Read Thado Chin John 21 Bible Online

John 21 - Thado Chin bible

John 21

¹Hiche jou chun Tiberia dillen pangah Jesu aseijuite henga akilah kitleuvin; chule akilah chu hiti hi ahi.

²Simon Peter le Didymus atiu Thomas chutoh, Galilee gam Canna kho-a mi Nathanael toh, Zebedai chapa teni toh, chule seijui dang ni toh um khoma ahiuve.

³ Simon Peter'in amaho henga, keima nga manin chenge ati. Amahon ajah-a, Keiho jong kahungdiu ahi, atiuvin ahi. Chuin acheuvin kong khatna gangtah-in alutpai taove. Chule hiche jan chun imacha amanpouvin ahi.

⁴Ahin jingkah ahunghi phatnin, Jesu vaokamah adingin; ahivangin seijui ho chun Jesu ahi chu ahepouve.

⁵Hichun Jesu'n ajah uva, Chate, neh ding ima naneijum? ati. Amahon, Kanei pouve, atiuve.

⁶ Chuin aman ajah uva, Kong sih jet lama chun len sepleu chun namat dingu ahi, ati. Hijeh chun amahon asepmuvin ahile, nga atama atam jeh chun akaijou tapouve.

⁷Hichun Jesu'n angailut seijui chun Peter jah-a, Pakai ahi, ati. Peter'in, Pakai ahi, ti chu ajah phat chun, sangkhol aki-ah loijin (ijeh inem itile asagoh keova um ahin) dillena chun achomlhan ahi.

⁸Ahin seijui dangse vang chu nga dimset len akaijun, kongneo khatna ahung kitolun ahi; (ijeh-inem itile amaho chu tolla kona gamla lou ahiuvin, tong ja ni tobang bou kikah ahiuve).

⁹Chutichun tolgo agei phatnun, chukoma chu songmeihol meija kitihle, achunga nga kikoi, chule changlhah amuvin ahi.

¹⁰Jesu'n ajah uva, Tu tahtah-a namatnu nga chu phabep galaovin, ati.

¹¹Hiche chun Simon Peter kong'a akaldoh-in, nga len ja khatle somnga le thum dimset len chu agakaijin; nga achuti tam vang chun alen chu a-ehpon ahi.

¹²Jesu'n ajah uva, Hungun jing an hung neuvin, ati. Chule Pakai ahi chu aheuvin, seijui ho khatcha jong, Koi nahim? tia dong ngama aumpouve.

¹³Chuin Jesu ahungin, changlhah chu alan, amaho chu apen, chutobang machun nga jongchu apei.

¹⁴Hiche chu athia kona athodoh nunga aseijuite henga akilah athumveina ahi.

¹⁵Chuin ajing anneh-u achaijun, Jesu'n Simon Peter jah-a, Jonah chapa, Simon, nangman hicheho sanga hi neingailut joh-em? ati. Aman ajah-a, Henge Pakai; kangailut nangin nahenai, ati. Aman ajah-a, Ka kelngoi nouho vah-in, ati.

¹⁶Ani veinan ajah-a, Jonah chapa, Simon, nangman neingailut em? ati. Aman ajah-a, Henge Pakai; kangailut nangman nahenai, ati. Aman ajah-a, Ka kelngoiho chingin ati.

¹⁷Chuin athum veinan ajah-a, Jonah chapa, Simon, nangin neingailut em? ati. Aman thum veijen, Neingailut em? ati jeh chun Peter alungnom motan, ajah-a, Pakai, nangman ijakai nahenai; keiman nangma kangailut nangman nahenai ati. Jesu'n ajah-a, Ka kelngoi ho vah-in.

¹⁸Tahbeh beh-a kaseipeh nahi, nachapan laija chu nangman natai nakigah-a, nachena nom noma nacheji ahi; na-upat teng vangle, nakhut najah-a midangin natai nagahpeh ding, chule nache nom louna lam lama napui ding ahi, ati.

¹⁹Hichu ama iti thia athi-a, Pathen achoi-at ding chu hetsahna-a, asei ahi. Chuin hiche chu asei jouvin ajah-a, Neijuijin, ati.

²⁰Chuin Peter akiheijin ahile, ajan anneh uva a-anga kingaija, Napedoh-a pang dinga chu koiham? tia donga, Jesu'n angailut seijui chun ajui amui.

²¹Peter'in amachu amuphatnin, Jesu jah-a, Pakai, hichepa hi iti dingham? ati.

²²Jesu'n ajah-a, Kahung kahse-a ama hi aumden ding deileng, nang dinga hichu ipidi hiding ham? Nangman kanung juijin, ati.

²³Chuin hiche seijui chu thi lou ding ahi tin sopite lah-a athangtan ahi; ahinla Jesu'n ama jah-a chu, Ama chu thi lou ding ahi, ati ahipon, Kahung kahse-a ama hi aumden ding deileng, nang dinga hichu ipidi hiding ham? ati ahibouve.

²⁴Hicheng thu hettohsah-a, chule hicheng thu suna hi hiche seijui chu ahin; chule ama thu hettohsah chu tahbeh ahi ti kaheuve.

²⁵Chule hicheng tailouvin jong Jesu thilbol tamtah aumin, hitiho chu abonchan kisun sohkeile, kei ngaiton, lekhabu kisun chengse chu vannoi leiset hin dolponte. Amen.