Read Thado Chin Solchah 23 Bible Online

Solchah 23 - Thado Chin bible

Solchah 23

¹Chuin Paul'in houvaipoloi chu ave changmelin, Sopiteho, tuni geija hi imalam jouse-a ase apha hekah sohkeija Pathen anga lung thengsela um kahi, ati.

²Anania thempu chungnungin akoma dingpa chu akam bengin asole.

³ Chutah-in Paul'in ajah-a, Vo bang kiloibang, Pathen'in nang nadenjoh ding ahi; nangma dan ngaitah-a kathu tan dinga touva chuche dan chu napal lhah-a kei deng dinga mi nasol ham? ati.

⁴Chuin akoma dinghon, Nangman Pathen thempu chungnung chutia chu nahouset ong, atiuve.

⁵ Chuin Paul'in, sopite, thempu chungnung ahilam kahet lou ahi, ijeh-inem itile, nangin namite chunga vaipo chunga thuse sei hih-in, tin akisune, ati.

⁶ Ahivangin Paul'in amaho chu keh khat Saddukai ahia, keh khat Pharasai ahi ahet phatnin, houvaipoloi lah-a chun asamin, sopite, keima Pharasai chapa, Pharasai kahi; athiho thodoh kit kinep thua kathu kitana ahi, ati.

⁷Chuin thu hiche chu asei phat chun Pharasai hole Saddukai ho akinelun, mipi chu akilangkhen taove.

⁸ Ajeh chu Saddukai hochun thokit, vantil, chule lhagao hicheng chu aumpoi, atiu ahin, Pharasai hovang chun hicheng chu aume tia a-oiju ahi.

⁹Hitichun apoh vengvung jengun; chuin Pharasai mi danthu sunho phabep adingdoh-un, anelun, Keihon hichepa agitlouna imacha kamupouve; lhagaovin ahim, vantil ahimin, ajah-a thu asei hikhat hihdem, Pathen to kidoupou hite, atiuve.

¹⁰Chuin hachang nela akinel phatnun, amaho chun Paul chu sattel unte tin sepai vaipipo chu akichan, kumlha suh-a alah uva kona lahpeh-a kulpi sunga pui lut dingin sepaiho chu asoltai.

¹¹Chuin hiche jan chun Pakai akoma adingin, kicha hih-in Paul; ijeh-inem itile Jerusalem'a keima thudol nahettohsah banga hi Rome khopi-a jong nahettohsah ding ahi, ati.

¹²Chuin khovah phatnin Juda ho akihou somun Paul itha masangseuvin anneh twidon bolpouhite, tin kihahsel in akihanlho taove.

¹³Chutia miphil dinga ki hou soma chu mi somli val hiuve.

¹⁴Chuin amaho chu thempu pipuiho le upaho henga acheuvin, Keiho kihahsel khohtah-a kaki hahsel uva, Paul katha masangseuva imacha tep louhel dinga kihan lho-a kahitaove.

¹⁵Hiche jeh chun tun nangho houvaipoloi toh athudol chu kichen cheh-a hettoh-a bolphat ding ngaitobeh kisao vinlang, jingle naheng uva ahinpuina dingin sepai vaipipo henga seijun; aman nangho kom ahinphah kah-a that dinga kigosa dema um kahiuve, agatiuve.

¹⁶Chuin achanlhih-u thu chu Paul sopinu chapan ajan, ahungin kulpi sunga chun alutnin Paul jah-a ahung seitai.

¹⁷Chuin Paul'in sepai ja lamkaiho khat ahenga akouvin, hiche gollhang hi sepai vaipipo henga puijin; ajehchu seinom khat aneije, ati.

¹⁸Chuin aman apuijin sepai vaipipo henga achen, Hiche gollhang hin najah-a seinom aneije tin, sohchang Paul'in eikouvin nangma henga hin puijin eiti, tin agaseije.

¹⁹Chutichun aman akhutnin atuh-in achoma apuidoh-in guhthimin adongin, Kajah-a sei ding ipi thu naneijem, ati.

²⁰Chuin aman, Paul thudol hi kichen cheh-a dongtoh ding ngaito banga, jingle houvaipoloi kikhopna-a napuina dinga nahenga thum dingin Juda ho akilol taovin ahi.

²¹Ahin nangman amaho thu la hih-in; ijeh-inem itile mi somli valin, Paul itha masang seuvin anneh twidon bolpouhite, tin akihahselun, achanglhi jingui, chule tu-a hi kigosa dema uma, nangma thupeh mai ngah jinga um ahiuve, ati.

²²Chutichun sepai vaipipo chun gollhangpa chu ahilchah-in, Kajah-a naphondoh thu hicheng hi koima jah-a sei hih-in, atin alhadohtai.

²³Chuin aman sepai jalamkai ni ahenga akouvin, hiche thuhi apei: Jan nidan ko-a Ceasaria che ding akenga che sepai jani, sakol sepai somsagi chule tengchoi sepai jani gotsan koijun;

²⁴Chule Paul Felix gamvaipo heng bitkeija pui lhungna dingin, ama tousahna ding sa jong gotsademin koijun, ati.

²⁵Chuin hitihin lekha asune;

²⁶Claudius Lysias'in Lal chungnung pen Felix gamvaipo henga: Salam.

²⁷Juda hon hiche mipa hi amanun, atha ding konun keima sepaihotoh kakonin, ama hi Rome mi ahi ti kahen kahuhdoh tai.

²⁸Chuin ipi jeh-a aheh-u ahi ahehnao hetdohna dingin houvaipoloi kikhopna-a kapuije.

²⁹Hia chun thina theihoi le kikanna theihoi thudolin ahehpouve, amaho chonna dan thua asuhkhel amatdoh-u ahitoh-e.

³⁰Juda hon ama hi thadinga agot uva achanlhih-u kahetdoh phatna, khongai louhela apettah-a nangma henga kahinsol pai jeng ahi, chule ahehho jong nangma ang sunga ahehnau thu sei dingin thu kapei. Damtan.

³¹Chuin sepaihon thupeh dungjui chun ajan jan-in Paul chu apuijun, Antipatris lama achepi taove.

³²Ahin ajingin sakol sepaiho chu amatoh alhonsah-un, amaho kulpi lama akiletaove.

³³Chuin amaho Ceasaria alhunun, lekha chu gamvaipo chu apeuvin, Paul jong chu adinsah taove.

³⁴Chuin aman lekha chu asimin, hoi gampoh mi nahim, tin adongin, chuin Cilicia gam mi ahi ahetdoh phatnin,

³⁵Naheh ho jong ahung tengule nathu ngainange, ati. Chuin Herod inpia koi dingin thu apetan ahi.