Read Thado Chin Solchah 25 Bible Online

Solchah 25 - Thado Chin bible

Solchah 25

¹Festus chuche gamkai sunga ahunglhun, ni thum jouvin Ceasaria'a konin Jerusalem'a achetouvin ahi.

²Chuin thempu pipuiho le Juda miho pipuhon ajah-a Paul chungchang thu ahilou lamin anaseijun;

³Chule lampia anachanlhih uva anatha theina dingu lungthim ngaiton, ama chunga chu amaho alungsetnuva Paul chu Jerusalem'a ahinpuina dingin ataovun ahi.

⁴Ahivangin Festus'in adonbutnin, Paul Ceasaria kikoija ahi, chule keima khu lama chevah ding kahi.

⁵Hijeh chun ama khun suhkhel anei ahile, nalah uva thunei chengse keimatoh kilhonin hungsuh-uhen, hung heh-u hen, ati.

⁶Chuin amaho lah-a ni som val anichon nungin Ceasaria achesuh paijin, akit nin thutan na-a atouvin, Paul gapui dingin thu apetai.

⁷Chuin ama ahung lhun phatnin, Jerusalem'a kona hungsuh Juda ho akimvela adingun, Paul dounan thu gilou tamtah-in aheh-un, ahivanginla aphotchenna avetsah theipouve.

⁸Chuin Paul'in ama kihonna thu aseijin, Juda ho danthu ahin, houin ahin, ahiloule Ceasar douna ahin, keiman imacha kasuhset kasuhkhel aumpoi, ati.

⁹Ahivangin Festus chun Juda ho deija umding angaiton, adonbutnin, Paul jah-a, Nangma Jerusalem'a chetouva khukoma keima ang sunga hicheng thudol hi ngaito-a umding nanop em, ati.

¹⁰Ahinla Paul'in, Keima kathu kitanna dingdol Ceasar thutanna anga dinga kahi. Keiman Juda ho ima kasusepoi, nangman jong nahe sohkeinai.

¹¹Chutia akhang gilou kahia, thina theiloma suhset nei kahile, thi ding kadapoi; amavang hicheng eihehna chengseu hi tahbeh ahiloule koiman amaho khutna eipedoh thei ponte, Ceasar henga ngehna kabole, ati.

¹²Chutah-in Festus vaibol chengsetoh akihoutoh phatnin adonbutnin, Nangman Ceasar henga ngehna nabol ahitan, Ceasar heng nache ding ahi, ati.

¹³Chuin ni ijat-ham jouvin Agrippa lengpa le Bernice chu Ceasaria ahung lhung lhonin, Festus chu salam ahung boh lhone.

¹⁴Chuin chua sottah anichong lhonin ahile, Festus'in lengpa jah-a chun Paul thu umchan aseijin, Felix dalhah sohchang kihen khat aumin,

¹⁵Ama chun Jerusalem'a kaum petnin thempu pipuiho le Juda upahon athu eihetsah-un, athu tana chai dingin kahenga athumui.

¹⁶Akihehpale ahehho kimaito-a akihona thule ahehnau thudol seina neisah masanga mi koi hile thidinga pehdoh chu Rome mi chonna ngai ahipoi tia, amaho chu kana donbut ahi;

¹⁷Chuin amaho hikoma ahung kikhomun ahile, keima jong chom khatcha geisang louvin akit ni maman thutan na-a katouvin, amapa chu kagakou sahtai.

¹⁸Chuin ahehho chu akim vela adingun, akhan gitlouna thun heh-unte, tia kaginchat bang chu achunga thukhoh imacha aseipouve;

¹⁹Amaho hou thudol leh Jesu atiu mithisa khat Paul'in ahing kitne ati thudola kinel ahibouvui.

²⁰Chuin chutobang thu chu atannaje kahevah hih-in, Jerusalem'a chea chuche athu chu tan ding anop anop lou kadongin ahi.

²¹Ahinla Paul'in ama chung changthu Leng chungnung tandinga ngehna aneiphatnin, Ceasar henga kasol thei ding kahse-a koi dingin thu kapetai, ati.

²²Chuin Agrippa'in Festus jah-a, kei jong keimatah-in hichepa thu chu jaleng kalung ahi, ati. Aman, Jingle janavehta chun, ati.

²³Chutichun ajingin Agrippa Bernice toh loupitah-a ahunga, thu ngaina inpia sepai Vaipipo hotoh khopi sunga miho pipu chengsetoh ahung lut phat lhonin, Festus thusah-in Paul chu ahin puilut taove.

²⁴Chuin Festus'in, Lengpa Agrippa chule hikoma kaumpi mi jousen hichepa hi namuve, ama hi Juda mihonpin Jerusalem'a jong, hikoma jong kahenga aheh-un, ahinga umhoi ahitapoi, tin asamui.

²⁵Ahivangin athina theilom ima akhan gitlouna keiman kamudohpoi; chule aman leng chungnung henga ngehna abol jeh-in sol dinga kagot ahi.

²⁶Ahin achungchang thudol ka pakai henga gahsut ding thu kichentah ima kaneipoi. Hiche jeh-a chu na-ang uva, Vo Agrippa lengpa, nangma ang sungtah-a kahinpuidoh ahi, ijem tia athu dohtoh nunga sutding themkat kanei theina dingin:

²⁷Ijeh-inem itile akihehna thu sun louva sohchang gahsol chu kitoh kasapoi, ati.