Read Thado Chin Solchah 15 Bible Online

Solchah 15 - Thado Chin bible

Solchah 15

¹ Chuin Juda gama konin mi phabep ahungsuh-un, Mosi chonna danthu peh dungjuija chep natan louvule huhhing-a naumthei lou dingu ahi, atin sopiho ahung hilun ahi.

²Hijeh chun Paul le Barnabas chu amahotoh hatah-in akinel baotam jingtaovin ahile, hiche thudola chun Paul le Barnabas chu alah uva mi phabep toh Jerusalem'a solchah ho le upaho henga gacheuhen tin thu alhuhsah taove.

³Chuin houbung mihon amaho chu agathah-un ahile, amahon Phoenicia le Samaria gam ajotpeh-un, chidang namdangho lunghei thu chu aseijun, sopite jouse abonchauvin hapan akipasah taove.

⁴Chuin Jerusalem alhunun, houbung le solchah ho, chule upaho chengsen amaho chu anasangui; chuin Pathen'in amani mangcha-a thil abol umchan chu asei lhontan ahi.

⁵Ahivangin atahsana Pharisai loi koi koiham akipat doh-un, hiche miho chu thonmo-a cheptana, chule Mosi danthu peh nitsah ding ahi, atiuve.

⁶Chuin solchah ho le upaho hiche thu ngaito ding chun akikhom taove.

⁷ Chuin tamtah-in akinelun ahile, Peter akipatdoh-in ajah uvah, Miho chule sopiteho, chidang namdang hon keima kama kona kipana thupha ajah uva atahsanna dingun, masangpeh chun Pathen'in eiho lah-a keima eilhengdoh chu nanghon naheuve.

⁸ Chule milungsung he-a Pathen'in eiho eipeh bangun, amaho jong chu Lhagao Theng apen, amaho chu ahettoh sahtan;

⁹Chule eihole amaho kah-a dat nei louvin, tahsan vangin alungsungu asuthengin ahi.

¹⁰Chutichu ahile ipi dinga ipu ipateovin jong, eiho jengin jong nipoh jou louvu namkoljon chu seijui ho lenga naseuva Pathen napatepmu ham?

¹¹Ahin amaho bang chun eihon jong Pakai Jesu Christa lungset vanga huhhing-a umding itahsan ui, ati.

¹²Chuphat chun mipi chu athipbeh-un, Barnabas le Paul'in Pathen'in amani amanchah-a, chidang namdangho lah-a melchihna le thil kidang dang abol thu asei lhon chu angaijun ahi.

¹³Chuin athusei athiplhon phatnin Jacob'in adonbutnin, Miho chule sopiteho, kathusei ngaijun;

¹⁴Pathen'in amasa-a chidang namdangho avila, alah uva kona ama min pudin mi alhendoh thu Simon'in aseitai.

¹⁵Chule hiche hi themgaoho thuhotoh akitoh-e,

¹⁶ Hicheng nung chule keima kakinungle kitna, David houbuh alhusa chu kasahphat ding, Asekom jouse kasah phat kitna, Chule katundoh ding ahi.

¹⁷Mi amoh chengse, chule chidang namdang kamina kikouho jousen Pakai chu ahol ding ahi, tin, hicheho jouse bolla Pakai chun aseije.

¹⁸Leiset kisem tilla patna anatohho jouse Pathen hetnin aumme.

¹⁹Hijeh chun hitin kangaitoi, chidang namdangho lah-a Pathen henga kiheiho chu bol genthei pouhite;

²⁰ Ahin milim houna thilboh neh, jonthanhoi, chule alol kimeh-a kithat saneh, chule thisan neh, hichenga kona chu akikangsena dingun sunjo leuhen kati.

²¹Ajehchu masang laija patnin Mosi'n khotinah athu hillhangle aneijin, cholngah niseh-in houin'a asimji naove, ati.

²²Chuin solchah ho le upahon houbung pumpi chutoh, alah uva mi lhendoh-a Paul le Barnabas toh Antioch-a sol ding pha asauvin, sopite lah-a apipu Barsabas atiu Juda le silas alheng doh-un;

²³Chuin hiti hin lekha asunun, amaho khutna chun athot taove: Solchah ho, upaho, chule sopite jousen, Antioch, Syria, chule Cilicia gama um chidang namdang sopiho kasalamui.

²⁴Kalah uva konin koi koiham ahungun, chep natandiu chule dan ho nanit teidiu ahi, ahungtiuvin; thun nahung sulung jingun, nalungu asuchavaijui ti kanajaove; amaho chu keihon thu kapepouve;

²⁵Hijeh chun lungkhat pu-a kaki khopmu tolhonin, mi lhendoh-a, ideitah-u Barnabas le Paul,

²⁶Pakai Jesu Christa min jala ahinkho settoh jinga um teni toh naheng uva hinsol ding pha kasaovin ahi.

²⁷Hijeh chun Judas le Silas kahinsol uvin; amanin jong hiche thu mama hi kamcheng tah-a nahil dingu ahi.

²⁸Ijeh-inem itile Lhagao Thengin pha asan, keihon jong pha kasauve, hicheng akhohlai chengse tailou hi pohgihsa dang pohsah lou ding katiuve;

²⁹Nangho milim houna sa neh, thisan neh, alol kimeh-a kithat sa neh, chule jonthanhoi, hichenga kon hin kikangseleu chun katiuve; hichenga kon chun kikangseleu chun nangho dinga phading ahi. Anadamselun.

³⁰Chuin amaho chu asoldoh phatnun, Antioch'a ahungsuh-un ahi: chuin mipi chu akhopkhom phatnun, lekhathot chu apedoh taovin ahi.

³¹Chuin amahon hichu asim jouvun, lungmonsahna thu jeh chun akipah taove.

³²Chuin Judas le silas chun, (amani jong themgao ahi lhonin,) amanin jong thu tamtah-in sopiho chu alungmonsah lhonin, aphutdet lhonin ahi.

³³Chuin chua chu chom khatset aum jou lhonin, solchah ho henga ding chun sopihon lung mongin alhadoh taove.

³⁴Ahin silas vang chu chukoma umden ding anomin ahi.

³⁵Paul le Barnaba jong chu Antioch kho-a chun aumden lhonin, mi tamtah toh, Pakai thu chu ahil lhonin aseiphong lhontai.

³⁶Chuin ni phabep jouvin Paul'in Barnabas jah-a, Chen, Pakai thu ihilna khopiho chenga chun chehitin sopite gakimutopi hitin, iti um naovam gavehite, ati.

³⁷Chuin Barnabas'in Mark atiu John jong chu puiding lung angaiton ahi.

³⁸ Ahivangin Paul'in Pamphylia'a amani dalha-a, chule amanitoh lhona natonga cheta lou chu puiding pha asapon ahi.

³⁹Chuin akihanel ten taovin ahile, khat le khat akikhenlo taovin ahi; chuin Barnabas'in Mark chu akipuijin kongin kitolin Cyprus lama achetai.

⁴⁰Chule Paul'in silas akilhen doh-in, Pathen lungsetna-a sopite phatseina to thon akipatdoh tai.

⁴¹Chuin Syria gam le Cilicia gam ajotpeh-in, houbung ho aphutdet pehtai.