Read Thado Chin John 7 Bible Online

John 7 - Thado Chin bible

John 7

¹Hicheng jou chun Juda hon tha ding agot jeh-un, Jesu Judah gama vale anomta hih-in, Galilee gama avahle tai.

² Hiche pet chun Juda ho lhambuh kut anaitan ahi.

³Hijeh chun asopihon ajah-a, Nathil bol chengse hi naseijui hon jong amuna dingun, hikom mun dalhanlang, Juda gama chen.

⁴Ijeh-inem itile, minthan go-an koiman guhthimin thil abol ngaipoi. Thil hicheng hi nabol ahi ngalleh, vannoi kimusah-in, atiuve.

⁵Ijeh ham itile asopiho jengin jong ama atahsan louvu ahi.

⁶Chuin Jesu'n ajah uva, Keima tun kaphat alhing hih laije, nangho phat vang alhing jinge.

⁷Vannoi'in nangho naho theipouve; keibou eihouve; ijeh ham itile athilbolu aphapoi tia keiman amaho thudol ka hettohsah ji ahi.

⁸Hiche kut nachun nangho cheovin; keima vang tun hiche kutna chehih laijinge, kaphat alhing hihlaije, ati.

⁹Amaho jah-a chun thu hicheng chu aseijin ama Galilee'a aumden tan ahi.

¹⁰Ahivangin asopite hi kutna dinga ache nungun, ama jong lhang phonga hilouvin, guhthimin achen ahi.

¹¹Hiche chun Judah hon kut nachun ama chu aholun, Hoija umham? atiuve.

¹²Chule mipi lah-a miho chu ama thudola aphun melmul jengui; ajehchu abangin, Ama chu mipha ahi, atiuvin abangin, Ahipoi, mipi lam hilouva apuimang bouve, atiuve.

¹³Ahivangin Juda ho ginan ama thudol chu lhang phonga seija koima aumpouve.

¹⁴Chuin kut kim dontah ahi-in, Jesu houin'a achetouvin, thu agahil tan ahi.

¹⁵Chuin Juda hon adatmo lheh jengun, Hichepan kihilna neikha louva, lekha iti ahet ham? atiuve.

¹⁶Jesu'n amaho chu adonbutnin, Kathuhil hi kei thu ahipoi, eisolpa-a ahibouve.

¹⁷Koi hijongle ama lunggot lam bol nom-an, kathuhil hi Pathen'a kon ahi, keima chama kasei ahi, ahet ding ahi.

¹⁸Ama chama thuseija chun ama kichoi-at ding agot ahin, asolpa choiat ding go-a vang chu, ama chu dihtah ahin, ama-a chu chonphat louna aumpoi.

¹⁹Mosi'n nangho chonna dan napeh lou uham? Nangho khatchan jong chonna dan bang chun nachonpouve. Ibola tha dinga eigo-a nahiuvem, ati.

²⁰Chuin mipi chun adonbutnun, Nangma thilha vop nahi; koiham tha dinga nago-a, atiuve.

²¹Jesu'n adonbutnin ajah uva, Keiman na khat katongin ahile nabonchaovin hichu kidang nasauve.

²² Hiche jeh-a chu, Mosi'n cheptan thu napeh-u ahin; (Mosi'a kon ahijeh hilouvin, puluiho-a kon joh ahin) chule nanghon cholngah nin mi chep natan jiuve.

²³ Mosi thupeh suhkeh louna dinga cholngah ni-a mi khat chep akitanle, cholngah ni-a mi khat kadamsah hel jeh-a kachunga nalunghanu ham?

²⁴Alimsoa thu tan louvin, dihtah-in thu tan jouvin, ati.

²⁵Hichun Jerusalem'a kon mi kimkhatnin, Tha dinga agotpau chu ama hi hilouham?

²⁶Ahivangin, veuvin, phongtah-in thu aseijin, amahonla ajah-a ima aseipouve. Vaipohon ama hi Christa tah chu ahi ti ahet tahbeh mongu hita ham?

²⁷Ahinla ama hi hoija hung kon ahi keihon kaheuve; Christa vang chu akonna koima ahea umlou ding ahi, atiuve.

²⁸Hijeh chun Jesu'n houin'a thu ahil tolhonin, hatah-in asamin, nanghon keima jong neiheovin, chule hoija kon kahi jong naheuve; ahin keima kachama hunga kahipoi, ahinla eisolpa chu dihtah ahi, ama chu nanghon nahepouve.

²⁹Amavang keiman ama chu kahei; ijeh-inem itile keima ama-a kon kahi, chule ama sol kahi, ati.

³⁰Hiche chun amahon mat dingin agouvin, ahin aphat alhin loulai jeh chun, koiman achungah khut alhapon ahi.

³¹Chule mipi lah-a mi tamtah-in ama chu atahsan taovin, chule Christa chu ahung tengle, hichepan abol melchihna ho sanga tamjo abolnah dingham? atiuve.

³²Mipin chutia ama thudola chuche aseijuva aphun melmulu chu Pharisai hon ajauvin; chuin thempu pipuiho le Pharisai hon ama man ding chu sottolho asolui.

³³Chuin Jesu'n, ajah uva aseijin, Chomcha khat nalah uva umtadi nalai ding kahi, chujou tengle eihin solpa henga kache ding ahi.

³⁴Nanghon neiholun natin, neimu lou dingu; chule kaumna-a chu nahung thei lou dingu ahi, ati.

³⁵Hichun Juda ho khatle khat akidongun, Eihon ama iholuva imu lou dingu chu, ama hoijabep che ding hintem? Ole Greek mi lah-a cheng chehho henga chea Greek miho agahil ding khattou ham?

³⁶Nanghon neiholun natin neimu lou dingu, kaumna dinga jong nahung thei lou dingu ahi, ati hi ipi aseina ahidem? atiuve.

³⁷ Chuin kut kichai nin, hichu nipi ni ahin, Jesu adingin hatah-in asamin, Koi hijongle adangchah-a chu kahenga hunghen, hung donhen.

³⁸ Keima eitahsana chu, Pathen lekhabun asei bang banga, asunga kon twihing putdoh-a luija long ding ahi, ati.

³⁹Hichu ama tahsan hon anei dingu, Lhagao Theng chu aseina ahi; ijeh-inem itile Jesu choi-atna aum loulai jeh-a, Lhagao theng chu kipe loulai ahi.

⁴⁰Thu hicheng chu ajauvin mipi lah-a abang bangin, Tahbeh-a ama hi themgao mongmong chu ahi, atiuvin;

⁴¹Akimkhatnin, Ama hi Christa ahi, atiuve. Akimkhat vang chun Christa Galilee'a kona sohdoh ngaijem?

⁴² Christa chu David son hi ding, David chenna khopi Bethlehem'a kon hungdoh ding ahi, tia Pathen lekhabun asei hilouham? atiuve.

⁴³Chuti chun ama thudola chun mipi chu abung bungin akikhentaove.

⁴⁴Chule abangho chun ama chu mat ding agouvin; ahivangin koiman achungah khut alhapouve.

⁴⁵Chuin sottol mimanho chu thempu pipuiho le Pharisai ho henga ahungun ahile, amahon anadongun, Ibola nahinpui daoham? atiuve.

⁴⁶Chuin sottol mimanho chun adonbutnun, Khuchepa thusei tobang khun mi koiman thu aseikhapoi, atiuve.

⁴⁷Chuin Pharisai hon adonbutnun, ajah uva, Nangho jong doha lha-a nahiu hitam?

⁴⁸Vaipoho le Pharisai ho lah-a khatbeh-in ama chu atahsanem?

⁴⁹Ahin danthu helou mipi ho hi sapset changjia ahi, atiuve.

⁵⁰Nicodemus (Amaho lah-a khat, janna Jesu henga gachepa) chun ajah uva,

⁵¹Idan uvin mi chu athu ajah masang le athilbol ahet masanga themmo achansah ngaijem? ati.

⁵²Chuin amahon adonbutnun, ajah-a, Nang jong Galilee mi nahim? Holin lang, ven; ajehchu Galilee'a konin themgao asohdoh ngaipoi, atiuve.

⁵³Hichun amaho a-in cheh-a ache taovin ahi.