Read Thado Chin Solchah 17 Bible Online

Solchah 17 - Thado Chin bible

Solchah 17

¹Chuin Amphipolis le Apollonia ajotpaijun, Juda ho kikhopna in umna Thessalonica alhungun;

²Chuin Paul achon ngai bangin ahenguva achen, cholngah ni thum Pathen lekhabua konin akihoulimpin,

³Christa chun gim genthei athoh-a athi lah-a kona thoudoh kit ding mong ahi tin aphongdoh-in, avetsah-in chule ahilchenin; chuin, Najah uva kasei Jesu hi hiche Christa chu ahi, ati.

⁴Chuin alah uva mi kimkhat le, Pathen ngaisah Greek miho, chule numei pipuiho tamtah-in ajoptaovin, Paul le Silas lama akaitaove.

⁵Ahivangin Juda atahsanlou hon thangset lungin kailhanga migilou thasehon koi koiham akipuijun, mipi hon khat akhomun, khopi sung chu achohnoh-un, Jason in abuluvin, amani chu miho henga hinkaidoh dingin aholtauve.

⁶Ahivangin amani chu amulou phatnun, Jason le sopite koi koiham chu khopi sung vaipoho henga akaijun, kho asamun, Vannoi chohseho chu hikoma jong ahung lhungtaove;

⁷Chule hiche Jason hin a-in'a alhunsah-in, chule Jesu atiu leng chom khat aume atiuvin, Ceasar thupeh nelkal lenan achon sohkeijui, atiuve.

⁸Hicheng thu chu ajah phatnun, mipi chengsele khopi sung vaipoho jong chu aboi lheh jengtaove.

⁹Chuin Jason le adang danghoa kon chun amaho khelin jamin alauvin alhadoh taove.

¹⁰Chuin sopihon geisang louvin ajan jan-in Paul le Silas chu Beria khopi lama asoltaove. Amani chukom alhun lhonin Juda ho kikhopna-a ache lhonin ahi.

¹¹Amaho chu Thessalonica miho sang chun aphajovin, lung kipahtah-in thu chu asangun, hichu hinam hilouham ti hetna dingin, niseh-in Pathen lekhabu-ah aholjiuve.

¹²Hijeh chun alah uva tamtah-in atahsan taovin, Greek miho lah-a ja-um numei le pasal tamtah-in jong atahsan taovin ahi.

¹³Ahin Beria-a jong Paul'in Pathen thu ahiltai ti Thessalonica Juda hon ajauvin, chukom gei chun ahungun, mipi chu ahung tilseuvin achohnoh kit taove.

¹⁴Hiche pettah chun sopihon geisang louvin Paul twikhanglen lama che dingin asolpai taove; Silas le Timothy vang chu chukoma chun aumden lhone.

¹⁵Chuin Paul gathahho chun Athen geijin apuijun; chuin Silas le Timothy chu agan nathei pena kahenga ahungloi lhon nading thupeh apouvin, akile kit taove.

¹⁶Chuin Paul'in Athen kho-a amani chu anga sungin, khopi-a chu semthu milim adimset amun, alung asoujahtai.

¹⁷Hijeh chun kikhopna in'ah Juda hole Pathen ngaisahho akinelpijin, kailhang mun'a jong amuchan chu aneljin ahi.

¹⁸Chuin Epicurean mile Stoic mi lah-a mithem miching koi koihamin jong ama chu akinelpi jiuvin; chule abangin, hiche kamtam belbul hin ipi sei ding agot hinganai, atiuvin; adang kimkhat chun, Jesu thule thokit thu aseile jeh chun, gamdang houho thuhil hile akilome, atiuve;

¹⁹Chuin ama chu apuijun, Areopagus'ah ahin puilutnun, ajah-a, Hiche thuhil thah thu nasei hi, kahet thei dinguham?

²⁰Ijeh-inem itile nangman datmo thil kidang dang kana uvah neijah sah-ui; hiche thil hi ipi tina ahi aumje chu kahet nomui, atiuve.

²¹(Ajehchu chuche Athen miho chule chua cheng gamdang miho jouse chu akiman chanuva imadang bol louva, thu thah seina ahiloule ngaina-a aphat amanjiu ahi).

²²Chuin Paul Areopagus lailunga adingin, hiche thuhi aseije, Nangho Athen miho, imalam jouse-ah nangho hi hou ngaisahtah nahiuve ti kahedoh-e.

²³Ijeh-inem itile nahouho chengseu kavetle-a ahile, HETPHAHLOU PATHEN DING tia kisun maicham khat kamui. Hijeh-a chu nanghon het louva nahoujiu chu keiman nangho kaseidohpeh nahiuve.

²⁴ Vannoi leiset le asunga thil um jouse sema Pathen chu van le lei Pakai ahin, khutna kisa houin'ah achengpoi;

²⁵Chule ngaichat neija banga, mihem khutna jenle ding jong ahipoi; ajehchu amatah imajouse hinna, haina, chule ijakai pe-a joh ahibouve;

²⁶Chule leiset chung jouse losoh-a cheng dingin, thisan khatna konin vannoi mi chitin namtin asemin, amaho chu phat ateppeh-in, achennao jong gamgi asepeh-e,

²⁷Amahon Pakai chu aholuva, amai amaijuva ijem tia amudoh theina dinguva chutia chu abol ahin; ama chu eiho koimacha-a kona gamlat umlou ahi:

²⁸Ijeh-inem itile eiho ama-a hinga, chatloh-a, chule uma ihiuve; nangho lah-a thuchih chom sun themho lah-a koi koiham jengin jong, Eiho jong ama son ihiuve, tin aseijuve.

²⁹Hijeh chun eiho Pathen son ihi jeh-u chun, Pathen chu mihem lung suhto-a sana, dangka, song kikheng milim tobanga ingaito ding dolu ahipoi.

³⁰Ihet lou laiju chu Pathen'in einavet thimu ahin; tu vangin gam jouse-a mi jousen alung aheina dinga thu apeh ahitai:

³¹Aman nikho khat atep ahin, hiche ni chule ami tun chun chonphatna-a vannoi hi athu atan ding ahi; Ama chu athia kona akaithouva kona mi jouse ahet kichensah ahitai, ati.

³²Athi thokit thudol ajah phatnun, abangin anuisat taovin, chule adangho vang chun, hiche thudol hi nanga konin ngai kitnaovinge, atiuvin ahi.

³³Hitichun Paul amaho lah-a kon chun apotdohtai.

³⁴Ahinla mi kimkhat ama henga akaijun atahsan taove. Amaho lah-a chun Areopagus mi Dionysius le numei khat amin Damaris atiutoh, chule adang dangho jong ahiuve.