Read Thado Chin John 5 Bible Online

John 5 - Thado Chin bible

John 5

¹Hicheng nung chun Juda miho kut khat aumin, chule Jesu Jerusalem'a agache touvin ahi.

²Hia chun kelngoi kot phunga twikul khat uma ahin, amin chu Hebrew paova Bethesda kisah ahin, aleibuh nga ahi.

³Hichenga chun ana, mitcho, elbai, nakong chatmo, mihon tamtah twi chaloh ngahjinga luma ahiuve.

⁴Ajehchu itih phat ham kom komle Pakai vantil khat hung kumlhaji-a twi chu ahung cholohji ahin, atwi kicholoh nunga twikul'a kumlha masa penpen chu ipi veija, itobanga na-a hijongle anat chu damhel jeng ahi.

⁵Hia chun mi khat kum somthum le kum get jen chatmoa ahin;

⁶Jesu'n ama chu analup amun kum sottah na-a ahi chu ahen ajah-a, Nadam nom em, ati.

⁷Anapa chun adonbutnin, Pu, twi ahung kicholoh tengle twikul'a eikoi lha ding mi koimala kaneipon; kachele kalhun kahle mi dangin eikhelin achejitai, ati.

⁸Jesu'n ajah-a, Kipatdoh-in, nalupna kichoijin lam jottan, ati.

⁹Chuin mipa chu adam paihel jengtan, alupna akichoijin, lam ajottan ahi. Hiche ni chu Cholngah ni ahi.

¹⁰ Hiche jeh chun Juda hon mi akiboldampa jah-a chun, Cholngah ni ahi, nangman nalupna nakichoi chu dan ngai ahipoi, atiuve.

¹¹Ahin aman amaho chu adonbutnin, Eiboldampa tah-in kajah-a, Nalupna kichoijin, lam jottan eiti chu, ati.

¹²Amahon adongun, Najah-a, Nalupna kichoijin, lam jottan tia chu koiham? atiuve.

¹³Akiboldampa chunla chukoma mipi tam jeh chun, Jesu la guhthima anavah manga ahitan, aboldama chu koi ahi ahepon ahi.

¹⁴Khonungin Jesu'n ama chu houin'ah amun, ajah-a, Ven, akiboldama nahitai; chonse kit tahih-in, ajole akhohjo cheh nachunga chugetninte, ati.

¹⁵Mipa chu achemangin, Juda ho jah-a, Aboldama chu Jesu ahi tin agaseitan ahi.

¹⁶Chuin hiche jeh chun Juda hon Jesu abolse taovin, chule cholngah ni-a chucheng aboljeh chun, thadin aholtauve.

¹⁷Ahivangin Jesu'n amaho chu adonbutnin, Ka Pan tu gei hin na atongin, keiman jong katonge, ati.

¹⁸Hiche jeh chun Juda hon ama thadin ahabol cheh taove; ajeh chu aman cholngah ni apal lhahkeo hilouvin, Pathen apa ahisah-a, Pathen toh kibanga akisei jeh jong chu ahi.

¹⁹Hijeh chun Jesu'n adonbutnin ajah uva, Tahbeh beh-a kaseipeh nahiuve, Chapa chun ama chamin ima abol theipoi, a-Pan abol amu chachabou chu ahi; ijeh-inem itile aman abolchan chu, atobang banga chu Chapan jong abol ahi.

²⁰Ijeh-inem itile Pa chun Chapa chu angailun, athil bol jouse chu avetsahji ahi; kidang nasahna dinguva, aman hicheho sanga hi chungnungjo thil avetsah ding ahi.

²¹Ijeh-inem itile Pan mithiho akaithouva ahinsah banga, Chapan jong ahinsah nomnom ahinsah ahi.

²²Pa chun mi koima thu atanpoi, thutan ding jouse Chapa apehdoh ahitai;

²³Chutia chu mi jousen Pa ajabol banga, Chapa chu ajabol theina dingu ahi. Chapa jabol lou chun ahinsola Pa chu ajabol lou ahi.

²⁴Tahbeh beh-a kaseipeh nahiuve, Kathusei ngaija chule eisolpa tahsan chun tonsot hinna anei ahitai, chule thupi tanna geita louva, thina-a kona hinna-a galkaija ahitai.

²⁵Tahbeh beh-a kaseipeh nahiuve, phat ahung lhunge, tu hi ahi, mithihon Pathen Chapa aw ajah dingu; chule ajaho chengse chu hing ding ahiuve.

²⁶Ijeh-inem itile Pan amatah-in hinna anei bang chun, Chapan jong amatah-in hinna aneina dingin apen;

²⁷Chule Mihem Chapa ahi jehchun, thutan chaina thuneina chu apen ahi.

²⁸Hiche hi datmo hih-un; ijeh-inem itile phat ahung lhunge, hichea chu lhan khuh-a umho jousen a-aw ajah dingu,

²⁹ Chule hungdoh ding ahiuve; thilpha bolteho chengse hinna-a thoudoh dingu, chule thilphalou bolteho chengse themmo changa thoudoh ding ahiuve.

³⁰Ajehchu keiman kachamin ima kabol theipoi, kajah bang banga thu katan ahin; kathutan chu dihtah ahi; keiman lunggot lam hol louva, eisola Pa lung got lam chu kaholjoh jeh-in.

³¹Keiman keima le keima chungchang kaki hettohsah hile, ka hettohsah chu dih lou ding ahi.

³²Ka chungchang hettohsah-a michom khat aumin; chule aman ka chungchang ahettohsah chu hettohsahna dihtah ahi ti kahei.

³³ Nanghon John henga mi nasolun ahile, aman thutah chu ahettohsah-e.

³⁴Ahin Keiman hettohsah nahi mihem'a kona kalah ahipoi; hijongle nangho huhhing-a naumna dinguva, hiche hohi kasei ahi.

³⁵Ama chu thaomei kong'a le salvah-a tobang ahin; chule nanghon ama vah-a chu chomcha khat nomsah nanom un ahi.

³⁶Ahinla hettohsahna keiman kanei hi John'a sanga chu chungnungjo ahi; ijeh-inem itile toh molso dinga eipeh natoh, ka natoh chengsetah hin, Pa sol kahi chu ahettohsah ahi.

³⁷ Chule Pa eisolpa tah chun, keima thudol ahettohsah tai. Nanghon imatih-in ama aw najakhapouve, amel jong namukha pouve;

³⁸Chule athu jong nasunguva achengpoi; ijeh-inem itile nanghon asolpa chu natahsan pouve.

³⁹Nanghon Pathen lekhabua thu naholtoh jiuve, ajehchu asunga chu tonsot hinna nanei uva nangaito jeh-un; ahin hicheho chu keima thudol hettohsah ahiuve.

⁴⁰Ahin hinna nanei theina dingun, kahenga nahung nompouve.

⁴¹Keiman mihem choiat kasangpoi.

⁴²Ahivangin keiman nangho kahenaove, nangho sungah Pathen ngailutna nanei pouve.

⁴³Keima ka Pa mina hunga kahin, nanghon neisang pouve; achom dang khat ama minin hungle, ama chu anasang naovin nate.

⁴⁴Pathen na hungkon choi-atna bou chu hol louva, nangho khatin khat choiat kisang touva chu iti natahsan thei dinguham?

⁴⁵Keiman nangho Pa henga kaheh dingin ngaito hih-un; naheh jiuva mi khat aumin, nanghon natahsanu Mosi ngei chu ahi.

⁴⁶Nanghon Mosi chu tahsanleu chun keima neitahsan dingu ahi; ajeh chu aman keima thudol asut ahi.

⁴⁷Ama sut natahsan lou vangule, keima thu iti natahsan dinguham?