Read Thado Chin Solchah 10 Bible Online

Solchah 10 - Thado Chin bible

Solchah 10

¹Caesaria-ah mi khat amin Cornelius atiu aumin, Italy loi [2] atiu sepai jalamkai ahin;

²Pathen ngaisahtah le a-insung mi jousetoh Pathen gingtah, miho ngailut thilpeh tamtah peji-a, chule Pathen henga tao jingjia ahi.

³Ni khat kolbunoi hon phat donin, Pathen vantil khat ahenga kichen tah-a gaova ahunga, Cornelius, ahung ti amun ahi.

⁴Chuin aman ama chu ave aven, akichan, Ipiham, Pakai, ati. Chuin ama chun ajah-a, Nataonaho le nami thilpehho chu geldoh jing dingin Pathen angah alhung toutai.

⁵Chule tun nangman Joppa-a mi solinlang, Simon amin chom Peter asah-u chu gakousah-in;

⁶Ama twikhanglen panga Simon atiu savun sem mi khat in'ah alhunge; aman ipi nabol ding nahil nan nate, ati.

⁷Chuin Cornelius jah-a thusei vantil chu achedoh phatnin, a-insung lhachaho lah-a mi nile ajenlea pang jingho lah-a Pathen ngaisahtah sepai khat akouvin,

⁸Thu jouse chu abonchan ajah uva aseisoh phatnin, Joppa-a asoltan ahi.

⁹Ajingin amaho ache acheuva khopi chu alhun ding konun, Peter chu tao dingin sunkim donin in chungah akaltouve.

¹⁰Chuin hatah-in agilkeltan an aneh nom-in ahi; ahinla aneh ding agotpeh laitah-un agaochangin;

¹¹Van akihona bom khat ponlhe lentah banga aning li-a kikhit, tolla ahung kikhai lhah amun;

¹²Asunga chun leiset chunga akengli sa namkim, tolla vah ganhing namkim, chule chunga leng vacha namkim aumin ahi.

¹³Chuin ahenga aw khat ahungin, Thouvin, Peter; kithanlang nen, ati.

¹⁴Ahivangin Peter'in, Chutiponte Pakai! ajeh chu keiman imatih chanin thilboh le athenglou kanekhapoi, ati.

¹⁵Chuin aniveina-in aw khat ahung kitnin, Pathen'in asuhthengsa chu nangman aboh ti hih-in, ati.

¹⁶Chuin hitichun thumvei ahung umin, bom chu van'ah akikhaitou kittan ahi.

¹⁷Chuin Peter'in agaochana amu chu ipi tina ahidem tia alunggim pettah chun, veuvin, Cornelius mi sol hochun Simon in ahin holun, kelkot phunga adingun;

¹⁸Chule akouvun, Simon amin chom Peter chu hikoma chu lhungam tin adongui.

¹⁹Chuin Peter'in agaochanna amu chu angaito pettah-in Lhagaovin ajah-a, Ven, mi thumin nahole.

²⁰Hijeh chun thouvin lang kumlha suh-in, lung sa-ih louhelin amaho khutoh lhonin; ijeh-inem itile amaho khu keima sol ahiuve, ati.

²¹Chuin Peter Cornelius-a kona ama henga hungkisol miho henga chun akumlha suh-in, Veuvin, naholu chu keima hi kahi; ibola hunga nahiuvem? ati.

²²Chuin amahon, Mi chondihtah, Pathen ging, Juda vaipin aseiphat, Cornelius sepai jalamkai chu nangma hung kousah-a a-in'a nathusei ngai dingin, Pathen'a konin vantil theng khatnin ahilin ahi, atiuve.

²³Chuin aman amaho chu akou lutnin alhunsahtai. Ajingin Peter amaho chutoh alhondoh-in, chule Joppa-a konin sopiho koi koihamin alhonpiuvin ahi.

²⁴Chuin ajingin Caesaria aluttaovin, chule Cornelius chun a-inkote le ajol agol chengse anakou khomin, amaho chu anangah jingun ahi.

²⁵Chuin Peter agalutnin ahile Cornelius'in agalamton, akengphang bulah aboh khupmin, ahoutan ahi.

²⁶Ahivangin Peter'in akaithouvin, Dingdoh-in, keima jong mihem kahibouve ati.

²⁷Chuin ama chutoh ahoulim lim pumin agalutnin ahile mi tamtah kikhom agamun ahi.

²⁸Chuin aman ajah uva, Juda min jat dang mi khat akiloipia, chule namdang henga ache chu dan ngai ahilou chu nanghon naheuve; ahinla Pathen'in keiman mi koima aboh le athenglou kati louna dinga eimusah ahitai:

²⁹Hijeh-a chu keima jong thupha louhela eikou nahinsolle kahung jeng ahi. Hijeh chun ipi dinga neihung kousah ham? tia kadoh nahi, ati.

³⁰Chuin Cornelius'in, Ni li masangin tuphat gei hin an kangol-in, chule kolbunoi honphat donin ka-insunga kataovin ahile, ven, ka-anga pon bang kisil mi khat ahung dingin;

³¹Chuin kajah-a, Cornelius, nataonaho kisanga ahitai, chule nami thilpehho jong Pathen mitmu-a geldoh jinga kineija ahitai.

³²Hijeh chun Joppa-a mi solinlang Simon amin chom Peter chu gakousah-in; ama twikhanglen panga savun sem Simon in'ah alhunge, ama chu ahungtengle nahil tante, eiti.

³³Hiche jeh-a chu nakou kahinsol pai jeng ahin, tun nangma nahungin aphalheh jenge. Hijeh chun tun Pathen nin nangma thu napeh ho chengse chu ngai dinga, Pathen mitmu-a kabon chaova hikoma kikhoma kahiuve, ati.

³⁴ Chuin Peter akamkan Tahbeh mongin, Pathen'in mi dat aneipoi, ti kahei;

³⁵Ahin namtin lah jouse-a mi koi hijongle ama ginga, chule chonphat bola chu ama dinga lah thei ahi.

³⁶Pathen'in Israel chate henga thu athot, Jesu Christa'a chamna thu alhangsap, (ama chu mi jouse Pakai ahi);

³⁷John'in alhangsap baptize chan nunga, Galilee'a kipanin Juda gam pumpi-a chalsoh thuhi nanghon naheuve.

³⁸Hichu hiti hi ahi, Pathen'in Nazareth Jesu chu Lhagao Theng le loupina-a thao anu ahin, ama muntin-ah avahlen, thilpha abollen, Satan bolgenthei hesohho abonchan aboldamin ahi; hichu Pathen'in aumpi jeh ahi.

³⁹Chule Juda ho khotin le Jerusalem'a athilbol jouse hetoh keiho kahiuve; ama chu thinga akhaijun athat taove.

⁴⁰Ama chu Pathen'in anithum nin akaithouvin, lhangphong tah-in akimusah tai;

⁴¹Mi jouse heng hilouvin, amasanga Pathen'in alhendoh ahetohho, athodoh nunga amatoh nekhoma donkhom keiho heng ahibouve.

⁴²Chuin, Ama chu ahingle athi thutan dinga Pathen'in atun ahi ti thu miho hille-a hetsah dingin eithupeh uve.

⁴³Ama min vanga, ama tahsan chan chu achonset suhbeija umding ahi, tia ama thudol chu themgaoho jousen ahettoh sah sohkeiju ahi, ati.

⁴⁴Chuin Peter'in thu chucheng asei pettah chun, athu jaho jouse chunga chun Lhagao Theng ahung chutan ahi.

⁴⁵Chuin cheptanho lah-a atahsanho Peter hinlhonpi chengse chun, Lhagao Theng kipe chu chidang namdangho chunga jong akibuh lhah jeh chun adatmo lheh jengui.

⁴⁶Ajehchu amahon paochom choma thu aseijuva, Pathen avahchoiju chu ajah-u ahi. Hichun Peter'in adonbutnin,

⁴⁷Eiho banga Lhagao Theng changa hiteho baptize chan louna dinga twi kham theija koi umam, ati.

⁴⁸Chuin aman Pakai mina baptize chang dingin amaho chu thu apetai. Chuin ni ijat-ham nichong dingin alhotauve.