Read Thado Chin Solchah 11 Bible Online

Solchah 11 - Thado Chin bible

Solchah 11

¹Chuin solchah ho le Juda gama um sopihon chidang namdang hon jong Pathen thu ajoptaove, ti ajataove.

²Chuin Peter Jerusalem agalhun touvin, cheptanhon ana-oimovin,

³Cheptan louho in'a nalutnin amahotoh nane khome, atiuve.

⁴Ahinla Peter'in abula panin abanchan ajah uva ahilchenin, hitin ati:

⁵Joppa kaumin kataovin, chuin gaochanin mu kaneijin, ponlhe lentah tobang bom aning li-a kikhit van'a konin ahung kikhailhan, keima komlele ahung geijin;

⁶ Chuin keiman hichu hoitah-a kavetna kangaitoa ahile, leiset chunga akengli saho, gamsaho, tolla vah akhupbo-a kithol, chule vanlaijola lengle vachaho kamui.

⁷Chuin kajah-a thusei aw khat kajan, Thouvin, Peter; kithanlang nen, eiti.

⁸Ahivangin keiman, Ahipoi, chutiponte Pakai; keiman imatih chanin thilbohle athenglou kanekhapoi, kati.

⁹Ahin aniveina-in aw chun van'a konin eidonbutnin, Pathen'in asuhthengsa chu nangman athenglou ti hih-in, ati.

¹⁰Chuin hitichun thumvei akibolin, abonchan van'ah akikhaitou kit tai.

¹¹Chuin veuvin, Caesaria kona kahenga hinkisol mi thum chu, kaumnao in kot maija anading jinga ahitaove.

¹²Chuin Lhagaovin koima dat bih nei louva amaho chutoh lhon dingin eisole. Hiche sopiho gup jong hin eilhonpiuvin, chuin mipa ina chun kalutnun ahi.

¹³Chuin amachun a-in'a vantil adin amua ajah-a, Joppa-a mi solinlang, Simon amin chom Peter chu gapuisah-in;

¹⁴Ama chun nangmale na-insung mi jouse huhhing-a naumna dingu thu naseipeh ding ahi, tia asei umchan chu kajah uva, aseije.

¹⁵Chuin thu kagah sei patna ahile, atila eiho chunga achuh bang chun Lhagao Theng achunguvah ahung chutai.

¹⁶Chuin keiman Pakai thusei, John'in twija baptize achansahji ahin, nangho vang Lhagao Thenga baptize nachan dingu ahi, ati chu kagel doh-e.

¹⁷Chutichu ahin, Pakai Jesu Christa itahsan uva eiho eithilpeh banguva chu amaho Pathen'in apehtah-a ahile, kei koi kahia Pathen kakham thei dingham, ati.

¹⁸Chuin amahon thu chucheng ajah phatnun athip taovin, Pathen avahchoijun, chuti ahile Pathen'in chidang namdangho jong hinna dinga lungheina aphalpeh ahitai, atiuve.

¹⁹ Hijeh chun Stephen chunga hesoh genthei ana sohdoh jeh-a vahcheh hochu Phoenicia, Cyprus chule Antioch geijin acheuvin, koima dang henga sei louhelin Juda ho heng jenga thu chu aseiletaovin ahi.

²⁰Ahivangin alah uva mi abang chu Cyprus le Cyrene gam mi ahiuvin, Antioch alhunun Greek miho henga jong thu aseijun, Pakai Jesu asei phongle taove.

²¹Chule Pakai khut chun akithopiuvin; chuin atahsana mi atama tam Pakai henglama akihei taove.

²²Chuin amaho umchan thu chu Jerusalem'a um houbung mihon ajataovin; chuin amahon Barnabas chu Antioch geija che dingin asolun ahi.

²³Chuin ama chu alhunin, Pathen milungset chu amun ahile akipah-in; chuin amaho chu Pakaiya abechah jingna dingu lung ngaiton, abonchauvin atilkhouvin ahi;

²⁴Ijeh-inem itile ama chu mipha ahin, Lhagao Theng le tahsanna-a dimset ahi; chuin miho atama tam Pakaiyah alutbe taove.

²⁵Chuin ama Saul hol dingin Tarsus kho-a achen;

²⁶Chuin amudoh phatnin, Antioch-a chun ahinpuitai. Chuin ahitin ahi, kum khatjen houbung ho chutoh akikhomji lhonin, mi tamtah ahilji lhonin ahi. Chule Antioch-a chu seijui ho Christian tia kikou masapen ahi.

²⁷Chuin hiche lai chun themgao koi koiham Jerusalem'a konin Antioch-a ahungun ahi.

²⁸ Chuin alah uva khat amin Agabus chu adingdoh-in, Lhagaovin aphondoh-a konin vannoi gam jouse chunga kel lha ding ahi, ati; hichu Claudius Ceasar nikho laijin aguilhungin ahi.

²⁹Chuin seijui ho chun ajokham cheh-a Judea gama cheng sopiho chu huna thot dingin akilol taovin;

³⁰Hichun boljong abolun, Barnabas le Saul khutna upaho agahthot taove.