Read Thado Chin Solchah 27 Bible Online

Solchah 27 - Thado Chin bible

Solchah 27

¹Chuin kong'a kitola Italy gama kache dingu thu akichet phatnin, Augustus sepai loi lah-a Julius atiu sepai jalamkai khutnah Paul le sohchang dangho apedoh taove.

²Chuin Asia gamkolvel muntina kitol dinga kigo Adramyttium kong'a kalutnun kakitol taove; chule Macedonia gama Thessalonica mi Aristarchus toh kalhonui.

³Akit nin Sidon kho-ah kong kangaove. Chule Julius'in Paul alungsetnin, agol apaiho henga chea gakithado dingin asole.

⁴Chuin chua kon chun twi chunga kacheuvin, hui akaleh lama anun jeh-in Cyprus twikol le lam lamah kakitol taove.

⁵Chuin Cilicia le Pamphylia depma twikhanglen kakhelun, Lucia gama Myra khopi kalhungui.

⁶Chukoma chun sepai jalamkai chun Italy gam jon ding Alexandria kong khat amudoh-in, hi chun eikhum taove.

⁷Chuin sottah olchachan kakitolun, hahsa tah-in Cnidus jon kagei hamhamui, huijin einan jeh-un Salmone gam Crete twikol le-a kakitolui.

⁸Hitichun nahnah-in Lasea khopi kom Kaimunhoi atiu mun khat kalhungun ahi.

⁹Chuin akisot behseh tahjeh le kong'a kitol setto kichat aum jeh chun (hichu an ngol kichai jou ahitan), Paul'in amaho chu akhamin,

¹⁰Vo miho, hiche twi chunga icheuva hin setto hakamna inei dingu ahi kamui; hichu thilkeole kong keo jeng hilouvin, eiho ding jengin jong setto kichat aume, ati.

¹¹Ahivangin sepai jalamkai chun Paul thu sangin kong pipu thule akong neipa thu ahajop jotan ahi.

¹²Chuin phalbi-a umna dinga kongkai mun chu akijen lou jeh-in, mi atam jon hikoma kona chu kitoldoh-a Phoenicia lhun teiteija, chukoma chu phalbi sunga umding asomtaovin ahi. Phoenicia chu Crete twikol gama kongkai mun khat ahin, lhumsah le lhumlhang angatto ahi.

¹³Chuin lhang hui olchachan ahung nungin ahile, alunggot bangu hin angaitouvin, kong chu alhaovin Crete pam chin chinah atoltauve.

¹⁴Ahivangin chujou chomkhat jouvin, chua kon chun Euroclydon [6] atiu huipi hattah ahung nungsuh tai.

¹⁵Chuin kong'a chun ahung chutan ahile malama atoljou tapouvin, kamoh lhatauvin ahile eilhoh eilhoh jengtaove.

¹⁶Chuin amin Clauda atiu twikol neocha khat-ah kalhaijun, hahsa tah-in kongneo chu kahuhbit nahnah-un ahi.

¹⁷Chuin hichu akhaidoh-un ahunan amangun, khaovin kong noi lamah akanbeh taove. Chuin ajole Syrtis nel lah-a kileng lut getninte ti akichauvin, pondal kikhainaho alalhauvin ahile eimoh lhoh lhohtaove.

¹⁸Chuin huipi chun eisuhgim behseh jeh-u chun, akit nin thil apaidoh pantaove.

¹⁹Anithum nin keihotah-in kakhut tah-un kong manchah ho chu kapai taovin ahi.

²⁰Chuin ni tamtah nisa chule ahsi ho eisalvah-u beihela huipi hat nasatah tang louhela anun anun phat chun, hichea pat chun kisohcha inte ti kinepna aumtapon ahi.

²¹Chuin ni tamtah an nelouva aum phatnun, Paul alah uva adingin: Vo miho, nanghon hiche settole hakamna hi to louna dinga kathu nangai uva, Crete'a kona chu kong hi nalha lou dingu thu ahi.

²²Ahivangin tu-a jong lungmong tah-a umdinga katil nahiuve; nalah uva koiman nahinnao nachan lou dingu ahi, kong vanghi mang ding ahi.

²³Ajeh chu Ama-a kahia, alhacha kapan Pathen chu a-vantil tujan chun kakoma adingin,

²⁴Vo Paul, kicha hih-in; Ceasar anga nadin tei ding ahi; chule ven, nalhonpi ho chengse hi abonchauva Pathen'in nangma napehdoh ahitai, eiti.

²⁵Hiche jeh chun, vo miho, nangho lungmongun; ijeh-inem itile Pathen katahsanin, kajah-a asei bang banga chu hung soh tei ding ahi.

²⁶Amavang twikol khatna ichuh tei dingu ahi, ati.

²⁷Chuin Adria twikhanglen'a huijin eisuhtol eitoutolu ajan somle ajanli jan-in, khangkimin kong mihon gamlei kinaija hitante ti agingchauvin,

²⁸Hichun twi athuh chu ateule lam somni atedoh-ui; chuin phabep ache chonun ate kitleuvun ahile lam somle lam nga atedoh-un,

²⁹Song lah-a kikisunte ti akichauvin, kong tom lamah thihhat li aseplhaovin, khovah angahtauve.

³⁰Ahivangin kong miho chu kong mai lama thihhat seplha ding beh akisauvin, kongneo twikhanglen'a adomlhauvin, jam ding lungthim angaito taovin ahile,

³¹Paul'in sepai jalamkai le sepaiho jah-a, amaho khu kong'a aum louvule nangho changin sohchathei pouvin nate, ati.

³²Chutah-in sepaihon kongneo ho khao chu asattan un, twi lah-a alhataove.

³³Chuin jing khovah konin Paul'in miho chu annen asolin, nanga nangaova an ngola imacha ne louhela na-umnao tuni nisom le nili ahitai,

³⁴Hijeh-a chu an ne-a kasol nahiuve, hichu nakihinsona dinguva phachom ding ahi; ijeh-inem itile nalu chunguva nasamjangu khatcha jong lou louding ahi, ati.

³⁵Hitia chu asei jouvin, aman changlhah alan mi jouse ang sungah Pathen alhaijin, changlhah ahehbalin ane pantai.

³⁶Chutah chun miho jouse chu abonchauvin alung ngamun, an anecheh taove.

³⁷Kong'a uma chu mihing jani le somsagi le gup kahiuve.

³⁸Chuin miho chun an anehva phatnun, suhlouchang chu twi lah-a apaijun, kong chu asujangkhai taove.

³⁹Chuin khovah phatnin agamlei chu ahetapouve; ahivangin twipang kong ngahna thei khat amudoh-un, ahitheile kong chu chukoma tol lut ding tin akihousom taove.

⁴⁰Chuin thihhat ho alhalhaovin, twikhanglen'a adalha taove; chuin hichutoh thakhatnin kongkhe kanna chu alham lha uvin, hui chena lama kong ponjal chu atungdoh-un, twipang lam chu ajon taove.

⁴¹Chuin twikinong ni kisuhto na-a kalut khataovin ahile, kong monghem chu leija akiphut dentai; chuin kong mai lam chu long louhelin a-ohdentan, kong meilam chu twikinong chun hasuh-a asuhle akeh pantai.

⁴²Chuin sepaihon sohchangho chu twi jap gal kaija ajama umget inte atiuvin, tha dingin agotauve.

⁴³Ahivangin sepai jalamkai chun Paul chu huhhing agon bol dinga alung gotnu chu akhamin, twi jap thei theijan twi jap galkaihen, vapam anakai masahen;

⁴⁴Adang amohse kong'a um khunpehle thil dang dangin kitol galkaihen, tin thu apetai. Chutichun abonchauvin bitkeijin asohchaovin, tolgo alhung taove.