Read Thado Chin Solchah 4 Bible Online

Solchah 4 - Thado Chin bible

Solchah 4

¹Chuin miho jah-a athusei pet lhonin, thempuho, houin vaipopa, chule Saddukai ho chu achung lhonah achuvin,

²Mi thu ahilhon le, Jesu vanga athi lah-a kona thokit thu ahil lhon jeh chun, alungphamo lheh jengui.

³Chuin amani chu amanun, nilhah ahitah jeh chun, ajinga dingin mihenna in'ah akhumtaove.

⁴Ahivangin athu jaho mi tamtah-in atahsanun; chule amijat chu sangnga jen ahiuve.

⁵Chuin ahitin ahi, ajingin avaipoho chengseutoh, a-upaho chengseu, chule danthu sunho,

⁶Anna thempu chungnung toh, Caiaphas, John, Alexander, chule thempu chungnung inkote chengse toh Jerusalem'a akikhom khomun ahi.

⁷Chuin alailung uvah amani chu atungun, Ipi thuneina le koi mina hiche hi nabol lhonham, tin adongui.

⁸Chutah-in Peter Lhagao Thengin adimsetnin ajah uva, Nangho, miho chunga vaipoho le Israel upaho,

⁹Tunia hiche michatmo pa phatna dinga thilpa kibol thua, hichepa ipi-a iti kiboldam hela hitam, tia eikidonga ahitah-a ahile,

¹⁰Nabonchaovin kihet cheh-un, chule Israel mi jousen hecheh hen, nanghon thingpel'a nakhetbeh-u Nazareth Jesu Christa, Pathen'in athiho lah-a kona akaithou, ama mina chu ama hi na-ang uva dama dinga ahitai.

¹¹ Nangho insahon nadei mouva napaiju song, aninga apipena panga chu, ama hi ahi.

¹²Chule koima dangah huhhingna aumpoi; ijeh-inem itile vannoi'a mihemte lah-a huhhing-a iumna dinguva kipe-a min dang aumpoi, ati.

¹³Chuin Peter le John hakatje chu amu phatnun, lekha themlou ahi lhonle mimol ahi lhon chu aheuvin, adatmo lheh jengui; chule amani chu Jesu toh kivopsa ahi lhon chu ahedoh taove.

¹⁴Chule mi akiboldampa chu amahotoh adin khom jing chu amuvin, adounan imacha aseithei tapouve.

¹⁵Ahivangin amaho chu akikhop naova kona chu achoma gaumdoh dingin asoldoh-un, amahole amaho akihouvun,

¹⁶Hiche miho hi iba ilo dinguham? Amahon thil bolmo kidang datmotah abolu hila Jerusalem'a cheng mi jouse hetnin akiphong dohtan; eihon jongla ahipoi tin inel theipouve.

¹⁷Hijongle hiche hi miho lah-a achal cheh cheh louna dingin, tukala Jesu mina hi thu asei kit louhelna dingun hagih-in gihsal uhite, akitiuve.

¹⁸Chuin amani chu akouvun, Jesu mina thu aseija asei louhelna dingule, mi ahil louhelna dingun akhamchah taove.

¹⁹Ahivangin Peter le Johan in adonbut lhonin ajah uva, Pathen thu sanga nangho thu ngaijoh chu Pathen mitmu-a dihnam, nanghon geltoh-un.

²⁰Keiho vang thil kamu chengseu le kajah chengseu sei louvin kaum theipouve, ati lhone.

²¹Chuin amahon agihsal kitleuvun alhadoh taove, mipi jeh chun talent pehnaje ahepouve; ijeh-inem itile thil kibol jeh chun mi jousen Pathen avahchoijun ahi.

²²Ajeh iham itile bolmo kidangtah kibolna-a kiboldam mipa chu kum somli chunga mi ahi.

²³Chuin akilhadoh phat lhonin, aloiho henga ahung lhonin, ajah uva thempu pipuiho le upaho thusei chu alhut lhonin ahi.

²⁴ Chuin amahon hichu ajahtah-un, aw sangtah-in, lungkhat tah-in Pathen asamun, Vo Pakai, nangma vanle lei chule twikhanglen, chule asunga um jouse sema Pathen nahi;

²⁵ Nangman nalhacha David kamsunga, Namtin vaipi ibola lunghanga hiuvam? chule ibola mihon mohthil angaitou ham?

²⁶Pakai le a-Christa chunga chun, Leiset chunga lengho apang golun, Chule avaipoteu akikhomui; tia nasei dohsah ahi.

²⁷ Atahbeh-in, nangma thaonu nalhacha Theng Jesu dounan, Herod le Pontius Pilate, chidang namdangte toh Israel miho toh,

²⁸Hung guilhung dinga nakhutle nalung thimin agonmasah chengse chu boldingin akikhomun ahi.

²⁹Tun, Pakai, ami gihsalnao hi vetan; chule nasohte hin hakat tah-a nathu aseina dingun;

³⁰Nalhacha Theng Jesu mina melchihna le bolmo kidang dang abolna dingun, mi damsahna dingin nakhut lhangin atiuve.

³¹Chuin amaho atao jouvun, akikhopnao chu ahung kilingin, abonchauvin Lhagao Thengin adimun, hakattah-in Pathen thu aseitaove.

³² Chuin mipi atahsan chengse chu lungkhatle thakhat ahiuvin; khatchan jong anei chu keija tum ahi tilouvin; thil jouse abonchan neilhangin aneitauve.

³³Chuin solchah ho chun thahat chungnung tah-in Pakai Jesu thokit thu ahettohsah jiuvin; abonchauva chungah lungsetna nasatah aumtan ahi.

³⁴Alah uva jong koima alhasama aumpouve; ajeh chu gam ahiloule in nei jouse chun ajoh-un, chule athil joh manhou chu achoijun,

³⁵Solchah ho keng bulah ahung koijiuvin, akin toh khambep cheh-in akihom jiuvin ahi.

³⁶Chuin Levi phung mi, Cyprus twikol gam mi Joseph, solchah hon Barnabas asah-u (hichu lungmonna chapa tina ahi) chun,

³⁷Lou ching khat anei chu ajoh-in, sum chu achoijin solchah ho keng bulah ahung koijin ahi.