Read Thado Chin Solchah 18 Bible Online

Solchah 18 - Thado Chin bible

Solchah 18

¹Chuche nung chun Paul Athen'a konin apotdoh-in, Corinth-a achetai.

²Hiche lai chun Aquila kiti Pontus gama peng Juda mi khat, a-inneipi Priscilla to Italy gama kona hunglut til chu amun, (ajehchu Claudius'in Juda ho jouse aboncha Rome'a kona potdoh dinga thu apeh ahi): chuin amani henga chun achen ahi.

³Amani chutoh akhut them natoh-u thakhat ahi jeh chun, amani koma chun alhungin, na atong khomjiuve; anatoh-u chu pon in sem ahi.

⁴Chule cholngah nisehle kikhop na-ah thu asuhtopin, Juda ho le Greek miho chu atahsan dingin ajoljin ahi.

⁵Chuin Silas le Timothy Macedonia gama kona ahung lhunsuh lhon phat chun, Paul chu lhagaovin apanpin, Jesu chu Christa ahi ti Juda ho henga chun ahettohsah tan ahi.

⁶Ahivangin amahon adoudaluva, ataitom phatnun, Paul'in apon athingin ajah uva, Nangho thisan nangho lu chungah chuhen; kei kangime; tu kalin chidang namdangho henga chetange, ati.

⁷Chuin chua kon chun achen, Pathen ngaisahtah amin Titius Justus atiu in'a chun alut tai; ama in chu kikhopna in kom cha ahi.

⁸Chuin kikhopna in vaipo pipu Crispus chun a-insung mi jousetoh Pakai atahsantai; chuin Corinth miho lah-a mi atama tamin ajauvin, atahsanun, baptize achang taove.

⁹Chuin jan-in Pakaiyin Paul gaovin akimusah-in, Kicha hih-in; thu sei jing jengin; umthim hih-in;

¹⁰Ajehchu keiman nangma kaumpi jingnai, chule suhset dinga koiman nabulu lou ding ahi; ijeh-inem itile hiche khopi sunga hin mi tamtah kaneije, ati.

¹¹Chuin ama hikoma chun kum khatle lhagup aumin, amaho lah-a chun Pathen thu ahilin ahi.

¹²Ahin Gallio Achaia gam vaipo ahi laijin, Juda ho lungkhat akisauvin Paul dounan akipat doh-un, thutanna munah akaijun,

¹³Hichepa hin chonna dan ngailouva Pathen hou dingin miho ajol lhai, atiuve.

¹⁴Chuin Paul pao ding akigotle Gallio chun Juda ho jah-a, Vo Juda ho, hiche hi suhkhel ahiloule khan gitlou thu hile, keiman namihehnau kangaipeh ding nahiuvin;

¹⁵Ahin thu mai mai, min mai mai ahiloule, nangho chonna dan thu kibaona mai mai ahivangle nanghon kitan un, ajehchu keiman chutobang thu chu katan nompoi, ati.

¹⁶Chuin amaho chu thutanna mun'a kon chun anodohtai.

¹⁷Hichun Greek ho chun kikhopna in vaipo pipui Sosthenes chu amanun, thutanna maitah-a avotaove. Ahivangin hitiho chu Gallio chun donin aneipoi.

¹⁸ Chuin Paul chukoma chun sottah aum jouvin, sopitetoh akilhan, Priscilla le Aquila toh kilhonin Syria gam lama kongin akitoltai. Paul'in kitepna anei jeh-in Cenchria'a asam avouvin ahi.

¹⁹Chuin Ephesia khopi alhunun, amani chu chukoma chun adalhatai: ahivangin ama chang kikhopna in'a alutnin Juda ho chu thu asuhtopin ahi.

²⁰Chuin chukoma chu um sot jep dingin alhovin ahile ama anom hih-in,

²¹Amaho chu alhan, Iti jongle kut ahunglhung dingpa hi Jerusalem'a kaman tei ding ahi; Pathen lunggot lam ahile naheng uva hung kitnange atin, Ephesia kho adalhan, kongin akitoltai.

²²Chuin Ceasarea-a akumin, achetouvin houbung chu salam agapen, Antioch-a ahung kilesuh kit tai.

²³Chukoma chun chom khat aumin, chua kon chun Galatia le Phrygia gam ajotpeh-in, seijui ho jouse aphutdetle tai.

²⁴Hiche lai chun amin Apollos atiu Juda mi, Alexandria-a peng ahin, thuseija themtah le Pathen lekhabua thua hattah, Ephesia'a ahungin;

²⁵Ama chu Pakai lampi thu kihila ahin, alungin agunchu lheh jengin, Pakai umchan thudol kichehtah-in aseijin, ahivangin aman John baptize chan thu bouchu ahen ahi.

²⁶Chuin kikhopna in'ah hakattah-in thu asei pantan ahi; chuin Priscilla le Aquila'n athuhil chu aja lhonin, a-in'a apui lhonin, Pathen lampi thu chu dihtah-in ahilchen lhontai.

²⁷Chuin ama chu Achaia gama ache nomtan ahile sopihon atilkhouvun, chuin ama chu anasanna dingun seijui ho hengah lekha asuntaove. Chukom alhunin lungsetna vanga atahsanho chu nasatah-in akitopin ahi.

²⁸Ijeh-inem itile Jesu chu Christa ahi, ti chu aman Pathen lekhabua konin aphot tohna avetsah-in, hakattah-in japi ang sungah Juda ho anel khup jengtan ahi.