Read Thado Chin John 9 Bible Online

John 9 - Thado Chin bible

John 9

¹Chuin ache achele apena patna mi mitcho khat amun;

²Chuin aseijuihon adongun, Rabbi, hichepa apena mitcho-a apen hi, ama chonse-a ham, ole anu apa chonse-a ham? atiuve.

³Jesu'n adonbutnin, Ama chonse-a ahipoi, anule apa chonse-a jong ahipoi, hichea hi Pathen natoh kiphonna dinga ahibouve.

⁴Sun ahi petcha hi eisolpa na katoh ding hivehta. Koiman na atoh thei louna jan hung lhung ding hitahi.

⁵ Vannoi'a kaum laise-a hi vannoi vah kahi, ati.

⁶Hiche chu asei jouvin, tolah achil asetlhan, achil chun bonlhoh asemin, bonlhoh chu mitchopa mitna chun aloijin,

⁷Ajah-a, Chen, Siloam (sol tina ahin) twi kul-a gakiphet lhahtan, ati. Chuin ama achen, agaphet lhan ahile kho amun ahungtai.

⁸Chuin aheng akoma chengsele masanga amitchot musaho chun, Touva khutdojia chu ama hi hilouham? akiti taove;

⁹Abangin, Ama hi ahi, atiuvin; adang kimkhatsen, Ahipoi, ama chutoh abange, atiuvin; chuin aman, Ama chu kahinai, ati.

¹⁰Hijeh chun amahon ama chu adongun, Achutile i-atile namit hah hitam? atiuve.

¹¹Amapan adonbutnin, Jesu atipau khun bonlhoh asema kamitna aloija, Chenlang Siloam twikul'a gaphet lhan, eitia; chua kache-a kagaphet lhahle kho kamu ahitai, ati.

¹²Chuin amahon ama chu adongun, Ama chu hoija umtam? atiule, aman, Kahepoi, ati.

¹³Chuin amahon masanga mitchopa chu Pharisai ho henga apuitaovin ahi.

¹⁴Jesu'n bonlhoh asema amit ahasah ni chu cholngah ni ahi.

¹⁵Hijeh chun Pharisai hon jong, Kho iti namu kit-ham, tin adongun ahile, aman ajah uva, aman bonlhoh kamitna anun, hichu kaphet lhahle kho kamu jenge, ati.

¹⁶Hichun Pharisai ho kimkhatnin, Hichepa chu Pathen'a kon ahipoi, ijeh-inem itile cholngah ni anitpoi, atiuvin; kimkhat vang chun, Michonsen hitobang thil kidang abol thei ngaijem? atiuvin; hiti chun amaho lah-a chun akibung khentauve.

¹⁷Chuin amahon mitchopa chu adong kit leuvin, Aman namit hasahpa chu nangman ama chu koi ahi natim? atiule, aman, Themgao, ati.

¹⁸Ama mitcho ahia, kho amu kit thudol chu Juda hon, khomupa nule pa agakou masangseuvin, atahsan pouvin ahi.

¹⁹Chuin amahon amani chu adongun, Apena pat mitcho-a penga natiu nachapa lhon chu ama hi hinam? Ahile tu-a kho iti amuham? atiuve.

²⁰Anule apan adonbut lhonin, Ama hi kachapa lhon ahinai, apena mitcho-a penga ahi chu kahe lhone;

²¹Tu-a iti kho amuham vang kahe lhonpoi; chule kon amit ahasah ham jong kahe lhonpoi; ama dongun, upatah ahi, aman achungchang thu kisei nante, ati lhone.

²²Juda ho gina anule apan achuti sei lhon ahi; ajeh chu, Koi koi hijongle, Ama Christa ahi, tia seidoh chu kikhopna in'a kona nodoh ding, tia Juda ho amasanga dettah-a kihoulhua ahiuve.

²³Hiche jeh-a chu anule apan, Ama upatah ahi, ama dongun, ati lhon ahi.

²⁴Chuin amahon masanga mitchopa chu aniveina-in akouvun, Pathen bou vahchoijin, hichepa chu michonse ahi, ti keihon kaheuve, atiuvin ahi.

²⁵Chuin aman adonbutnin, Michonse ahi ahilou kahepoi; masang chun kamit achon tun kho kamui, hiche bou hi kahei, ati.

²⁶Amahon adong kitleuvin, Ama chun inalom? I aloa namit aboldam ham? atiuvin ahi.

²⁷Aman amaho chu adonbutnin, Ajouvin kaseitame, nangai hih-un; ibola najah nom kitleuvu ham? Nangho jong ama seijui nahi nom uham? ati.

²⁸Chuin amahon amapa chu ahouseuvin, Nangbou ama seijui nahi; keiho vang Mosi seijui kahibovui.

²⁹Pathen'in Mosi jah-a thu asei chu kaheuvin; hichepa vanghi hoilam kon ahi kahepouve, atiuvin ahi.

³⁰Amapa chun adonbutnin ajah uva, Hichu datmo aume, kamit hasahta-a ahivanga hoilam kon ahi nahet louvu chu.

³¹Pathen'in michonseho thu angaijipoi; Pathen houva le alunggot lama chonpa thubou angaije, ti iheuve.

³²Koiham khatnin apena mitcho-a penga amit ahasah-e, ti vannoi leiset um tila pat akijakha hihhele.

³³Ama Pathen'a kon hilou hile imacha abol thei louhel ding ahi, ati.

³⁴Amahon adonbutnun ajah-a, Nang napum changa chonsetna penga keiho neihilum? atiuvin anodoh taove.

³⁵Amahon ama chu anodoh taove ti thu Jesu'n ajan, chuin ama chu amun ajah-a, Nangman Pathen Chapa chu natahsan em? ati.

³⁶Aman adonbutnin Pakai, ama chu koiham, katahsan ding chu, ati.

³⁷Jesu'n ajah-a, Nangman ama namutai, chule najah-a thu seija hi, ama chu ahi, ati.

³⁸Chutah-in, Pakai, katahsane, atin ama chu chibai aboh tan ahi.

³⁹Chuin Jesu'n khomu louhon kho amuva, chule khomuho amitchohna dinguva, thutan dinga vannoi'a hi hunga kahi, ati.

⁴⁰Avela um Pharisai phabep hon chechu ajaovin, ajah-a, Keiho jong mitcho kahiuvem? atiuve.

⁴¹Jesu'n ajah uva, Mitcho hileu chun nachonset nao umlou ding ahin; tu vangin, kho kamui, nati jeh-u chun nachonset nao uma ahitai, ati.