Read Thado Chin John 4 Bible Online

John 4 - Thado Chin bible

John 4

¹Chuin Pakai chun John sangin Jesu'n seijui tamjo asemin baptize achan tamsahjoi ti Pharisai hon ajataove ti ahet phatnin,

²(Jesu'n aman baptize chansah louva aseijuiho abolsah ahi jeng vangin)

³Judea gam adalhan Galilee gam lama akiletan ahi.

⁴Chule Samaria gam ajot tei ding ahi.

⁵ Chuti chun Samaria kho khat Sychar atiuva chun ahung lhungtan, hichu Jacob'in achapa Joseph apeh mun kom chu ahi.

⁶Chukoma chu Jacob twikul uma ahi. Jesu alamjot thacholin twikul panga chun atouvin; hichu nidan gup don ahi.

⁷Chukoma chun Samaria numei khat twi thalin ahungin, Jesu'n amanu jah-a chun: Twi don ding neipen, ati.

⁸(Ijeh-inem itile aseijuite chu neh ding cho-a khopi sunga chu lut anahitaove).

⁹ Hitichu ahi jeh chun, Samaria numeinu chun ajah-a, Nangmala Juda mi nahin, Samaria numei keima henga twi don ding nathum chu iti danham? ati. Ajehchu Juda miten Samaria mite thilkeu amanji louvu ahi.

¹⁰Jesu'n adonbutnin amanu jah-a, Pathen thilpeh henlang chule, twi don ding neipen tia nahenga thuma chu koi ahi helechun; nangman ama henga nathumjoh ding ahin, chutile aman nangma hinna twi peta dinga, ati.

¹¹Numeinu chun ajah-a, Pu, nangman athalna ding imala naneipon, twikul'a athuh-in, hintwi chu hoija nalah ham?

¹²Twikul hi eipeuva, aman jong dona, achateu le aganchaho donsah-a kapau Jacob sanga chungnungjo nahim? ati.

¹³Jesu'n adonbutnin amanu jah-a, Koi hijongle hiche twi don chengse chu dangchah kit ding ahi.

¹⁴Ahin koi hijongle keiman kapeh ding twi vang chu adon jouse dangchah kit talou ding ahi; chule keiman kapeh ding twi chun asunga tonsot kemlou hintwi putna twinah sohdoh ding ahi, ati.

¹⁵Numeinu chun ajah-a, Pu, hiche twi chu neipen, kadangchah kit louna dingle hikoma gam hichana hi twi thala kahungji louna dingin, ati.

¹⁶Jesu'n ajah-a, Chen na-inneipu gakouvin, hikoma hung lhonin, ati.

¹⁷Numeinu chun adonbutnin ajah-a, Keiman inneipu kaneipoi, ati. Jesu'n amanu jah-a, Inneipu kaneipoi, nati chu nasei dih lheh-e;

¹⁸ijeh-inem itile nangman ji nga nanei ahitai, tu-a nanei khu nangma ji ahipoi; hiche nasei chu adih lheh-e, ati.

¹⁹Numeinu chun ajah-a, Pu, nangma hi themgao nahi, ti kahedoh tai.

²⁰Kapute kapateuvin hiche mola hi Pathen ahoujiu ahi; ahin nanghon, Min Pathen ahouna ding mun chu Jerusalem ahi, nati uve, ati.

²¹Jesu'n amanu jah-a, Numei, neitahsanin, nanghon Pa chu nahouna dingu hiche mola jong hilou, Jerusalem'a jong hilou, hitobang phat chu ahung lhunge.

²²Nanghon nahet louhelu nahouvu ahin, keihon kahouvu hi kaheuve; ijeh-inem itile huhhingna chu Juda te lah-a konbou ahi.

²³Ahivangin phat ahung lhunge, tu hi ahi, chutengle ahou tahbeh hon Pa chu lhagaole thutah-a ahou dingu ahi; ijeh-inem itile Pa chun chutobangho bou chu ahou dinga ahol ahi.

²⁴Pathen chu Lhagao ahi, chule ahouten lhagaole thutah-a hou ding mong ahi, ati.

²⁵Numeinu chun ajah-a, Keiman Messiah, Christa atiu chu, hung ding ahi, ti kahei; Ama chu ahung tengle aman ijakai eihil sohkei dingu ahinai, ati.

²⁶Jesu'n amanu jah-a, Nakihoupi keima hi ama chu kahi, ati.

²⁷Chuin hiche pettah chun aseijuite ahungun, numeinu toh anakihou chu, adatmo lheh jengui; ahivanginla, Ipi thuma nahim? ahiloule, amanu chutoh ibola kihou nahim, tia khatcha jong aumpouve.

²⁸Chutichun numeinu chun atwi bel adalhan, khopi sunga chun achen, miho jah-a chun,

²⁹Hungun, mi khat, hung veuvin, kathilbol kachonna jouse eiseidohpeh sohkeije; hiche hi Christa hikhat ding ham? ati.

³⁰Amaho khopi-a kon chun apotdoh-un, ama henga ahungui,

³¹Hiche pet chun aseijuite ahenga ataovun, Rabbi, an nen, atiuve.

³²Ahivangin aman ajah uva, Nangho het lou an neh ding kaneije, ati.

³³Hijeh chun aseijuite khatle khat akihouvun, Khattouvin neh ding an ahinchoipeh ham? akitiuve.

³⁴Jesu'n amaho jah-a, Eisolpa lung gotlam bol, chule akin suhbulhit chu keima an ahi.

³⁵Nanghon, Chang atna ding lha li aumnalaije, natiji hih-um? Veuvin, keiman nangho jah-a kasei ahi, Khodah uvin, loujao khu gahveovin, tun a-at phat ahi, aminin agusohtai.

³⁶A-at chun athaman asangjin, chule aga chu tonsot hin kemlouvah akholjin ahi; chuti chun atupale a-atpa thakhat tah-in akipah thanom khomji lhone.

³⁷Chuti chu ahin hichea hin, Khatnin atun achom khatnin a-atji, ti thuhi tahbeh ahi.

³⁸Natohgim lounao atna kasol nahiuve; michom dangin atohgim ahin, nangho amaho tohsa-a lut nahiuve, ati.

³⁹Chuin, Kathilbol kachonna chengse eisei dohpeh-e, tia hettohsah numeinu thusei jal chun, chuche khopi-a Samaria mi tamtah-in atahsan taove.

⁴⁰Hijeh chun Samaria miho chu ama henga ahungun, amaho chu aumpina dingun angeh taovin ahile; ama chukoma nini anichongin ahi.

⁴¹Ama thusei jal-in mi tamtah-in atahsanbe taovin;

⁴²Hichun amahon numeinu jah-a, Tun nangma thusei jala katahsanu ahipoi; ijeh-inem itile keihotah-in kajauvin, ama hi vannoi huhhingpa Christa tahchu ahi, ti kahetauve, atiuve.

⁴³Chuche nini jou chun, ama chukoma kon chun Galilee lama achetai.

⁴⁴ Ijeh-inem itile ama gam sunga themgao ja achang poi, ti Jesu amatah-in ahettoh sahsa ahi.

⁴⁵ Hijeh chun Galilee alhun phatnin, Galilee mihon anasangui; ajeh chu Jerusalem'a kut laija athilbol imaho chu amahon aboncha amu sohkeiju ahi; ajehchu amaho jong kut na chu chea ahiuve.

⁴⁶Hitichun Galilee gama twisih lengpitwi asosahna Cana kho-a chun Jesu ahungkit tan ahi. Chuin hikoma chun milal khat aumin, achapa chu damlouva Capernaum'a um ahi.

⁴⁷Chuin ama chun Jesu Judah gama konin Galilee gamah ahungtai, ti ajah phatnin, ahenga achen, achesuh-a achapa chu agabol dam dingin angehtan ahi; ajehchu ama chu athikoncha ahitai.

⁴⁸Hijeh chun Jesu'n ajah-a, Melchihna le thil kidang namu lousen tahsanpon nate, ati.

⁴⁹Milalpa chun ajah-a, Pu, kachapa chu athi kah-in hungsuh-in, ati.

⁵⁰Jesu'n ajah-a, Nachena dinga kichetan; nachapa ahinge, ati. Mipa chun ajah-a Jesu thusei ho chu atahsanin achetai.

⁵¹Chuin achesuh-in ahile, asohhon ahung lamtouvin, achapa chu adamtai, ahung tiuve.

⁵²Chuti chun aman, Itih-a dam pan hitam, tin adongin ahile amahon, Janhi nidan sagi dontah chun akhosih-in alhatai, atiuve.

⁵³Hichun Jesu'n ajah-a, Nachapa ahinge tia asei nidan tah ahi chu apan ahedoh tan; chuin amatah le a-insung mi chengsen atahsan taovin ahi.

⁵⁴Hiche hi Jesu'n Juda gam adalhah-a Galilee gama ahunga melchihna abolkit anina ahi.