga kahi. Thutah he chan chun ka-aw angaije, ati.

³⁸Pilate'in ajah-a, Ipiham thutah chu, ati. Chuin hiche chu aseijin, Judah ho henga chun agapotdoh kitnin, ajah uva, Achungah themona kamudoh hihhele.

³⁹Ahivangin nanghon kalchuh kut tengle mikhat kalhadohpeh dingu chonna ngai khat naneijui; hijeh chun Judah Lengpa hi lhadohpeh leuveng nalungu ham? ati.

⁴⁰Chutah chun amahon, Hichepa hihih hen, Barabbas joh hihen, tin asamtauve. Barabbas chu gucha michom ahi.