Read Thado Chin John 8 Bible Online

John 8 - Thado Chin bible

John 8

¹Jesu vang chu Olivet lhang lama achetan ahi.

²Chuin jingpitah-in houin'a ahung kittan ahile miho jouse ahenga ahungun, chuin ama atouvin, amaho chu thu ahilin ahi.

³Hichun danthu sunho le Pharisai hon ajon pettah-a kiman numei khat ahinkaijun, alai lungah adinsah-un,

⁴Jesu jah-a, Houhil, hiche numeinu hi ajon jeh-a kiman ahin, ajon pettah-a kimandoh ahi.

⁵ Hitobang hi songa selih ding Mosi'n danthua eipeh-u ahin, hijongle nangman iti nagelem? atiuve.

⁶Ama hehset theina amu nadinguva, apatepna-a hitia chu atiu ahi. Ahin athuseiju chu jalou bangin, Jesu akunin, akhut jungin tol ajihtai.

⁷Ahivangin amahon adong tei adong teijun ahile, ama adahdoh-in, ajah uva, Nalah uva chonsetna neilou penin amanu chu songin sep masapen hen, ati.

⁸Chuin akun kitnin, tol ajih kit tai.

⁹Chule chuche jahose chu, ase apha ahetnao vin mo achanun, alenpena pat alhumpen geijin, khat khatnin apotdoh gamtaovin; Jesu changseh le alailunga um numei bou chu aumtan ahi.

¹⁰Chuin Jesu adatdoh phatnin, numeinu tailou adang amutapon, amanu jah-a, numei themo nachanho hoilam hitaovam? Koiman themmo nachan lou hitam? ati.

¹¹Amanun, Pakai, koiman themmo eichantapoi, ati. Chuin Jesu'n ajah-a, keiman jong themmo kachanpoi; chetan, tukallin chonsekit tahih-in, ati.

¹² Chuin Jesu'n ajah uva thu asei kitnin, Keima vannoi vah kahi; kanung eijuija chu muthima chu vahle louva, hinna vah chu anei ding ahi, ati.

¹³ Hichun Pharisai hon, Nangman nangma thudol nahettohsah ahin, nathu hettohsah adihpoi, atiuve.

¹⁴Jesu'n adonbutnin ajah uva, Keiman keima thudol kahettohsah hijongle, kathu hettohsah adih ahi; ajeh chu keiman hoija hung kon kahile, hoi lama che ding kahi kahenai; nangho vangin hoija kona hung kahi, chule hoi lama che ding kahi nahepouve.

¹⁵Nanghon tahsa dungjuija thu natanjiu ahi, keiman koima thu katanpoi.

¹⁶Ahin keiman thu tan jeng jongleng, kathutan dihtah ahi; ajeh chu keima kachang kahipoi, keima kahin chule eihinsolpa ka Pa chu ahi.

¹⁷ Nadan lekha uva, mi ni thu hettohsah chu adih ahi, tin akisune.

¹⁸Keima thudol hettohsah kahin, chule ka Pa eihinsolpa chu keima thudol hettohsah ahi, ati.

¹⁹Hijeh chun amahon ajah-a, Napa hoija umham? atiuve. Jesu'n adonbutnin, Nanghon keima jong neihepouvin, ka Pa jong nahepouve; nanghon keima neiheleu chun, ka Pa jong nahet dingu ahi, ati.

²⁰Hicheng hi Jesu'n houin'a athuhil petna, sum kholna mun'a asei ahi; aphat alhin loulai jeh chun, koiman amanpouve.

²¹Hijeh chun Jesu'n ajah uva asei kitnin, Kache mang ding, chule nanghon neihol dingu, chule nachonset naova nathi dingu ahi. Kachena lama nangho hung thei pouvin nate, ati.

²²Hijeh chun Juda ho chun, Kachena lama nangho hung thei pouvin nate atin, ole ama kithat ding hikhat ham? atiuve.

²³Chuin aman amaho jah-a, Nangho noija kon nahiuvin, keima chunga kon kahi; nangho hiche vannoi'a mi nahiuve, keima hiche vannoi'a mi kahipoi.

²⁴Hiche jeh-a chu najah uva, Nachonset naova nathi dingu, kati ahi: kei hi ama chu kahi hi, natahsan louseuva nachonset naova nathi dingu ahi, ati.

²⁵Hijeh chun amahon ama jah-a, Nangma koi nahim? atiuve. Jesu'n amaho chu adonbutnin, Atila patna najah uva kaseiji chu ahi.

²⁶Thu nangho chungchang thudola seiding tamtah le thutan ding tamtah kaneije; ahinla eihinsolpa chu dihtah ahi; chule ama-a kona kajah chengse chu keiman vannoi jah-a kasei ahi, ati.

²⁷Aman Pa thudola asei ahi chu amahon ahedoh pouvin ahi.

²⁸Hijeh chun Jesu'n ajah uva, Nanghon Mihem Chapa hi nadop sang tengule, keima hi ama chu kahi, chule kachama ima kabol lou; ahivanga Pa'n eihil bang banga, hicheng kasei ahi hi nahet dingu ahi.

²⁹Chule keima eisolpa chun eiumpi nai; Pa chun ka changin eilhapoi; ajeh chu keiman alunglhaina lam jengbou kabol jingin ahi, ati.

³⁰Hiche thu chu asei phat chun mi tamtah-in atahsantai.

³¹Chuin Jesu'n Juda mi atahsanho jah-a chun, Nangho kathua hi naum jom jinguva ahile, kaseijui tahbeh nahiuve;

³²chule thutah chu heuvin natin, thutah chun nalhadoh dingu ahi, ati.

³³ Amahon adonbutnun ajah-a, Keiho Abraham son kahiuvin, chule imatih chanin koima soh-in kalut khapouve; ahin nakilhadoh dingu ahi, nati chu iti natiham? atiuve.

³⁴Jesu'n amaho chu adonbutnin, Tahbeh beh-a kaseipeh nahiuve, Koi hijongle achonse chan chu chonset soh ahi.

³⁵Chule soh chu a-imatih chanin ina achengjipoi; chapa vang chu a-imatih chanin in'ah achengji.

³⁶Hijeh-a chu Chapa chun nalhadoh vangule, chamlhat tahbeh ding nahiuve.

³⁷Abraham son nahiu chu kahenai; ahinla keima tha dingin neigouve, ajeh chu nalung sunguva kathun mun amupoi.

³⁸Keima ka Pa koma kamu chengse kasei ahi; nanghon na-pauva kona namu-u chengseu nabolu ahi, ati.

³⁹Amahon adonbutnun, ajah-a, Abraham kapau ahi, atiuve. Jesu'n amaho jah uva, Nangho Abraham chate hileu chun, Abraham thilbol nabol dingu ahi.

⁴⁰Ahinla tun keima, Pathen'a kona kajah thutah naheng uva seipa hi, tha ding nangai touve. Abraham hitihin achonpoi.

⁴¹Nanghon napau thilbol nabolu ahi, ati. Amahon ajah-a, Keiho jaocha kahipouve; Pa khat sehbou kaneijui, hichu Pathen ahi, atiuve.

⁴²Jesu'n amaho jah-a, Pathen napau hile keima neingailut dingu ahi; ijeh-inem itile keima Pathen'a kon hungdoh-a hunga kahi; keima kachama hung kahipoi; aman eisol ahibouve.

⁴³Nanghon ibola kathu nahet lou uham? Kathu hi nangai thei lou jeh-u ahi.

⁴⁴Nangho napau diabol'a kon nahibouvun, chule chuche napau lunggot chu suhbulhit dingbou nanomui. Ama chu atila patna tolthat ahin, chule thutah-a ding lou ahi; ajeh iham itile ama-a chu thutah umlou ahi. Aman thujou asei komle, ama chama aseiji ahi; ajeh chu ama mijou ahin, chule jou pa ahi.

⁴⁵Keima vangin thutah kasei jeh-a, neitahsan louvu ahi.

⁴⁶Keima hi michonse ahi tia photchetna pethei dinga nalah uva koi nahiuvem? Chule thutah kasei ahile ibola neitahsan lou uham?

⁴⁷Pathen'a kon chun Pathen thu angaije; hijeh-a chu nanghon nangai louvu ahi, ajehchu nangho Pathen'a kon nahi pouve, ati.

⁴⁸Chuin Juda hon adonbutnun, ajah-a, Nangma Samaria mi nahin, chule thilha vop nahi, katiu hi dih louham? atiuve.

⁴⁹Jesu'n adonbutnin, Keima thilha vop kahipoi; hinlah ka Pa kajabol ahin, nanghon keima neijabol pouve.

⁵⁰Chule keiman keima loupina ding kaholpoi; ahola leh thutan khat aumnai.

⁵¹Keiman nangho tahbeh beh-a kaseipeh nahiuve, Kathu nit chun itihchan hijongle thina amu lou ding ahi, ati.

⁵²Chuin Juda hon ajah-a, Thilha vop nahi tun kahe taove. Abraham athitan, chule themgaoho jongla athigam taovin; nangman, Kathu nit chun itihchan hijongle thina atepkhah lou ding ahi, nati.

⁵³Nangma athi tasa kapului'u Abraham sanga chungnungjo nahim? Chule themgaoho jongla athigam taovin; nangman koi kahi nakiti ham? atiuve.

⁵⁴Jesu'n adonbutnin, Keima chang kichoi-an kahile, kaki choi-atna chu imacha hilou ahi; ahinla nanghon ka Pathen ahi natiu, hiche ka Pa chun keima eichoi-at ahibouve.

⁵⁵Ahin nanghon ama nahepouve; hinlah Keiman vang ama kahei; keiman ama chu kahepoi tileng nangho banga mijou kahi ding ahi. Ahinla keiman ama kahei, chule athu jong kangaije.

⁵⁶Napuluiju Abraham chu keima nikho mu ding athanomin; chuin amun, akipah lheh jengin ahi, ati.

⁵⁷Chuin Judah hon ajah-a, Nakum kum somnga bon lhing lou laija, Abraham namu khah ham? atiuve.

⁵⁸Jesu'n ajah uva, Keiman nangho tahbeh beh-a kaseipeh nahiuve, Keima Abraham masang peh-a, Keima ana umsa kahi, ati.

⁵⁹Chuin Judah hon asena dingin song akilo taove; ahivangin Jesu akiselin, houin'a kon chun apot doh-in, alah tah-u ajotnin, chule achemang tai.