Read Thado Chin Solchah 14 Bible Online

Solchah 14 - Thado Chin bible

Solchah 14

¹Chuin Iconium kho-a chun ahitin ahi, amani Juda ho kikhopna in'a alut lhonin, thu asei lhonin ahile, Juda miho le Greek mi atama tamin atahsan jengtan ahi.

²Ahivangin thua nunglou Juda hochun chidang namdangho atilseuvin, sopiho chu amuda sah taove.

³Hijeh chun sottah aum lhonin, alungsetna hettohsah-a akhut lhona thil kidangle melchihna bolsah Pakaiya chun hakattah-in thu aseiji lhonin ahi.

⁴Hichun khopi-a mipi chu akikeh khenun, akimkhat Juda ho lama, akimkhat solchah ho lama apangtauve.

⁵Chuin chidang namdangho le Juda hon avaipohou to kitho-a amani chu nahsahmo-a bola songa seding agouvin ahile,

⁶Hichu amanin ahedoh lhonin, Lycaonia gama Lystra le Derbe kho, chule akimvelah-a ajam lut lhonin,

⁷Chua chun Kipana Thupha agahil lhangle lhontai.

⁸Lystra kho-a chun imatih chana lamjot lou, akenga tha himhim umlou, apena elbaija peng khat atouvin, Paul thusei angai jingin ahi.

⁹Chuin aman ama chu ave aven, boldama aum ding atahsan chu ahen,

¹⁰Hatah-in asamin, Nakengin pansan ding jangin, ati. Chuin ama akichomin adingin lam ajottai.

¹¹Chutah chun mipi chun Paul thilbol chu amu phatnun, Lycaonia paovin, pathenho mihem lima ihenguva hung kumlha ahiuve, atitaove.

¹²Chuin amahon Barnaba chu Jupiter [3] asah-un, chule Paul chu thuseija apipui ahi jeh chun Mercury [4] asah taove.

¹³Chuin khopi kotmaija a-houin uma Jupiter hou thempupa chun bongchal le pahchavui kotpi phunga ahin choijin, mipi chutoh amani houna-a chu tha dingin agotauvin ahi.

¹⁴Ahivangin solchah teni, Barnabas le Paul chun hichu ajah lhon phatnin, apon asat-eh lhonin, mipi heng lama chun alhaijel lhonin, asam lhonin,

¹⁵ Vo miho, ibola hitobang hi nabol uham? Keini jong nang hotoh kithakhat mihem kahilhon bouve; chule hiti mohthil ho-a kona hi vanle lei twikhanglen chule asunga thil um jouse sema Pathen hing henga nakiheina dinguva, Kipana Thupha kahung lhutpeh nahiuve.

¹⁶Hiche Pathen chun malaija chu namtin vaipi jouse hi aningnop cheh-a analhatsah ahi.

¹⁷Ahivangin ama hettohsahna beijin anaumpoi, Hitichun phatna abol jingin, van'a kon gotwi le ima ga phatle anneh eipeuvin, ilungthimu kipa thanop na-in adimsahjin ahi, ati lhone.

¹⁸Thu hicheng chu asei lhona konchun, nah nah-in amani houna-a gan tha ding go-a mipi chu akham jou lhonin ahi.

¹⁹Chuin Antioch le Iconium'a konin Juda mi phabep hilama chun ahungun, mipi ho chu atilseuvin, Paul chu songin asesah-un, athi ahitai tin, khopi pam lama akaidoh taove.

²⁰Ahivangin seijui ho akimvela adin pettah-un, ama athoudoh-in, khopi sungah aluttai. Chuin ajing nikhon Barnabas toh Derbe jondin akipatdoh lhontai.

²¹Chuin amanin chuche khopi-a chu Kipana Thupha ahillhangle lhona, mi tamtah ahil lhon jouvin, Lystra, Iconium, chule Antioch lama akile kit lhonin,

²²Genthei hesoh tamtah thoh-a Pathen lenggama ilut dingu ahi tin seijui ho chu tahsana aumdet jing dingun thu ahil lhonin, alungu aphut detpeh lhontai.

²³Chule amanin houbung tina upaho apansah lhona, an angola atao jouvun, atahsanpao Pakai henga chun amahochu apedoh lhontai.

²⁴Chuin Pisidia gam achonsoh lhon phatnin, Pamphylia'a ache lhonin,

²⁵Perga-a thu ahil lhon jouvin, Attalia lama ache lhontai.

²⁶Chuin chua kon chun kongin akitol lhonin, ahin tohchai lhon chu tong dinga Pathen lungsetna-a akipehdohna lhon Antioch kho-a chun ache lhontan ahi.

²⁷Chukom alhun lhon phatnin, houbung miho akhom lhonin, Pathen'in amani mangcha-a athilbol jouse le chidang namdangho dinga tahsan kot ahonpeh umchanje chu ahetsah lhontan ahi.

²⁸Chuin amani chu seijui ho toh sottah aumkhom lhontai.