Read Thado Chin John 3 Bible Online

John 3 - Thado Chin bible

John 3

¹Pharisai ho lah-a mi amin Nicodemus atiu Juda ho vaipo khat aumin,

²Ama chu jan-in Jesu hengah ahungin ajah-a, Rabbi, Pathen'a kona hung houhil khat nahi ti, keihon kaheuve. Ajeh chu Pathen toh kivop louvan melchihna kidang nabol chengse hi koiman abol theipoi, ati.

³Jesu'n adonbutnin ajah-a, Tahbeh-a kaseipeh nahi, Koi hijongle chunga kona thahpen kit lou chu koiman Pathen lenggam amu theipoi, ati.

⁴Nicodemus'in ajah-a, Mi ateh tengle iti pen thah thei dingham? Aniveina-a anu oisunga lutna peng kit theijam, ati.

⁵Jesu'n adonbutnin, Tahbeh-a kaseipeh nahi, Mi koi hijongle twi leh Lhagaova apen loule Pathen lenggam alut theipoi.

⁶Tahsaphe-a kona penga chu tahsephe ahin, Lhagaova kona penga chu lhagao ahi.

⁷Chunga kona nathahpen kit dingu ahi tia najah-a kasei chu datmo hih-in.

⁸Hui khu anun nomna lam lamah anungjin, nangman agin najanan hoija hung kona hoi lama acheji nahepoi: Lhagaova pengho chengse jong chuti chu ahiuve, ati.

⁹Nicodemus'in adonbutnin ajah-a, Hicheng chu iti hi thei dingham, ati.

¹⁰Jesu'n adonbutnin ajah-a, Nangla Juda te houhil nahin, hitiho chu nahet louham?

¹¹Keiman tahbeh-a kaseipeh nahi, Keihon kahet kaseijuva, kamu kahetsah-u ahi, ahivangin kahet tohsah-u hi nanghon nasang pouve.

¹²Keiman nangho jah-a leiset thu kaseija nanghon natahsan louvule, van thuho seileng iti natahsan dingu ham?

¹³Van'a uma, van'a kona hung kumlha Mihem Chapa tailou, koima van'a akal khapoi.

¹⁴ Chule gamthipma Mosi'n gul adop sang bang banga chu Mihem Chapa hi kidomsang ding ahi.

¹⁵Koi hile Ama tahsan chan chu mangthah louva, tonsot hinkemlou anei ahitai.

¹⁶Ajeh chu Pathen'in hibanga hi vannoi angailut jeh-in, Achapa changkhat chu apetan ahi; koi hijongle Ama tahsan chan chun mangthah louva tonsot hinkemlou anei ahitai.

¹⁷Ajeh chu Pathen'in Chapa chu vannoi themmo chansah dinga hilouvin, vannoi mite ama vanga huhhinga aum theina dinguva vannoi'a ahinsol joh ahibouve.

¹⁸Ama tahsan chu themmo chang louva ahitai; atahsan lou vang chu themmo changsa um ahitai, aman Pathen Chapa changkhat mina atahsan lou jeh chun.

¹⁹Chule themmo achanau chu hiche ahi, vannoi'ah vah ahungin ahivangin achonnau phatlou jeh-in, mihon vah sangin muthim adeijouvin ahi.

²⁰Ijeh-inem itile achon phalou jousen vah ahotbole, achon phatlou chu kisosal khante tin, vah-a chun hung jong ahungjipoi.

²¹Thutah bola vang chu, athilpha bol chu Pathen vanga ahi ti phondohnan vah-a ahungjin ahi, ati.

²²Chucheng nung chun Jesu aseijuite toh Judea gamah ahungun, chuin chukoma chun amahotoh aumin, baptize achansah jin ahi.

²³Chule John'in jong Salim kenga Ainon kho-a chun twi atam jeh chun baptize achansah-in; miho chu ahungun baptize ahung changjiuvin ahi.

²⁴ Ijeh-inem itile John songkulla kikhum loilai ahi.

²⁵Hia chun John seijui ho le Juda miho kisuhtheng thudollin akineltauvin ahi.

²⁶Chuin amaho John henga ahungun ajah-a, Rabbi, ven, Jordan gala naumpi athu nahettohsah, ama chun baptize achansah jin, mi jouse ahenga ahungjiuve, atiuve.

²⁷John'in adonbutnin, Mi van'a kona kipe lou chu ima achang theipoi.

²⁸ Nanghotah keima thu hettohsah nahiuve, Keiman, Keima Christa kahipoi, ama masanga hinkisol kahibouve, kati chu.

²⁹Mou kichenpia chu moulang ahi; moulang jol akoma dinga athusei ja-a chu, moulang aw gina chu hapa kipahji ahi; hijeh-a chu keima kipana chu kibulhit ahitai.

³⁰Ama chu khangtou tou ding ahin, keima kemsuh suh ding kahi.

³¹Chunga kona hung chu mi jouse chunga chungnung pen ahi. Leija kona chu leija mi ahin, leiset thubou asei ahi; van'a kona hunga chu chungnung pen ahi.

³²Aman amu chanle ajahchan ahettohsah ahin; ahettohsah chu koiman asangpoi.

³³Athu hettohsah sanga chun, Pathen chu dihtah ahi tia mohor anamdet ahi

³⁴Ijeh-inem itile Pathen sol chun Pathen thubou aseijin; Pathen'in tepten Lhagao apepoi.

³⁵ Pa chun Chapa chu angailun, thil jouse akhutna apetai.

³⁶Chapa tahsana chun tonsot hinna anei ahitai; Chapa tahsanlou vang chun hinna mulou ding; amavang Pathen lunghan achunga umjo ahitai, ati.