Read Thado Chin Solchah 2 Bible Online

Solchah 2 - Thado Chin bible

Solchah 2

¹ Chule Pentecost ni lhingkeija ahunglhun phatnin, abonchauvin lungkhat tah-in munkhatna ana umkhomun ahi;

²Chuin phulou helouvin van'a konin hui hattah nung gin tobang ahung gingin, atounau in chu adimsoh jengin ahi.

³Chuin meikong bangin lei ahung kilah-in, akikhen jal-in, alu chung cheh uva achongin ahi.

⁴Chuin amaho abonun Lhagao Theng adimset taovin, Lhagaovin aseidohsah bangun paochom paochomin thu asei pantaovin ahi.

⁵Hichea chu vannoi leiset gamtina chitin namtin lah-a kona hou gut Juda miho Jerusalem'a umuva ahi.

⁶Chuin chuche thu akiseithang phat chun mipi ahung kikhomun, amitakipmin ama ama pao cheh-a thukisei ajah jeh-u chun, alung kichih lah jengun ahi.

⁷Chuin amaho chun adatmouvin kidang asauvin, khatle khat akihouvun, Veuvin, thu seiho hi abonchauva Galilee gam mi hilou hiuvem?

⁸Chule i-atile eihon amikipmin ipenna gam cheh paova thu kisei ijah-uham?

⁹Eihola abang Parthia mi, Media mi, Elam mi ihiuvin, abang Mesopotamia gama cheng, Juda gamale Cappadocia gama cheng, Pontus gamale Asia gama cheng,

¹⁰Phrygia le Pamphylia gama cheng, Egypt gama cheng, chule Cyrene gam vela Libya gama cheng ihiuvin; abang Rome'a kona hung kholjin, Juda ho le Juda chona chonho,

¹¹Crete mile Arabia gam mi ihiuvin: ahivangin eima pao cheh-a Pathen thilbol loupi thu aseiju thakhat jah-in ijauvin, atiuvin ahi.

¹²Chuin abonchau chun kidang asauvin adatmo lheh jengun, Itina ahidem, tin khatle khat akidongto taovin ahi.

¹³Ahivangin adangho chun ajontaijun, Hiteho lengpiga twithah khama hiuva hi, atiuve.

¹⁴Ahin Peter somlekhat chutoh adingin, aw sangtah-in asamin, ajah uva, Juda gam mite le Jerusalem'a chengho, nanghon nabon chaovin hiche hi heuvin, chule kathusei lungna changin ngaijun.

¹⁵Ijeh-inem itile hiteho hi nangho ngaito banga lengpitwi khama ahipouve; tu hi vai ahinalai bouve;

¹⁶Ahin hiche hi Joel themgaovin anasei;

¹⁷ Ni nunungle hiti ding ahi, tin Pathen'in aseije Mi jouse chunga kalhagao kabuh lhah ding; nachapa teo le nachanu teo vin gaothu aseidoh dingu, nakhangdong houvin mu aneijuva, na-upa houvin mang amat dingu ahi.

¹⁸Ahi, hiche niteng chule kasoh pasal hole kasoh numei ho chunga jong Kalhagao kabuh lhah ding, chule amahon lhagao thu aseidoh dingu ahi.

¹⁹Chule van'a thil kidang dang, noi leisetna melchihna ho; thisan, mei, meikhu kamusah ding;

²⁰Pakai nikho loupitah le min thangtah chu ahunglhun masanga; Nisa chu muthim soh-a, Lha thisan soh ding ahi.

²¹Chule hiti ding ahi, Koi hijongle Pakai mina tao chan chu huhhing-a umding ahi, tia aseichu guilhunga ahibouve.

²²Nangho Israel mite, hiche thuhi ngaijun: Nazareth Jesu, Pathen'in amanchah-a nalah uva, bolmo kidang, datmo umho, chule melchihna ho abola kona chu Pathen'in nangho henga aphotchet ahin, hichu nanghon naheuve.

²³ Ama chu Pathen'in ageltohsa le ahet masahsa bangin pehdoh-in aumtan ahile, nanghon namanun, lungsetna beihel khutho chun thingpellah nakhen beh-un, nathat taove.

²⁴ Ahin thina-in ama chu atuhden hoi ahilou jeh chun, Pathen'in thina-in akan chu asutlhap peh-in, akai thoutai.

²⁵ Ijeh-inem itile David'in ama thudola chun, Keiman Pakai chu kamaikoh-a kamu jinge, Ajeh chu keima kalon louna dingin, kakhut jet lamah aume.

²⁶Hijeh chun kalung akipah-in, chule kalei athanome; chuche kalval chun katahsa jong kinema cholnga ding ahi;

²⁷Ajeh chu nangman kalhagao damuna nadalhah lou ding, namitheng jong mon mangna namusah louding ahi.

²⁸Nangman keima hinna lampi neihetsah ahitan, namaiso-a kipana neidip ding ahi, tin anaseijin ahi.

²⁹Sopiteho, iphung bulpiu David thuhi olmo louhelin najah uva kasei theije, ama chu athin, akivuijin abuikhuh tu geijin ilah uva aum jinge.

³⁰ Ama chu themgao ahijeh-in, tahsalam dola ataiguija kona alaltouna-a toudinga Christa chu ahin tundoh ding ahi tia, Pathen kihahsela athutep chu ahen;

³¹Chutia chu khonung thu ahet masah jeh chun Christa thokit ding thu aseijin, thikhol khul'a dalhah denin aumpoi, alongin jong mon mangna amupoi, tia asei ahi.

³²Hiche Jesu chu Pathen'in akaithou kittan, ahetoh-a keiho kabonchao kahiuve.

³³Hijeh chun Pathen khut jet lamah choisangin aumin, athutepsa Lhagao Theng chu a-Pa-a konin amun, hichu ahin buhlhah-a, tu-a namu-u najah-uhi ahi.

³⁴ David chu van'ah akalpoi, ahivangin amatah-in hiti hin aseije, Pakai chun ka Pakai jah-a, Kakhut jet lamah tou jingin,

³⁵Keiman namelmaho nakeng chotpha kaneisah masangsen, ati.

³⁶Hijeh chun Israel insung mi jousen kichentah-in heuhen, hiche Jesu nanghon thingpel'a nakhetbeh-u chu, Pathen'in Pakai le Christa-a atun ahitai, ati.

³⁷Amahon thu hicheng chu ajah phatnun, alungu hema kisun abangin, Peter le solchah dangho jah-a, Miho chule sopite, keihon ipi kabol dingu ham? atiuve.

³⁸Chuin Peter'in ajah uvah, Nalung heijun, chule chonset suhbeinan Jesu Christa minin nabonchaovin baptize changcheh-un, chule Lhagao Theng kipe-a hi nachan dingu ahi.

³⁹Ijeh-inem itile thutep chu nangho dingle nachateo ding, chule gamlatah-a umho, Pakai i-Pathen'un ama henga akou dingho jouse dinga ahi, ati.

⁴⁰Chule thu dang dang tamtah ahettohsah-in, chule amaho chu atilkhouvin, Tulai khang lung gilou ho-a konhin kihuh doh-un, ati.

⁴¹Chutah chun kipahtah-a athu jop chanchu baptize achang taove; chule hiche nilele chun amaho chu mi sangthum jenin abetauve.

⁴²Chuin amaho chu solchah ho thuhila jong, kithokhomin jong, changlhah semkeh-in jong, chule taovin jong gunchu tah-in apang det jingtaove.

⁴³Hichun mitin chunga kichatna ahungchun; chule solchah ho chun thil kidang tamtah le, melchihna aboltauve.

⁴⁴ Chule atahsan jouse chu aum khomun, thil jouse neilhangin aneijun:

⁴⁵Chule anei agouhou le athilkeovu ajoh-un, abonchauvin angaichat akin tohkhambep cheh-in akihom jiuvin ahi.

⁴⁶Chule niseh-in lung khattah-in houin'ah gunchu tah-in aumdet jingun, in tina changlhah asemkeh-un, kipahle lung khatseh pun an anejiuvin,

⁴⁷Pathen avahchoijun, chule mi jouse lungdeijin aumun ahi. Chuin Pakaiyin huhhing-a umho chu niseh-in houbung'a chun abe jingtan ahi.