Read Thado Chin John 19 Bible Online

John 19 - Thado Chin bible

John 19

¹Chutah-in Pilate'in Jesu alan, ajeptai.

²Chuin sepaihon ling lukhuh aphanun, alua akhuhpeh-un, chule ponsandup asilpeh-un,

³Chuin akoma ahungun, Chibai, Judah te Lengpa! atiuvin akhutnuva adengpan taovin ahi.

⁴Chuin Pilate agapot kitleuvin, ajah uva, Veuvin, akhan gitlouna ima kamu lou nahetna dinguva, ama naheng uva kahin puidoh ahi, ati.

⁵Hiche chun Jesu ling lukhuh khuhle, ponsandup sil pum chun ahung potdoh-in ahi. Chuin Pilate'in ajah uvah, Veuvin mihem hi! ati.

⁶Chuin thempu pipuiho le sottolle hon ama chu amutah-un, Thingpel'a khenbeh-in, thingpel'a khenbeh-in! tin asamtauve. Pilate'in, Nanghon kaijun lang thingpel'a khenbeh taovin; ajeh chu keiman akhan gitlouna kamupoi, ati.

⁷Judah hon adonbutnun, Keihon dan khat kaneijun, hiche dan dungjuija chu thi dingdol ahi, ajehchu ama Pathen Chapa akihisah-e, atiuve.

⁸Pilate'in hiche aseiju chu ajah phat chun, akicha cheh jengtan;

⁹Thutanna in sungah alut kitnin, Jesu jah-a, Nangma hoija kon nahim? ati. Ahivangin Jesu'n iman adonbutpoi.

¹⁰Hijeh chun Pilate'in ajah-a, Neihou lou dingham? Nangma lhadohna ding jong chule thingpel'a khetbehna ding jong thu kanei hi nahet louham? ati.

¹¹Jesu'n adonbutnin, Chunga kona kipe lou hile chun, nangman kachunga thuneina himhim nanei lou ahi; hijeh chun nakhutna eipedohpa chonsetna achung nunge, ati.

¹²Hichea pat chun Pilate'in ama chu lhadoh ding agotan ahi. Ahinla Judah hon asamun, Nangman mipa hi nalhadohle Caesar jol nahilou ahi; amale ama lenga kisem chan chu Caesar douna thusei ahi, atiuve.

¹³Pilate'in thu chucheng ajah phat chun, Jesu chu ahin puidoh-in, chuin Songlhongnal atiu Hebrai paova Gabatha, atiu thutanna mun'a chun atoutan ahi.

¹⁴Hichu kalchuh kut dinga kigot ni, nidan gup dontah ahi. Chuin Judah ho jah-a, Veuvin, Nalengpau hi! ati.

¹⁵Ahivangin amahon asamuvin, Sumangin, sumangin thingpelah khenbeh-in! atiuvin ahi. Pilate'in ajah uva, Nalengpau thingpel'a kakhetbeh dingham? ati. Hichun thempu pipuihon adonbutnun, Keihon, Caesar tailou leng kaneipouve, atiuvin ahi.

¹⁶Chutah-in aman ama chu thingpel'a khetbeh dingin akhutnuvah apedohtai. Chule amahon Jesu chu akaijun apuimang taovin ahi.

¹⁷Chuin athingpel akiputnin Lugu mun atiu, Hebrai paova Golgotha atiu, mun chu jonin achedoh tan ahi.

¹⁸Hikoma chun ama thingpelah akhenbeh-un, chule mi ni asih langto gelah amatoh akhetbeh thaovin, Jesu chu alailhai.

¹⁹Chuin Pilate'in aminchan lekhan asunin, thingpel leh-a chun atah-in ahi. Chule akisun chu, NAZARETH JESU, JUDAH TE LENGPA ti ahi.

²⁰Jesu thingpel'a kikhetbeh na mun chu khopi nai ahi jeh chun, hiche min kisun chu Judah ho tamtah-in asimun; hichu Hebrew paotoh, Latin paotoh, chule Greek paova kisun ahi.

²¹Hijeh chun Judah thempu pipuihon Pilate jah-a, Judah te Lengpa tin sun hih-in, Aman, Keima Judah te lengpa kahi ati, tin sunbovin atiuve.

²²Pilate'in adonbutnin, Kasutsa chu kasutsa ahitai, ati.

²³Chuin sepaihon Jesu chu thingpel'a akhetbeh jouvun, aponsil alauvin, hal li asouvin, sepai khat chu khat hal khat cheh achangui; chule asangkhol jong chu alauvin ahi. Asangkhol chu khui lou ahin, alua pat ato geija kikhong lhungkei ahi.

²⁴ Hijeh chun khatle khat akihouvun, Hiche hi botsepou hite, koipen changam vang kiveuhite, akitiuve. Pathen lekha bu thua kisei, Kaponsil akihomun, Kasangkhol avangpha pha changhen tin vang asantauve, ti chu guilhuna dinga, sepaihon hitia chu abolu ahi.

²⁵Tun Jesu thingpel koma chun anutoh anu sopinu, Cleopas inneipi Mariam, chule Mariam Magdalene adingun ahi.

²⁶Chuin Jesu'n anu le aman angailut aseijui chu akoma adin amu phat chun, anu jah-a, Numei, ven, nachapa chu, ati.

²⁷Chuin aseijui jah-a ma chun, Ven, nanu chu, ati. Chuin hiche-a pat chun seijui chun anu chu ama in'ah apuitai.

²⁸ Hiche jou chun Jesu'n thil ijakai akichai soh chu ahen, Pathen lekhabua thu chu guilhunsoh theinan, Kadang achah-e, ati.

²⁹Chukoma chu bel khatna theitwi thuh kitung ahin, chuin twichop pon theitwi thuh dimsetnin, hyssop mol leh-a atah-un, akamtoh agah sutouvin ahi.

³⁰Chuin Jesu'n theitwi thuh chu adonin, Akichaitai, ati. Chuin akaikun alhagao alhadohtan ahi.

³¹Chuin kigin ni ahi jeh chun, cholngah ni-a thilongho chu thingpel'a aumden louna dingin, (ijeh inem itile hiche cholngah ni chu niloupi ni ahi,) Judah hon Pilate henga akeng gaheboh dingle, along galah mangna dingin athumun ahi.

³²Hichun sepaiho chu ahungun, akikhet behpi amasapa kengle khatpa keng chu aheh bongui.

³³Ahin Jesu kom ahung geijun, athisa anahitah chu amuvin, akeng ahehbong tapouve.

³⁴Ahi vangin sepaiho lah-a tengcha choi khat chun atengin anah agahsunin ahile, chua chun thisan le twisih ahung longlha paijen jengin ahi.

³⁵Chule amupa tah chun ahettohsah ahin, chule ama thu hettohsah chu tahbeh ahi: chule aman atahbeh asei ahi chu ahei; nanghon jong natahsan theina dinguva, ahi.

³⁶ Pathen lekhabua, Agu khatcha jong kihehbong lou ding, ati chu guilhuna dinga, thil hicheng chu soh-a ahitai.

³⁷ Pathen lekhabu thu dangman, Amahon asutpao chu avet dingu ahi, ati.

³⁸Chuin hicheng jou chun Arimathea khomi Joseph, Judah ho gina guhthima Jesu seijui hia chun, Jesu long chu pohdoh dingin Pilate henga agathumin ahile, Pilate'in anaphal pehtai. Hijeh chun ama ahungin, Jesu long chu ahung ladohtai.

³⁹ Chuin Nicodemus, atila jana Jesu henga hunga chun, myrrh le aloes kihal ser somnga tobang ahinchoijin ahungin ahi.

⁴⁰Chuti chun amahon Jesu long chu alauvin, Judah ho kivui ngai bangin, lounamtui toh tupat ponnemin atomtaovin ahi.

⁴¹Chule thingpel'a akhetbehnao mun'a chu hon khat uma ahin; hona chu koima lupsahna khah louhel lhan thah khat uma ahi.

⁴²Hijeh chun Judah ho kigin ni ahi jeh chun, chukoma chun Jesu chu alupsah taove; ijeh inem itile lhan chu akomcha-a uma ahi.