Read Thado Chin Solchah 24 Bible Online

Solchah 24 - Thado Chin bible

Solchah 24

¹Chuin ni nga jouvin thempu chungnung Anania chu upaho phabep toh, chule Tertullus atiu thukalthem khattoh acheuvin, Paul ahehnau thu chu gamvaipo jah-a chun aseijui.

²Chuin Paul agakouvun ahile Tertullus'in ahehnan achunga thu aseipanin, Nangma vanga lungmon chungnunga kalung monuva, chule nangma vaihom them vanga hiche nam mite hi imalam jouse-a phatdoh sah-a aumu kamu jeh-in,

³Vo lal chungnung pen Felix, a-imatih chanin hoikom hoikoma jong lung kipahtah-in kasangui.

⁴Ahivangin nangma dinga theida um hiding kanompoi, kathu-u themcha kasei dingu hi nami lungsetna-a neingaipeh dinguva kataovu ahi.

⁵Ijeh-inem itile keihon hichepa hi mi sugam, chule vannoi leiset chung jouse-a Juda ho lah-a vaipi chohsea, chule Nazareth chona chonho lamkai pipu ahi kaman doh-un:

⁶Chumale houin suhboh dinga jong agot jeh-a kamatnu ahin, kadannu dung juija athu katan diu dol ahi.

⁷Ahin sepai sang lamkai Lysias'in in eihung buluvin, thahat sanna kakhut nuva konin ahung lahmangin,

⁸Ahehho nahenga hung dingin thu apen ahi. Amatah chu nangman dongtohle chun kahehnao hi adih adihlou abonchan hesoh keinan nate, ati.

⁹Chuin Juda ho jong chun ajomun, hicheng chu ahicheh-e, atiuve.

¹⁰Chuin gamvaipo chun thu sei dinga Paul akhasuh phatnin, Paul'in adonbutnin: Kum sottah nangma hiche nam mite thutana panga nahitai ti kahen, lung kipahtah-in kakihona thu seijinge;

¹¹Nangman henan natin, Pathen hou dinga Jerusalem'a kachehi ni somle nini aval hihlaije:

¹²Houin sunga mi khattoutoh kakinel, ahiloule kikhopnale kho sunga mihonpi katilsetna imacha eimupouve.

¹³Tu-a eihehnao chengse jong chu aphotchenna hiche ahi ati theipouve.

¹⁴Ahin keiman nangma jah-a kaseidoh hiche hi ahi, Amahon houdan chom asah-u lam dungjuija keiman kaputeu kapateu Pathen chu kahouva, danthua le themgaoho lekhabua kisun dungjuija chu thil jouse katahsana,

¹⁵Amaho jongin michondih jong michondih lou jong athi thokit umding ahi tia akat jingu, hitiho chu keiman Pathen lama kinepna kanei ahi;

¹⁶Hiche jeh-a chu Pathen le mihem lama suhkhel beija, ase apha hetkahna neija umdinga a-imatih chana kihabol jing kahi.

¹⁷ Chuin kum tamtah nunga kanam vaipiu min ahunau thilpeh le thilto hinpo-a hunga kahin;

¹⁸Hichea chun Asia gama Juda hon houin'a kakisuh theng chu eimuve; mihonpi toh kaumpoi, chule thunoh baotam imacha jong aumpoi.

¹⁹Amaho chu hikoma nangma anga hin umuhen, kachunga thu eihehna ding aneijule seijule hi ding ahi.

²⁰Ahiloule hiteho hin seijuhen, houvaipoloi anga kadina chu kasuhkhel ipi amatdoh-um,

²¹ Alah uva kadina kho kasapma, athiho thokit thua tunia na-ang sunguva eikikouva eikidonga ahitai, tia kasei tailou chu, ati.

²²Ahivangin Felix'in chuche Lam thudol chu ahetchet jeh-in, athu tan ding chu akhongaijin, Lysias sepai vaipipo ahung tengle nathu-u ngaito chen nange, ati.

²³Chuin aman Paul chu sepai jalamkai khat anga sah-in, chamlhat tah-a aumsah-a, ahenga hung ajenle dingle agol apaiho jong akham lou dingin athupeh-in ahi.

²⁴Chuin ni ijat-ham jouvin Felix chu a-inneipi Juda numei Drusilla toh ahungin, Paul agakou sah-in, Christa tahsan thudol asei chu angaijin ahi.

²⁵Chuin aman chonphatna, kitim them, chule khonunga hung lhung ding thupi kitan thudol asei phatnin, Felix atija jahtan, adonbut nin, Tun chetan; keiman ka-on phatle nangma hungkousah nange, ati.

²⁶Chujongle Paul chun sum eipentin kilhadoh tante tijong akinem min, phiveng vungin akousah-in ahoulim pijin ahi.

²⁷Ahivangin kum ni nungin, Porcius Festus'in Felix panmun chu ahinkhel tai; hichun Felix chun Juda ho deija umding ngaitonan, Paul chu akanin adalhatai.