Read Thado Chin John 6 Bible Online

John 6 - Thado Chin bible

John 6

¹Hicheng jou chun Galilee dillen, Tiberia dillen kiti, gal lang khat lama chun ache tai.

²Chuin natna neiho chunga melchihna kidang abol ho amu jeh-u chun, mipi atama tamin anung ajuijui.

³Chuin Jesu mol chunga akaltouvin, aseijuiho toh atou taovin ahi.

⁴Chule kalchuh kut, Juda te golvah chu naija ahitai.

⁵Chuin Jesu adahdoh-in ahile, mipi atama tam ahenga ahung amun, Philip jah-a, Hiteho neh ding hi changlhah hoija ichoh dinguham? ati.

⁶Hichu aman apatepna ati ahibouve, ijeh-inem itile abolding chu aman akihetnan ahi.

⁷Philip'in adon butnin, Themcha khat chenga chang ding hi jeng jongleu, changlhah makhai jani manin tohponte, ati.

⁸Aseijuite lah-a khat Simon Peter, sopipa Andrew'in, ajah-a,

⁹Hikoma chapang khat aumin, ama hin sap changa kisem changlhah pheng ngale nga ni aneije; ahinla mi hijatpi lah-a hichu ikham hi dingham, ati.

¹⁰Jesu'n, Miho chu tousah-un, ati. Hikoma chu hamhing tamtah um ahin, chuin mi sangnga jen chu atou taove.

¹¹Chuin Jesu'n changlhah alan; thangvahna aneijouvin aseijuiho ahoppeh-in, chule seijui hon atouho chu ahoppeh-un; chutobang chun nga jong chu, agot chanun apeuvin ahi.

¹²Chuin amaho avasoh phatnun, aman aseijuite jah-a, Hitiho chu amangthah um louhelin, amoh anong chengse chu lohkhomun, ati.

¹³Chuin amahon alohkhomun ahile, sap changa kisem changlhah pheng nga-a kon chun, anehmoh nongu paipeh somle paipeh ni aloh dimui.

¹⁴Hijeh chun Jesu'n chuche melchihna kidang avetsah chu amuvin, miho chu akihouvun, Themgao vannoi'a hung dinga chu ama mongmong hi ahi, atiuve.

¹⁵Chuin leng achansah dinga, acham louva ahung mat dingu ahi, ti Jesu'n ahet phatnin, achangin mol chunga akaltou kittan ahi.

¹⁶Chuin nilhah ahi phatnin, aseijuite dila chun achesuh-un,

¹⁷Chule kong'a alutnun, Capernahum lam panga galkai dingin akitol taove. Hichun khola athimtan, ahivangin Jesu ahenguvah ahung hih laijin ahi.

¹⁸Chuin huipi nasatah anun jeh-in twi akinong sang tultul jengin ahi.

¹⁹Hitichun ching somni le ching nga ahim ching somthum ahim ajap lhungun, Jesu'n twi chunga lam ajotna kong lam ahinjot amuvin ahile, akichataove.

²⁰Ahin aman amaho jah-a, Keima kahibouve, kicha hih-un, ati.

²¹Hichun amahon kipah tah-in ama chu kong'a alalut nun: chule hiche pettah chun kong chu ajotnau mun alhungpai tan ahi.

²²Ajingin dillen gallang khat lama mipi dingho chun, chukoma chu aseijuite lutna tailou chu kong dang aumlou amuva, chule Jesu chula aseijuite toh chuche kong'a lutlouva, aseijuite amaho changbou ahiu chu aheuvin;

²³(Ahivangin Pakaiyin thangvahna aneija mihon changlhah anehnau komcha, Tiberia'a kon kong dang dang ahungin ahi).

²⁴Chuti chun mipi ho chun Jesu ahin, aseijuite ahiuvin aumtapouve ti ahet phatnun, amaho chu kong'a akalun, Jesu holin Capernahum'a ahung taove.

²⁵Chuin amahon dillen gal lang khat panga ama amuvin, Rabbi, itih-a hilam nalhun ham? atiuvin ahile,

²⁶Jesu'n amaho chu adon butnin, Keiman nangho tahbeh-a kaseipeh nahiuve, Melchihna kidang namu jeh-u hilouvin changlhah nanehva jeh uva bou keima neiholu ahi.

²⁷Amang thahji an holnan thohgim hih-un, tonsot hinkemlouva umjing ding an holnan thohgim jouvin, hiche an chu Mihem Chapan napeh dingu ahi; ajeh chu Pa Pathen'in ama chu mohor anamdet ahitai, ati.

²⁸Hichun amahon ajah-a, Pathen na katoh theina dinguva ipi kabol dingu ham? atiuve.

²⁹Jesu'n adon butnin ajah uvah, Ahinsol hi tahsan leuchun hichu Pathen natoh ahi, ati.

³⁰Hijeh chun amahon ajah-a, Kamuva katahsan theina dinguva melchihna ipi nabol em? Itobang na natoh nganem?

³¹ Aman van'a konin aneh dingu changlhah apei, tia kisun bang chun; Kapute kapateuvin gamthipmah manna aneuvin ahi, atiuve.

³²Hichun Jesu'n ajah uva, Tahbeh beh-a kaseipeh nahiuve, Van'a kona changlhah napeuva chu Mosi ahipoi; van'a kona changlhah tahbeh chu ka-Pan bou napeuve.

³³Ijeh-inem itile Pathen changlhah chu, van'a kona hung kumlha vannoi hinna pepa chu ahi, ati.

³⁴Hiche chun amahon ajah-a, Pakai, hiche changlhah chu a-imatih chanin neipeuvin atiuve.

³⁵Jesu'n ajah uva, Keima hi hinna changlhah kahi; kahenga hunga chu gilkel talou ding, chule keima eitahsana chu dangchah talouhel ding ahi.

³⁶Ahin kaseipeh nahiuve, Nanghon keima neimu vangun, neitahsan pouve.

³⁷Ka Pan keima eipeh chengse chu kahenga hung ding; chule kahenga hunga chu iti jongle kaledoh lou ding ahi.

³⁸Ijeh-inem itile keima van'a kona kahung kumlhah hi, keima lunggot bol dinga hilouvin eisolpa lunggot bol dingjoh-a hung kahi bouve.

³⁹Eisolpa Pa lunggot chu hiche ahi, Aman eipeh chengse hi mansah neilou hela, ni nunung nileh aboncha kakai thou ding ahi.

⁴⁰Chule eisolpa lunggot chu hiche ahi, koi hile Chapa mu-a, Ama tahsan chan chun, tonsot hinna anei ding ahi; chule keiman ninunung nileh ama kakaithou ding ahi, ati.

⁴¹Aman van'a kona hung kumlha changlhah chu keima kahi ati jeh chun, Juda ho achungah aphunun,

⁴²Amahi Joseph chapa Jesu, anu apa eihon ihetnu chu hilouham? achutile, iti dana van'a kona hung kumlha kahi atiham? atiuve.

⁴³Hijeh chun Jesu'n amaho adonbutnin, ajah uva, Nangho khatle khat kihouvin phun hih-un.

⁴⁴Eisola ka Pan aloilut loule koima kahenga ahung theipoi; chule ni nunung nileh keiman ama chu kakaithou ding ahi.

⁴⁵ Amaho chu Pathen'in ahil hicheh dingu ahi, tin themgaoho lekhabua akisune. Chuti ahijeh chun Pa-a kona ja-a, kihilna neichacha chu, kahenga hungji ahiuve.

⁴⁶Pathen koma kona hung potdohpa tailou chu, koiman Pa chu amukhapoi; amabou chun Pa chu amu ahi.

⁴⁷Tahbeh beh-a kaseipeh nahiuve, Koi hijongle keima eitahsana chun tonsot hinna anei ahitai.

⁴⁸Keima hinna changlhah chu kahi.

⁴⁹Naputeu napateu vin gamthipmah manna aneuvin, chule athi gamtaove.

⁵⁰Hiche hi min aneh-a athi louna ding, van'a hung kon changlhah ahi.

⁵¹Keima hi van'a hungkon changlhah hing chu kahi; koi hijongle hiche changlhah ne-a chu, tonsot geija hing jing ding ahi; chule kapeh ding changlhah chu kaphe hi ahi; hichu vannoi mite hinna dinga kapeh ding ahi.

⁵²Hichun Juda ho amaho le amaho akinelun, Hichepa hin ineh dinguva asa iti eipeh thei dinguham? atiuve.

⁵³Chuin Jesu'n ajah uva, Tahbeh beh-a kaseipeh nahiuve, Nanghon Mihem Chapa sa naneh lou uva, athi nadon louvule, nangmaho sunga hinna nei lou nahiuve.

⁵⁴Kasa ne-a kathi dona chun tonsot hinna anei ahitai, chule ni nunung nileh keiman ama chu kakaithou ding ahi.

⁵⁵Ijeh-inem itile kasa hi an neh tahbeh ahin, kathi hi don ding tahbeh ahi.

⁵⁶Kasa ne-a, kathi dona chu, keijah aum jingjin, keima ama-ah kaum jingjie.

⁵⁷Pa hing chun eisola, Pa vanga kahin banga hi, koi hijongle keima eine-a chu, ama jong chu keima vanga hing ding ahi.

⁵⁸Van'a kona hung kumlha changlhah chu hiche hi ahi; napu napa teovin aneh uva athipiu manna tobang ahipoi; hiche changlhah ne-a vang chu a-imatih chana hing jing ding ahi, ati.

⁵⁹Hiche hi Capernahum'a thu ahil petna, kikhopna in'a asei ahi.

⁶⁰Hiche chun aseijuiho lah-a tamtah-in hiche thu chu ajauvin, Ahahsa behseh jenge; kon angai thei dingham? atiuve.

⁶¹Hichun chuche thua aseijuite phun chu Jesu'n alung sungin ahen, ajah uvah, Hiche chun nakipal lhuhsah-u hitam?

⁶²Achutile Mihem Chapa hi masanga aumna mun'a akaltou muleu chun i-nati dinguham?

⁶³Hinna pe-a lhagaobou ahi, tahsaphen imacha aphatchom sahpoi; najah uva kathusei chengse hi, lhagao ahin chule hinna ahi.

⁶⁴Ahivangin nalah uva abang bang atahsan lou na-umui, ati. Ajeh chu Jesu'n atila pat atahsan lou koikoi ahi, chule ama matsah dinga chu koi ahi anahet jingsa ahi.

⁶⁵Chuin aman, Hiche jeh-a chu najah uva, Pa peh louvin koima kahenga ahung theipoi, kati ahi, ati.

⁶⁶Hichea pat chun aseijuiho tamtah akinung leuvin, amatoh achele ahungleh tapouve.

⁶⁷Chuin Jesu'n Somleni ho jah-a, Nangho jong nache nomum? ati.

⁶⁸ Chuin Simon Peter'in adonbutnin, Pakai, keiho koi henga kache dinguham? Nangman Tonsot hinna thuho nanei ahi.

⁶⁹Chule nangma Pathen hing chapa Christa nahi chu keihon katahsanun, chule kaheuve, ati.

⁷⁰Jesu'n amaho adonbutnin, Keiman nangho somleni kalhendoh-u hilouham? Ahinla nangho lah-a diabol khat aume, ati.

⁷¹Simon chapa Juda Iscariot chungchang thudola hichu asei ahi; ijeh-inem itile somleni lah-a ajao vang, melmaho khutna pehdoh dinga chu amachu ahi.