Read Thado Chin Solchah 26 Bible Online

Solchah 26 - Thado Chin bible

Solchah 26

¹Chuin Agrippa'in Paul jah-a, nakihonna thu seitheijin nate, ati. Chutah-in Paul'in aban ajah-in, akihona thu aseijin,

²Lengpa Agrippa, Juda hon eihehna jouseu thua tunia nangma anga kakihona thu sei dinga kaum hi lungnom kaki salheh jenge,

³Ajehpen chu nangman Juda ho lah-a chonna danle kinelna thunoh jouse nahet sohkeija, nathemsoh jeh chu ahi. Hijeh chun khongai themin kathu ngaijin tia katao ahi.

⁴Kachapan laija patna kanam mite lah-a, chule Jerusalem'a kanunchan kakhanchan chu Juda hon ahe sohkeijui;

⁵ Atila patna ahet sohkeisao ahi jeh chun, kahou danuva chondan khelpentah dungjuija kachona Pharisai chona kachon chu sei nomleu asei thei dingu ahi.

⁶Chule tu-a hi kapu kapateu Pathen'in athutep chu kineppi jeh-a athu kitan dinga hikoma ding kahi:

⁷Hiche thutep chu mu ding kinema, phung somle phung ni hin gunchu tah-a asun ajana Pathen ahouvu ahi; hiche kinepna jeh-a chu, Lengpa Agrippa, Juda hon eiheh-u ahi.

⁸Pathen'in athiho akaithouve ti ibola nanghon tahsan umlouva nangaitou ham?

⁹ Keiman jong Nazareth Jesu min douna hin thil tamtah akaleh-a bol ding ahi tin kangaiton ahi.

¹⁰Chule hichu Jerusalem'a bol jong kabolin, chule thempu pipuiho-a konin thuneina kamun, mithengho tamtah songkul'a kakhumin, chule athao jong chun kaphasah-in ahi.

¹¹Chule kikhopna in jouse-a talent kape jingjin, engsanin kataitomsah-in, achunguva chun kalungsa tuntun jengin, migam dang khopi gei sanin kabolsen ahi.

¹²Hitichun thempu pipuiho-a konin thuneina le eisolnao lekha kamun, Damascus lama kachen ahi.

¹³Hichun, vo lengpa, sunkim tah-in lampia chun van'a kon vah khat nisa sanga vahjo kamun, hichun kakimvel le kalhonpiho chengse asalvahsoh jenge.

¹⁴Chuin tolla kalhuh gam phatnun, keiman Hebrew paova kajah-a, Saul, Saul, ibola nangin neibolset jingham? nang dingin thihtul monghem lho ahahsai, eitia aw khat kajai.

¹⁵Chuin keiman, Pakai, nang koi nahim? katile Pakai chun, Keima nabolset jing Jesu kahi.

¹⁶Ahivangin thouvin chule nakengin pansan dingin; nangman thil namusa chengse le khonunga nahenga kaphondoh ding chengsea kathu hettohsah dingle kalhacha-a pansah dinga, hiche dinga chu nahenga kahung kilah ahi;

¹⁷Kamiteho-a konle, tu-a kasolna chidang namdang ho-a kona kahuhdoh ding nahi;

¹⁸Amitnu hadohsah dingle muthim lah-a kona khovah-a, chule Satan thuneina noija aumuva kona Pathen henga akihei theina dingule, achonsetnao akisuhbeija, keima eitahsan vanga kisuthengho lah-a gou alo theina dinguva ahenguva kasol ding nahi, eiti.

¹⁹Hijeh chun, vo lengpa Agrippa, keima vanthil kamu thua chu nung louvin kaumpoi;

²⁰ Ahin amasan Damascus-a umho jah-a, chuin Jerusalem le Juda gam pumpi, chule chidang namdangho henga jong lung aheijuva Pathen lama akiheijuva, lungheitoh kilom thil abolna dingun kaseiphong letan ahi.

²¹Hijeh-a chu Juda hon houin sunga eimat uva tha dinga eigotnu ahi.

²²Pathen'a kona panpina kanei jeh-a tuni geija kadina, alen aneo kahetsah ahi, thu dang ima kaseipoi, themgaoho le Mosi'n hung ding ahi tia aseiju,

²³ Christa chun gim genthei athoh tei dingje, athiho lah-a thoudoh kit amasapen ahia; amite le chidang namdangho henga vah aphondoh dingje kaseibou chu ahi, ati.

²⁴Aman chutia akihona thu aseija adonbut chun, Festus chun aw sangtah-in, Vo Paul, angola nahi; nalekha them sangin nasuhngol ahitai, ati.

²⁵Ahin Paul'in, Vo michung nung Festus, angola kahipoi; thudihtah le chihna thu kaseijoh ahibouve.

²⁶Ijeh-inem itile lengpan jong hiche thudol hi ahei; hijeh-a chu ama ang sunga ngamtah-a kasei ahi; ajeh chu hiche hi ningkoija kibol ahilou jeh-in, ama jah-a ki-ima imacha aumpoi ti chentah-in kahei.

²⁷Leng Agrippa, nangman themgaoho thuhi natahsan em? Natahsane ti kahei, ati.

²⁸Chuin Agrippa'in Paul jah-a, thu themcha-a jollhah-a Christian hisah ding neigoi, ati.

²⁹Chuin Paul'in thu themchan hihen thu tampin hile, nangma chang hilouvin, tunia kathusei ja jouse hi kakikan naho tailou hin, abonchan keimatoh bangleu tin Pathen henga kathume, ati.

³⁰Chuin aman chutia aseiphat chun, lengpa, gamvaipo, Bernice chule atoukhompi ho setoh akipat doh-un,

³¹Chuin achoma acheuvin akihouvun, Hichepa hin thina hoile kanna dingdol thil ima asuhkhel aumpoi, atiuve.

³²Chuin Agrippa'n Festus jah-a, Hichepa hin Ceasar henga ngehna abolou hile, lhadoh thei ahi, ati.