Read Thado Chin Solchah 21 Bible Online

Solchah 21 - Thado Chin bible

Solchah 21

¹Chuin ahitin ahi, keiho amahotoh kakikhen jouvun kongin kakitolun, jangkeijin Coos twikol kalhungun, akit nin Rhodes twikol kalhungun, chua konin kache paijun Patara kho kalhungui.

²Chuin Phoenicia gama jonding kong khat kamuvin, achunga katouvun, kakitol taove.

³Chuin Cyprus twikol akimu phatnin, veilam ngan kapelun, Syria gama kache paijun, kong'a thil solhah ding aum jeh-in Tyre kho-a kaki ngaove.

⁴Chukom mun'a um seijui ho kaholdoh-un, chukomah ni sagi kanichongui. Lhagaovin ahetsah dungjuijun, amahon Paul chu Jerusalem'a che hihhen, atiuve.

⁵Chuin ni hijat chu kaum jouvun, kakipatdoh-un kachena dingu kamasot taove; chuin amaho abonchauvin ajiteu le achateu pumin khopi kulpam geijin eihung thah-ui; chuin twikhanglen kama kadilsuvin kataovun ahi.

⁶Chuin khat le khat kakilhah jouvun keiho kong'a kakal taovin, amaho vang a-in lamuva akilekit taove,

⁷Chuin keiho Tyre'a kona twija kakholjinu kachai phatnun, Ptolemais kalhungun, twija kacheu kachaijui; chuin sopiho salam kaboh-un, amaho komah ni khat kaumui.

⁸ Ajingin keiho Paul to kiloise chua kon chun kakipatdoh-un, Ceasaria kahung lhungun; sagiho lah-a kipana thupha seile-a khat, Philip in'a kalhungun, amato kaum taove.

⁹Ama chun chanu li aneijin, nungah theng ahiuvin, Pathen thu seiphonga pang ahiuve.

¹⁰ Chukoma chu ni ijat-ham kaum petnun, Juda gama konin amin Agabus atiu themgao khat ahungin ahi.

¹¹Ama chu kahenguva ahung lhun phatnin, Paul konggah chu alan akhut akeng akikanin, Lhagao Thengin hiti hin aseije, Hiche konggah neipa hi Jerusalem'a Juda hon hitia hi akanuva, chidang namdangho khutna apehdoh dingu ahi, ahung ti.

¹²Chuin hiche thu chu kajah phat uvin, chukoma umhole keihon Paul Jerusalem'a che lou dingin kajol taove.

¹³Chuin aman eidon butnun, nanghon ibola neika ka-uva kalung nasuhset nuham? Ijeh-inem itile Jerusalem'a kikan ding keogoh hilouva, Pakai Jesu min jala thi dinga jong kigosa dema um kahi, ati.

¹⁴Aman keiho thu alah lou jeh-in Pakai lunggot got hihen katiuvin, kathip taovin ahi.

¹⁵Chujouvin kathilkeovu kakigot un, Jerusalem'a kachetou taove.

¹⁶Chule Ceasaria'a konin seijui koi koihamin eijuijun; amaho chun amin Mnason atiu Cyprus twikol'a seijui lui, lhunna-a kanei dingpao chu ahinpuijui.

¹⁷Chuin Jerusalem kagalhunun, sopihon kipahtah-in einasangui.

¹⁸Akit nin Paul keihotoh Jacob henga kalutnui; chua chun houbung upaho jouse jong abonchauvin aumui.

¹⁹Chuin Paul'in amaho chu salam aboh jouvin, alhacha natoh-a kona Pathen'in chidang namdangho lah-a thil abolsah jouse chu abanchan aseitai.

²⁰Chuin amahon thu hicheng chu ajah phatnun Pakai avahchoi jun; chuin ajah-a, Sopi, Juda ho lah-a atahsan sang tamtah ahihi namui; chule amaho khu danthu lama gunchutah ahiuve.

²¹Ahin amahon nangma thudol, nangma hin chidang namdangho lah-a Juda ho chu Mosi dan thu pailhah ding thu nahilin, chapang chep atan lou dingu, chule chonna dan ngaija chon lou ding tin, nahil lei ti ajaove.

²²Hijeh-a chu iti ding hitam? Nangma hung ajah-ule mipi hung kikhom teidiu ahi.

²³ Hijeh chun thu khat seipeh-unge, hichu bolin; kitepna neija mi li hikoma hin kaneijui;

²⁴Amaho chu puijin lang nangma toh kisuthengun, chule asam vona dingu nangman sum toh-in; chutile nangma thudola athu jah-u chu ima hilou ahi, nangmatah chonna dan ngaija nachon chu amahon ahetsoh dingu ahi.

²⁵ Chidang namdang atahsanho thudol vang, chutobang thil chu nitlouva, milim houna thil neh, thineh, akimeh lihtho sa neh chule jonthanhoi ja kona akikangse nadiuva kasut nuva kathotsao ahitai.

²⁶Chutah-in Paul'in miho chu apuijin, akit nin amaho chutoh akisuthengun, amaho khat cheh-a dinga thilto akito kahse-a akisuh thengna dingu nikho kichaina ding chu thempu gahetsah dingin houin'a alutnin ahi.

²⁷Chuin ni sagi alhin ding konchan Asia gama Juda ho chun houin sunga Paul amu phatnun, mipi chu abonchan atilseuvin ama chu amanun,

²⁸Israel miho, neihuvin; hichepa hi ahi gamtina mi jouse henga, Juda mite le danthu, chule hiche mun seisele-a chu: chule chuche jeng hilouvin, houin'a Greek mi alutpin, hiche intheng hi asuboh-e, tin asamtauve.

²⁹ (Hichu masanga khopi sunga Ephesia mi Trophimus toh amuva ahile, Paul'in ama chu houin'a alutpia angaitou ahi).

³⁰Chuin akhothingin akiloh jengun, miho chu alhai khomun; Paul chu amanun, houin'a konin akaidoh-un; kotkhah ho chu akhahpai jengui.

³¹Chuin ama chu tha dinga agot laijun, Jerusalem khopi-a mi jouse aboije ti thu sepai vaipipo heng alhungtai.

³²Chuin ama chun sepaiho le sepai ja lamkaiho apuijin, ahenguva alhaisuh taove. Chuin amahon sepai vaipipo le sepaiho chu amu phatnun, Paul avoh-u chu atangui.

³³Chuin sepai vaipipo chun ahin naijin, Paul chu atuh-in, thihkhao ni-a kan dingin thu apen; amahi koi hija chule ipi asuhset ham, tin adongtai.

³⁴Chuin mipi lah-a chun akimkhatnin thuchom asamin, adang kimkhatnin thuchom asamun ahi. Chuin husan jeh-a thutah chu ahetdoh theilou phatnin, kulpi sunga pui lut ding thu apetai.

³⁵Chuin Paul leikalbi ageijin, mipi asousang behseh jeh chun sepaihon ama chu adoptho taove.

³⁶Ajeh chu mihonpi chun, sumangin, sumangin, tia asapmuva ajui lellul jengu ahi.

³⁷Chuin Paul kulpi sunga apui lut ding konun aman sepai vaipipo jah-a chun, najah-a thu kaseithei dingham? ati. Chuin vaipo chun, Greek pao nahet em?

³⁸Masang laija miho tilsea, mithat mi sangli gamthipma puidoh-a, Egypt gam mi chu nahilouham? ati.

³⁹Ahinla Paul'in, Keima Cilicia gama Tarsus khopi-a Juda mi kahi, khopi maimaija mi kahipoi: chule nahenga katao ahi, miho jah-a thu kaseina dingin phalna neipen, ati.

⁴⁰Chuin aman athusei ding aphalpeh phat-in, Paul leikalbi chunga chun adingin miho chu akhutnin ajapmin ahi. Chuin athipchet phatnun, ajah uva chun Hebrew paovin thu aseijin: