Read Thado Chin Solchah 13 Bible Online

Solchah 13 - Thado Chin bible

Solchah 13

¹Chuin Antioch houbung'a chun themgaole mihil phabep aumun, amahochu: Barnabas, Niger atiu Simeon, Cyrene mi Lucius, Herod lengpa toh kivahdoh tha Manahen, chule Saul ahiuve.

²Chuin amaho chu Pakai lhachale-a apanuva an angol laijun Lhagao Thengin, Kakouna natong dingin Barnabas le Saul neise khenpeh-un, ati.

³Chuin an ngola atao jouvun, achung lhona akhut angamun asoldoh taove.

⁴Chutichun Lhagao Theng soldoh-in amani Seleucia achesuh lhonin; chuin chua kon chun Cyprus lama akitol lhontai.

⁵Chuin Salamis kho alhun phat lhonin, Juda ho kikhopna inho-a chun Pathen thu ahillhangle lhontai. Amanin akithopi lhon dingin John jong akipui lhone.

⁶Chutichun twikol gam sung chu Paphos geijin achonsoh lhonin, Bar-Jesu atiu Juda mi, mitpheldoi choile, themgao lhem khat amudoh lhone.

⁷Ama chu milung ching, twikol gamvaipo Sergius Paulus chutoh uma ahi. Gamvaipo chun Saul le Barnabas akouvin Pathen thu chu ngai ding agotan ahi.

⁸Ahivangin mitpheldoi choipa Elymas chun (hichu amin kiledohna ahi) gamvaipo chun atahsan louna dingin, amani chu adoudalin ahi.

⁹Chuin Saul'in, (Paul jong akitin,) Lhagao Thenga dim pumin ama chu ave aven,

¹⁰Vo nangma jouva lheplhah le minambol dimset diabol chapa, chonphatna jouse melmahpa, nangin Pakai lampi dihho akaleh-a hei natat lou ding ham?

¹¹Chule tun, ven, Pakai khut nachunga achui; chule phat chomkhat sung nisa mu louva mitcho-a naum ding ahi, ati. Chupettah chun meijinle muthim achunga ahung chupai jengin; chuin aman akhutna kai ding mi ahol letai.

¹²Chutah-in gamvaipo chun thil kibol umchan chu amu phat chun, Pakai thuhil chu kidang asa lheh jengin atahsantai.

¹³Chuin Paul aloihotoh Paphos'a konin akitolun, Pamphylia gama Perga alhung taove; chuin John'in amani adalhan Jerusalem lama akile kit tai.

¹⁴Amani vang chu Perga'a konin achepeh lhonin, Pisidia gama um Antioch alhung lhonin; chuin cholngah nin kikhopna in'ah alut lhonin atou lhontai.

¹⁵Chuin danthu le themgaoho thu asim jouvin, kikhopna in vaihomhon akom lhona mi asolun, agahseijun, Sopiteni, miho-a dinga tilkhouna thu ima nanei lhonle sei lhonin, atiuve.

¹⁶Chuin Paul adingin akhut ajah-in thu aseijin, Vo Israel miho, chule vo Pathen gingho, ngaijun:

¹⁷ Hiche Israelte Pathen hin ipu ipateu alhengin, amaho Egypt gama apem laiju chun amite chu achoisangin, chuin aban thahat chungnungin amaho chu ahin puidohtan ahi.

¹⁸ Chuin kum somli jen gamthipma achonnau chu ana thoh hamhamin;

¹⁹ Chuin Canaan gama vaipi sagi asumangin, amaho gam chu alo dingun ahop pehtan ahi.

²⁰ Chuin hiche jou chun kum ja lile kum somnga sungin, Samuel themgao nikho lai gei chun thutan vaihomho apejin ahi.

²¹ Chuin amahon leng athumun ahile Pathen'in amaho chu Benjamin phunga Kish chapa Saul apen, kum somli geijin akoije.

²² Chuin aman ama chu achon mangin, aleng dingun David atungdohtai; ama thudol chu ahettohsah-in, Keiman keima lungdoltah mi khat, Jesse chapa David kamudohtai; ama khun kalunggot jouse abol bulhit ding ahi, ati.

²³Chuchepa sonho lah-a chun Pathen'in thutep dungjuijin Israelte hengah Huhhing-a khat, Jesu chu ahinlhut tai.

²⁴Ama hung masangin John'in Israel miho jah-a lungheija baptize chan ding thu ahillhang tan ahi.

²⁵John'in anatoh achaiding konin, Nanghon keima koi kahia neingai touvem? Keima ama chu kahipoi. Ahin, kanunga mi khat ahunge; keima akengchot sutlham dinga jong kilom kahipoi, ati.

²⁶Vo miho chule sopiteho, Abraham chateho, chule nalah uva Pathen gingho, hiche huhhingna thuhi nangho henga hinkithot ahi.

²⁷Ijeh-inem itile Jerusalem'a chengho le avaipoteuvin ama chu ahetlou jeh-ule, cholngah niseh-a kisimji themgaoho thu ahettoh lou jeh-un, hiche thu chu bulhitnan ama chu themmo achansah taove.

²⁸ Chule athina thei ajeh aholmosan jongun, Pilate henga athana ding athumui.

²⁹ Chuin aumchan ding thudol kisun masa jouse chu asuh bulhit sohkei phatnun, thing chunga konin alalhauvin, lhanah alupsah taove.

³⁰Ahivangin Pathen'in ama chu athi lah-a konin akaithou tai.

³¹ Chuin Galilee'a kona Jerusalem geija alhonpiho chun ni tamtah geijin amu jingjiuvin, amaho tulaija miho henga athu hettohsah-a pangho hi ahiuve.

³²Chule ipu ipateu henga thutep thudola Kipana Thupha chu keihon nangho kahung hetsah nahiuve;

³³ Pathen'in Jesu akaithouva kona achateu eiho dinga thutep chu amolso ahitai. Chujongle hiche thudol hi Labu bung nina-a jong, Nangma ka-Chapa nahi, tunia hi kahin nahi, tin akisune.

³⁴ Aman monmang na-a kilekit talou dinga athi lah-a kona akaithou ding thudol chu, hitin aseije, David phattheina thon loule athenga chu keiman nangho kapeh dingu nahiuve, ati.

³⁵ Hijeh chun aman Labu mun danga, Namitheng chu mon mangna namusah lou ding ahi, ati kitleuve.

³⁶Ijeh-inem itile David chun Pathen lungdei bangin ama khanga miho ding na atoh jouvin, a-imu miltan; chuin apu apate koma alupsah-un ahile mon mangna chu amutai.

³⁷Ahin Pathen'in akaithoupa vang chun mon mangna amupoi.

³⁸Hijeh chun hiche hi heuvin, miho chule sopiteho, Ama vanga chu chonset ngaidamna thu najah uva kiseija ahi.

³⁹Koi hijongle atahsan chan chu Mosi danthua them nachan jou lounao imajousea kona, ama vanga chu them changa ahi.

⁴⁰Hijeh chun chingtheijun, achuti loule ajole themgao thusei ho chu nachung uva lhungkha getninte;

⁴¹ Vo nahsahmoho, nanghon veuvin. Kidang saovinlang mangthah-un; nanikho laijun thilkhat kabole, hiche thil chu min seipeh jongleu chun natahsan louhel dingu ahi, ti hi, ati.

⁴²Chuin Juda ho chu kikhopna in'a kona apotdoh phatnun, chidang namdangho chun cholngah nikit jongle chuche thuchu aseipeh kit diuvin ajolun ahi.

⁴³Chuin akikhomho chu akikhen phatnun, Juda mi tamtah le Juda houva lut Pathen ngaisahho lah-a mi tamtah-in Paul le Barnaba nung ajuitaove; chuin amanin amaho chu ahoulimpi lhonin, Pathen lungsetna-a umdet jing dingin atilkhou lhontai.

⁴⁴Cholngah ni kitnin akhopi pumpiuvin Pathen thu ngai dingin akikhom taove.

⁴⁵Ahivangin Juda hon mipi chu amu phatnun athangseuvin, Paul thusei chu adoudalun, ataitomun, chule anelkal taove.

⁴⁶Chuin Paul le Barnaban hakattah-in, Pathen thuhi nangho henga sei masah ding dol mong ahin; ahivangin nanghon napam paijuva, tonsot hin kemlou changa kilom louva nakigot jeh-u chun, veuvin, chidang namdangho henga kakiheiju ahitai.

⁴⁷ Ijeh-inem itile Pakaiyin hiti hin keiho thu eipeuve, Vannoi leiset kolmong geija sochatna hi dinga, Keiman nangma chidang namdangho salvah-a kapansah nahi, ati tin asei lhontai.

⁴⁸Chidang namdang hon hichu ajah phat uvin akipah athanomun, Pakai thu chu achoi-an taove, chule tonsot hinkemlou chang dinga gotsa um chengse chun atahsan taove.

⁴⁹Chuin Pakai thu chu chuche gamkol sungse-a chun achalsohtai.

⁵⁰Ahivangin Juda hon Pathen ngaisah numei lal hole, khopi sunga pipuiho atilseuvin, Paul le Barnaba chu abolsetsah-un, agamgi sunguva konin adelmang taove.

⁵¹ Chuin amanin amaho douna-in akengphang lhona leivui athinglha lhonin, Iconium kho lama ache lhontai.

⁵²Chuin seijui ho chu kipana le Lhagao Thengin adimset taove.