Read Thado Chin Solchah 16 Bible Online

Solchah 16 - Thado Chin bible

Solchah 16

¹Chuin ama Derbe le Lystra alhungin; chuin veuvin, chu koma chun seijui khat amin Timothy kiti khat aumin, amachu atahsana Juda numei khat chapa ahin, apa vang chu Greek ahi.

²Ama chu Lystra le Iconium'a um sopihon aseiphat lhehjengu ahi.

³Paul'in ama chutoh lhondoh ding lung angaito jehchun, apuijin chuche dunga um Juda ho jeh chun achep atanin ahi; ijeh-inem itile apa Greek ahi chu abonchauva ahetsoh keiju ahi.

⁴Chuin amaho akho akhoa avahle avahleuvin, Jerusalem'a um solchah ho le upaho phudoh thupeh chu anit dingun asei phongle taove.

⁵Chutichun houbung ho chu tahsana-a akiphut detnun, niseh-in amijat apung chehcheh tan ahi.

⁶Chuin Phrygia le Galatia gam achotsoh phatnun, Lhagao Thengin Asia gama thu agalhangsap dingu akhamin,

⁷Chuin Mysia kom ageijun Bithynia lut akigouvin, ahinla lhagaovin ajahnom pouvin ahi.

⁸Chuin chutichun Mysia ajotpaijun, Troas kho ajonsuh taove.

⁹Chuin jan-in Paul'in mu aneijin, Macedonia mi khat adingin ahenga ataovin, Macedonia hung galkaijin lang neihung panpiuvin, ati.

¹⁰Chutichun aman mu anei phat chun, Pakaiyin amaho chu Kipana Thupha hil dinga eikouvu ahi ti kaheuvin, chupettah chun Macedonia gama che ding kasompai taove.

¹¹Hijeh chun Troas'a konin kongin kakitolun, jangkeijin Samothrace kajon-un, chuin ajingin Neapolis kalhungun,

¹²Chuin chua kon chun Philippi kalhungui; hichu Macedonia gamkol sunga khopi lenpen ahin, Rome miten alo-u khopi ahi. Chuche khopi-a chun ni ijat-jen ham kaumui.

¹³Chuin cholngah nin kulpi kot polama lui pangah, angaija taona kiman jina mun'a chun kacheuve; chuin kataovun, numei hung kikhomho jah-a chun thu kaseitaove.

¹⁴Chuin amin Lydia atiu, ponsandup joh numei khat, Thyatira khopi-a kon, mi Pathen hou ahin, amanu chun kathuseiju ajatan; chuin Paul thusei ho chu lunglut tah-a angaina dingin Pakaiyin alung kot ahonpehtan ahi.

¹⁵Chuin amale a-insung mite baptize achan jouvun, Pakai tahsan tahbeh-a neingaitou ahile, ka-in'ah hung lhungun, tin eijolun, kacham louhelun eilhunsah taove.

¹⁶Chuin ahitin ahi, taona mun'a chu kacheuva ahile lhagao vop soh nungah khatnin eikito piuvin; ama chun khonung thusoh ding aseija, a-pakaite chu aphatchom sah lheh jeng ahi.

¹⁷Ama chun Paul le keiho eijuile eijuileuvin, Hiteho hi chungnung pen Pathen sohte ahiuvin, sochatna lampi nahung hilu ahi, atin asam asamjin ahi.

¹⁸Amanu chun chutia chu ni tamtah abol ahi. Ahin Paul alung phamon, akiheijin lhagao jah-a chun, Jesu Khrista mina amanu sunga kona chu hungdoh dinga kathupeh nahi, ati. Chuin chupettah chun apotdohpai jengtan ahi.

¹⁹Chuin apakaite chun phatchom ding akinepnao abeitai ti ahetdoh doh-un, Paul le Silas chu amanun, kailhang-ah vaipoho hengah akaijun,

²⁰Chuin thutan vaihomho henga ahin puijun, Hiteni hi Juda mi ahi lhonin, ikho sungu achohnoh lheh jeng lhonin,

²¹Eiho Rome miten isandiu le ijop dinguva dan ngai hilou chonna dan sodoh ago lhone, atiuve.

²²Chuin mipi chu thakhat tah-in amani dounan akipatdoh taove: chuin thutan vaihomho chun apon lhon ahoh lha uvin, chule mola jep dingin thu apetaove.

²³Chuin tamtah vei ajep jouvun songkul'a akhumun, songkul ngahpa chun bitkeija angana dingin thupeh anei taove.

²⁴Chutitah-a thupeh amu jehchun, aman kihenna sungnunga akhumin, akenguva bul atuhtai.

²⁵Ahin jan khangkimin Paul le Silas Pathen henga atao lhonin, la asa lhonin ahile, sohchangho chun angai ngaijun ahi.

²⁶Chuin phulou helouvin ling hatah-in ahung kihot in, chutichun songkul chu abul ahot longgamin; kotkhah jouse akihong paijin, chule akihennao bul akilhamlha gamtan ahi.

²⁷Chuin songkul ngahpa chu a-imut ahung khangin, songkul kotkhah ho akihon amuphatnin, sohchangho ajama ahitai atin, chemjam alan ama kithat akigotai.

²⁸Ahivangin Paul'in, hasapmin asamin, Nangma kisuse hih-in, keiho kabon chaovin hikoma kaum naove, ati.

²⁹Chuin aman meivah athumin, songkul sungah alhailut jel-in, kithing thing pumin, Paul le Silas angah alhu jengin,

³⁰Chuin amani chu apuidoh-in, Puteni, huhhing-a umna dinga ipi kabol dingham, ati.

³¹Chuin amanin, Pakai Jesu Christa tahsanin, chutile huhhing-a naum ding ahi, nangma le na-insunga chengsetoh, ati lhone.

³²Chuin amanin amale a-insunga umho chengse jah-a Pakai thu asei lhontai.

³³Chuin aman hiche pettah chun jan laijin amani chu apuijin, ajepnau maha chu asoppeh-in; chule a-insunga chengsetoh hiche pettah chun baptize achangpai taove.

³⁴Chuin amani chu a-in'a apuitouvin, a-ang lhonah nehding aluipeh-in; Pathen atahsan jeh chun ama chu a-insunga chengsetoh akipah lheh jengun ahi.

³⁵Chuin ni aso phatnin thutan vaihomhon sottol mimanho chu asolun; Miho chu lhatauvin, agatisah-ui.

³⁶Chuin songkul ngahpa chun hiche thu chu Paul jah-a aseijin, Thutan vaihomhon nangni lhadohna ding thu ahin petaove; hijeh chun lung mongin che lhontan, ati.

³⁷Ahivangin Paul'in amaho jah-a chun, Keini Rome mi kihia, themna themona photoh louva japi ang sunga eivoh uva, songkul'a eikhumu ahin; tu-a guhthima lhadoh ding eigotnu ham? Chuti theiponte; amaho mong hunguhen, amahotah-in eihung lhauhen, ati.

³⁸Chuin sottol mimanho chun thutan vaihomho hengah hiche thu chu agalhut taove; hichun amani Rome mi ahi lhon chu ahetdoh phatnun akicha taove.

³⁹Chuin amaho ahungun amani chu ahung jolun, khopi-a kona chedoh dingin ajoltauve.

⁴⁰Hitichun songkul'a konin apotdoh-un, Lydia in'a chun alut taove; chuin sopiho chu amulhon phatnin, amaho chu alungmonsah lhonin, akipatdoh lhontai.