Read Thado Chin Solchah 20 Bible Online

Solchah 20 - Thado Chin bible

Solchah 20

¹Chuin thunoh chu akichai jouvin Paul'in seijui ho chu agakou sah-in, amaho chu akoijin, Macedonia gama chedin akipat doh tai.

²Chuin chuche gamkai sungse chu achonsoh-in, amaho chu thu tamtah-in atilkhouvin, Greek gam alhungtai.

³Chuin chukoma chu lha thum acham jouvin, Syria gam lama kong'a kitola che ding agotle Juda hon achanlhih jeh-un, Macedonia jotpai ago kittan ahi.

⁴Chuin Asia gam geijin Beria kho-a Sopater, Thessalonica'a Aristarchus le Secundus, Derbe kho-a Gaius le Timothy, Asia gama Tychicus le Trophimus, hicheng chun alhonpiuve.

⁵Hiteho chu keiho masang-ah anacheuvin, Troas kho'ah eina ngah jingui.

⁶Keiho vang chu cholsolou changlhah kut jouvin Philippi'a konin kongin kakitolun, ni nga nin Troas kho'ah ahengu kalhungui. Chua chun ni sagi kanichongui.

⁷Chuin hapta kipat nikho masa ni changlhah hehbal dinga solchah ho ahung kikhop phatnun, Paul ajinga cheding akigot jehchun amaho chu akihoulimpin, khangkim geijin sottah thu aseije.

⁸Akikhopnao indan chungnunga chu meivah tamtah uma ahi.

⁹Chuin bangkotna tou gollhang khat amin Eutychus kitipa chu ana-imu lhutai; Paul'in athusei aseisot jeh chun ana-imulhun, chung dan thum na-a konin noi lamah alhatan ahile athisan agaphongdoh-ui.

¹⁰Ahivangin Paul akumlhan achungah aboh-in, apomin, Lungdong hih-un, anuhkai nalainai, ati.

¹¹Chuin Paul akaltou kitnin, changlhah ahehbalin, anen, sottah ahoulimin, khovah geijin ajah uva thu aseijin, chutichun akipat dohtai.

¹²Chuin amahon gollhangpa chu ahingin ahinpuijun, lungmon mainah-in alungmong tapouve.

¹³Chuin keiho kong lama chun kanache masaovin, Paul lalutpa dingin Assos jonin kongin kakitol taove; aman akenga che agot jeh-a aman chutia chu agontohsa ahi.

¹⁴Chuin Assos kho-a eikisuhtopi phatnun, kong'a kalalutnun, Mitylene kahunglhung taove.

¹⁵Chuin chua kon chun kakitolun, akit nin Chios jon kalhungun, anikit nin Samos kalhungun, Tragyllium'a kakichol paovin, akit nin Miletus kalhungtaove.

¹⁶Ajeh chu Paul'in Asia gama umsot ding anop lou jeh-a, kong'a kitola Ephesia khopi chu jotpai ding lunga agot jingsa mong ahin, ahitheile Jerusalem'a Pentecost mang dinga, kin loija che kigo-a ahi.

¹⁷Chuin Miletus-a kon chun Ephesia'a mi asolin, houbung upaho agakousah-e.

¹⁸Chuin aheng ahung lhun phatnun ajah uva: Keima Asia gama kahungtila pat, nangho koma kaum lai sungse-a kaumchan chu naheuve.

¹⁹Lungnem tah le mitlhi pumin, chule Juda hon eichanlhih jinguva kona kachunga chua thohhesoh pumin, Pakai lhacha na katongin;

²⁰Chule phatchomna ding thil imacha nangho dinga ka-im beihelin kavetsah sohkeijun, jalhang le a-in tinah kahiljiuvin,

²¹Juda ho hengle Greek miho henga jong, Pathen lama lunghei thule, I-Pakaiyu Jesu Christa lam tahsan dingdol kahetsahjin ahi.

²²Chule tun, veuvin, lhagaova kisoma Jerusalem'a che ding kahi, chua chu kachunga ipi alhun ding kahepoi;

²³Kikan le hesoh gentheijin eingah jinge ti Lhagao Thengin khotina eihetsah jingbou hi kahei.

²⁴ Ahivangin Pakai Jesu'a kona kanamu lhacha natoh, Pathen lungset kipana thupha hettohsah ding, chule ka tohding hi kipah tah-a kachai molso thei ding poule hiche hohin eisulinglao pouvin, chule kahinkho jonghi ka-itchapoi.

²⁵Chule Pathen lenggam thu kaseilea kavale kavalena nangho hin, kamai namu kit lou dingu ahi, ti hi kahei.

²⁶Hiche jeh-a chu mi jouse thisana kona ngima kahi, ti tunia kahetsah nahiuve;

²⁷Ijeh-inem itile Pathen thil ngaito jouse najah uva im kanei aumpoi.

²⁸Hijeh chun Pathen'in athisana achohsa houbung vesui dingle ching dinga Lhagao Thengin napan sah-u, kelngoi hon chengse chungle nangmaho chung changah chingtheijun.

²⁹Kache nungle ngei gilou nalah uva alutna, ahon hi ahoi lou ding kahei.

³⁰Chule nangho lah-a kona jong abang bang hung kipatdoh-a, amaho nung jui dinga seijui ho chu thu akaleh-a hila hung umding ahi.

³¹Hijeh chun nangho kigingpha jingun; chule keiman kum thum sunga mitlhi puma asun ajan nangho nabon chaova tilkhou kahai louhel chu geldoh jingun,

³²Chule tun, sopiteho, nangho sadoh-a khantousah theija, chule mi akisuthengho lah-a nangho gou chansah theija, Pathen le alungsetna thu henga kakhumu nahiuve.

³³Koimacha dangka, sana, nihchen ponsil kadei chapoi.

³⁴Ahi, kakhutteni hin keimale kaloiho ngaichat chan kaboldoh ji-e ti nanghon naheuve.

³⁵Keiman ijakaija navettoh uva natho dingu kavetsah sohkeije; nanghon chutobanga chu natohgim uva ahatmoho phatna nabol dingu thu ahi. Lah sangin peh ochat aumjoi, tia Pakai tah-in asei jong chu geldoh jingun, ati.

³⁶Thu hicheng chu aseijin adilsun, abonchauvin atao khomun ahi.

³⁷Chuin abonchauvin hakan akapmun, Paul angong koijun, achopmun,

³⁸Kamai namu kit lou dingu ahi, atijeh tahchun alungse deh-un; kong mun geijin agathah taove.