Read Thado Chin Solchah 12 Bible Online

Solchah 12 - Thado Chin bible

Solchah 12

¹Chuin hiche lai vel chun Herod lengpan houbung ho lah-a phabep bolset dingin agon, akhut alamtan ahi.

²Chuin John upa Jacob chu chemjamin athat tai.

³Hiche abolchun Judah ho alunglhaisah chu amun, Peter jong chu amatbetan ahi. (Hiche lai chu cholsolou changlhah kut lai ahi).

⁴ Chuin ama chu amanin, songkul'a akhumin, angah dingin sepai loi li hochu apedoh-in; kalchuh kut joule miho henga puidoh ding alung got ahi.

⁵Hiti chun Peter chu songkul'a akhumun angahtauve: ahin houbung min ama ding chun Pathen henga lunglut tah-in ataopeh-un ahi.

⁶Chuin Herod chun kaidoh dinga agot jantah chun, Peter sepai ni kah-a thihkhao ni-a kihena imua ahin; angahho jong chu kotbula dinga songkul chu ngah jinga ahiuve.

⁷Chuin veuvin, Pakai vantil khat akoma ahung dingin, chule vah khatnin aumna mun chu asalvah-in; chuin ama chun Peter chu apang abengin, asukhangin, Thoudoh loijin, ati. Chuin akhutna konin akihena thihkhaoho chu akhelha tan ahi.

⁸Chuin vantil chun ajah-a, Nakong kigeh-inlang, nakengchot kisen, ati. Chuin aman hitichun aboltai. Chuin ama chun ajah-a, Napon kisilin kanung hinjuijin, ati.

⁹Chuin ama apotdoh-in ajuitai; hichu vantil'in abol tahbeh ahi chu he louvin, gaochana mu nei jin akingaiton ahi.

¹⁰Chuin amanin kot ngah masale anina akhel lhona, khopi sunglam jotna-a thih kot phung chu agei lhon phatnin, kot chu amani ding chun achamin akihong jenge: chuin achedoh lhonin khosung lamlen khat ajot lhung lhonin; chule chua konchun vantil chun ama adalha tan ahi.

¹¹Chuin Peter akhahdoh phat chun, Pakaiyin avantil ahinsola, Herod khutna konle Juda mite kinepna jouse-a kona eihuhdoh ahi ti tun chentah-in kahetai, ati.

¹²Chuin akingaito jouvin mi tamtah akikhop uva ataonao Mark atiu John nu Mariam in'a chun agachen ahi.

¹³Chuin Peter'in hongcha kot akiuvin ahile, nungah khat amin Rhoda atiu chu adonbut dingin ahunge.

¹⁴Chuin aman Peter aw ahi ahet phatnin, akipa manin kot hongta louvin alhai lutjelin, Peter kot phunga adin chu aga seije.

¹⁵Chuin amahon amanu jah-a, angola nahi, atiuve. Ahivangin, Aman ahimonge, ati changsalin ahi. Chuin amahon, a-vantil hichu, atiuve.

¹⁶Ahivangin Peter'in akiu akiuvin; amahon kot chu ahonule ama amuvin, adatmo lheh jengui.

¹⁷Ahivangin aman athipbehna dingun akhutnin ajapmin, Pakaiyin songkul'a kona ahin puidohje umchan chu aseitan ahi. Chuin, hiche thuho hi jacob le sopiho seipeh-un, ati. Chuin ama apotdoh-in mun danga achetai.

¹⁸Chuin khovah vah-in, sepaiho chu, Peter hoija um hitam, atiuvin lungjin mainah-in alung jing pouve.

¹⁹Chuin Herod chun aholin amutapon ahile, angahho chu achunguva thu atanin, amaho chu tha dingin thu apetai. Chuin ama Juda gama konin Caesaria ache suh-in, chukoma chun aumdentai.

²⁰Hiche laija chu Herod Tyre le Sidon miho chunga ha lunghana lunghanga ahin; ahivangin amaho thu khat akisauvin, ahenga acheuvin, lengpa insung vaihom amin Blastus chu akihouthei piuvin, kichamna ding athumui; ajeh chu lengpa gama kona amaho gama anneh hungji-a ahi.

²¹Chuin akinitep niuvin, Herod chu leng vonin akivonin, alal touna-a atouvin ajah uva chun thu aseijin ahi.

²²Chuin miho chun, Mihem awso ahipoi, pathen awso ahi, tin asamui.

²³Chuin aman loupina chu Pathen apeh lou jeh chun, Pakai vantil'in chupettah chun adengin ahile, lungin anen athi tai.

²⁴Pathen thu vang chu achal jal-in, akhangtou chehchehtai.

²⁵Chuin Barnabas le Saul akin lhon achai phat lhonin, Jerusalem'a konin akile lhonin, John amin chom Mark chu apui lhone.