Read Thado Chin Solchah 28 Bible Online

Solchah 28 - Thado Chin bible

Solchah 28

¹Chuin kasochat phatnu chun twikol chu Malta kiti ahi ahedoh taove.

²Chule paomah hammah ho chun khoto mainah-in eikhoto pouve; hiche pet chu gojuh lai ahin adap jeh chun mei eitipeh-un eilhunsah sohkeijui.

³Ahin Paul'in thing lom khat achoma meija chu agahtoleh, meisahula kon chun gulse khat ahungdoh-in, akhut achun akikhaiden jengin ahi.

⁴Chuin paomah hammah hochun gul akhutna akikhaiden jeng chu amuvin, khatle khat akihouvun, Hichepa hi tolthat mong ahi, twikhanglen'a asochat jeng vanga hi, thudih tannan ahinghoi dehlou ahi, atiuve.

⁵Chuin aman gul chu mei sunga chun athinglhan, a-ima aloupoi.

⁶Ahivangin amaho chun hung pomintin, ahiloule phulou helouvin lhuntin, thi ding ahi, tin angah jingun ahi. Ahinla sottah angauva avet jouvun a-ima alou lou chu amuvin, alung gelu akhelun, ama chu pathen ahi atitaove.

⁷Hiche mun koma chu twikol gam pipu amin Publius atiu chun gam anei ahin; ama chun eila lutnun, khotona nei tah-in ni thum a-in'a eilhun sah-un ahi.

⁸Chuin Publius pa chu khosih le ehthit veija luma ahin; chuin Paul akoma agalutnin, achunga akhut angamin ataovin adamsahtai.

⁹Chutia abol jou chun, chuche twikol gam sunga midang ana nei jouse ahungun ahile adam gamtaove.

¹⁰Amaho chun lamchom chomin eijabol lheh jengun, kong'a kakitol phatnun thil kangaichat ding dolchanu kong-ah eihung koipeh-ui.

¹¹Chuin lha thum jouvin phalbi sungse-a twikol'a chu cham, amelchihna Ucha Sohkop [7] atiu Alexandria kong'a chun kakitoldoh taove.

¹²Chuin Syrakuse'a kakingaovin, chukoma chun ni thum kaumui.

¹³Chuin chua kon chun kache velkolun Rhegium kalhungui; chuin ni khat jouvin lhanghui anungin ahile akit nin Puteoli kalhung taove.

¹⁴Hikoma chun sopiho kamudoh-un, akomuva ni sagi nichong dingin eijolui. Chuin chutichun Rome lam ngan kachetauve.

¹⁵Chuin chua kon chun sopihon keiho thu ajah phatnun Appii kailhang le Jinlhun In Thum geijin eilamto diuvin ahungui. Chuin Paul'in amaho chu amu phatnin Pathen athangvah-in alung ngamtan ahi.

¹⁶Chuin Rome khopi kahunglhun phatnun, sepai jalamkai chun sohchang ho chu angahho jalamkai khutna apedoh-in, ahin Paul chu achanga sepai angahpa chuto umdingin thu apetaove.

¹⁷Chuin ahitin ahi, ni thum jouvin Juda ho lah-a apipuho chu akou khomin; chuin amaho ahung kikhop phatnun ajah uva: Sopiteho, keima inam miteu dounale ipu ipateu dan douna-a ima kasuhset aum lou vangin, Jerusalem'a kona Rome mite khutna sohchanga pehdoh-a um kahitai.

¹⁸Kathem kathemlou aholtoh-un, thina hoi ima kachunga amudoh lou jeh-un, lhadoh dingin eigotaovin ahi.

¹⁹ Ahivangin Juda hon hichu anel jeh-un, kacham louvin Ceasar henga ngehna kaboltan ahi; hichu kanam mite hehna dinga ahipoi.

²⁰Hiche jeh-a chu nang hotoh kimuto-a kihoulim dinga kakou nahiuve, ijeh-inem itile Israelte kinepna jeh-a thihkhaova hi kihen kahibouve, ati.

²¹Chuin amahon ajah-a, Keihon nangma thudol Juda gama konin lekha kamupouve; chule sopiho lah-a jong koima hikoma ahungin nangma chung changa khan gitlouna thu hung lhut aumpoi.

²²Ahivangin nangma lung ngaito thudol hi nanga konin kajah nomui: ijeh-inem itile hiche houchom thudol hi gamtina seisetna aum kaheuve, atiuve.

²³Chuin nikho ateppeh-un, aumna-a chun ahenga atama tam ahungun, aman jingkah-a pat nilhah geijin Mosi danthu le themgaoho lekhabua konin thu asodoh asodoh-in, Pathen lenggam thu ahettohsah-in, Jesu thudola ajoltan ahi.

²⁴Chuin athuseiho chu abangin atahsanun, abangin atahsan pouve.

²⁵Chuin amahole amaho akilol thei lou phatnun, Paul'in thu khat asei jouvin apotdoh taove; athusei chu hiche hi ahi. Lhagao Thengin themgao Isaiah kama napu napateu jah-a, asei chu adih lheh jenge,

²⁶ Hiche mite henga hin chenlang gaseijin: nanghon ja vang ja naovin natin, nahet them lou dingu; muvang munao vin natin, nahetdoh lou dingu ahi;

²⁷Ajehchu hiche mite lungthim hi thaova kitom ahin; ana khangun kho ajathei pon, amitnu asingun ahi, chutilou hile amitnun muvintin, anakhangun ja-intin, alunguvin hetdoh untin hung kilekit khaleu, Keiman amaho chu kadamsah khahding ahi; tia, asei chu ahi.

²⁸Hiche jeh chun hiche hi kihet un, hiche Pathen mihuhhing na hi chidang namdangho henga kisola ahitai; amahon ngai jong angai dingu ahi, ati.

²⁹Chuin thu hicheng chu aseiphat nin, Juda ho apotdoh-un amaho le amaho hatah-in akinel taovin ahi.

³⁰Chuin aman inman apeh-a achenna-a chun kum ni lhingset aumin, ahenga hung jouse chu anasangjin,

³¹Pathen gam thu ahil lhangjin, hakattah-in Pakai Jesu Christa thudol ahiljin, koimachan akhampon ahi.