Read Thado Chin Solchah 22 Bible Online

Solchah 22 - Thado Chin bible

Solchah 22

¹Miho, Sopitele Pateho, tu-a kakihona thu kasei ding hi ngaijun, ati.

²(Chuin aman ajah uva Hebrew paova thu asei ajah phatnun, ahathip chehtauvin ahi).

³ Keima Juda mi, Cilicia gama Tarsus khopi-a penga, hiche khopi sunga hi Gamaliel khophang bula seilena, iputeu ipateu chonna dan kikheltah dungjuija kihildoh-a, tunia nangho banga hi Pathen lama gunchutah kahi;

⁴ Chule hiche Lampi mihohi thina geijin kabolsen, anumei apasal'in kakanin songkul'a kakhum jin ahi.

⁵Chujongle thempu chungnungle gamsung upaho jousen jong hiche thu chu eihetpiuvin; amaho-a kon chun sopiho henga dingin lekha kalan, Damascus-a um jouse talent peh dinga hinkana Jerusalem'a hintol dingin kachen ahi.

⁶Chuin ahitin ahi, kachele Damascus khokom kageijin sun kim dontah-in, phulou helouvin van'a kon vah nasatah khatnin kavel ahinsalvah soh jenge.

⁷Hichun keima tolah kalhutai, chuin kajah-a, Saul, Saul, nangin ibola keima eibolsea nahim? tia seija aw khat kajai.

⁸Chuin keiman kadonbut nin, Pakai, Nang koi nahim? kati. Chuin aman kajah-a, Keima nabolset jing Nazareth Jesu kahi, ati.

⁹Chuin kalhonpi ho chun vah chu amuvin, chule akichauvin, kajah-a thusei aw vangchu ajapouve.

¹⁰Chuin keiman, Pakai, ipi kabol dingham? kati. Chuin Pakai chun kajah-a, thoudoh-in Damascus kho-a lutnin; chukoma chu nabol dinga kigo jouse aboncha kiseipeh ding nahi, eiti.

¹¹Chuin vah loupi jeh-a chu kho kamu lou phatnin, kalhonpihon khutnin eikaijun, Damascus kaluttai.

¹²Chuin mi khat Anania, danthu dungjuija Pathen ngaisah, chule chukoma cheng Juda ho jouse seiphat chu kahenga ahungin, kakoma adingin kajah-a,

¹³Sopi Saul, kho mutan, eiti. Chuin hiche pettah chun ama chu kamutan ahi.

¹⁴Chuin aman, Ipu ipateu Pathen'in ama lunggot lam he dingle, Michondih tah chu mu-a, Akam sunga kon sohdoh a-aw ja dinga napansah ahitai.

¹⁵Ijeh-inem itile nangman namule najah thua chu mi jouse hettohsah-a napan ding ahi.

¹⁶Chule ipi dinga khongai nalai nahim? Kipatdoh inlang baptize changin, Pakai minin taovin, nachonset kisop lhah-in, eiti.

¹⁷Chuin ahitin ahi, Jerusalem'a kakile kit phatnin, houin sunga kataole kagaochang tai.

¹⁸Chuin, kino-in, chule Jerusalem'a konin potdoh loijin: ijeh-inem itile amahon keima thudola nangma thuhil alah lou dingu ahi, tia kajah-a thuseija chu kamun ahi.

¹⁹Chuin keiman, Pakai amahotah-in nangma tahsan ho songkul'a kakhuma kikhopna intina kavohji chu aheuve,

²⁰ Chule nathu hettohsah Stephen thisan aso pettah uva jong akoma kadina, thadia kaphatsah-a athat teho ponho kanachin ahi, kati.

²¹Chuin aman kajah-a, Kipatdoh-in, Keiman nangma gamlatah-a chidang namdangho henga kasoljoh ding nahi, eititai, ati.

²²Chuin chuche thu gei chun angaijun, chuin aw sangtah-in, Hitobang mi hi vannoi leisetna konin sumangin, ahinga umhoi ahipoi, atitaove.

²³Chuin kho asamun, apon alehlhauvin, van lama leivui atheuvin ahile,

²⁴Sepai vaipipo chun ama chu kulpi sunga pui lut ding thu apen, achunga chutobang tah-a akhosapmu chu ajeh hetdohna dingin, jepma patep dingin asoltai.

²⁵Chuin savun khaova akantah phatnun, Paul'in akoma ding sepai jalamkai jah-a chun, Themmo sahna bei Rome mi jepding chu nangma dinga dan ngai hinam? ati.

²⁶Sepai jalamkai chun thu hichu ajah phatnin, sepai vaipipo henga chun agachen, Nathil bolgot nahin chigtheijin; ajehchu mipa khu Rome mi ahi, ati.

²⁷Chuin sepai vaipipo chu ahungin ajah-a, Rome mi nahim? neisei peh-in, ati. Hivhun aman, Kahi, ati.

²⁸Chuin sepai vaipipo chun, Keiman sum tamtah kapeh-a chamlhatna hi kachan ahibouve, ati. Chuin Paul'in, keivang ahisa penga kahi, ati.

²⁹Chutah-in athem amo hetdohna-a bolgim dinga kigosadem hochu hiche pettah chun akoma konin achemang taove; chule sepai vaipipo chun Rome mi ahi ahedoh-in, amatah-in akansah jeh chun akichatai.

³⁰Akit nin Juda hon Paul ahehnau thu chu hetchenna dingin sepai vaipipo chun ama chu alhamin, thempu pipuiho leh houvaipoloi aboncha kikhom dingin thu apen, Paul ahinpuilhan a-anguvah adinsahtai.