Read Thado Chin Solchah 5 Bible Online

Solchah 5 - Thado Chin bible

Solchah 5

¹Ahin mi khat amin Anania kitipa chun a-inneipi Sapphira toh anei khat ajoh lhonin,

²Aman alang akikoijin, hichu a-inneipin jong ahet ahin, alang chu ahin choijin solchah ho keng bulah ahung koijin ahi.

³Ahinla Peter'in, Anania, ibola gam man chu alang kikoija, Lhagao Theng najoulhep dinga Satan'in nalung sung alodim hitam?

⁴Aum laija chu nanga tum hilouham? Chule najoh nunga jong chu nangma thu neina-a um hilouham? Ibola hitobang hi lunga vop nahim? Nangman mi najoulhep ahipon, Pathen najoulhep ahibouve, ati.

⁵Chuin thu chucheng chu ajah jah chun Anania chu alhun athitai. Chuin aja jouse chunga chun kichatna nasatah achutan ahi.

⁶Chuin gollhangho akipat doh-un atomun, apudoh-un, agavui taove.

⁷Chuin chuche jou nidan thum tobang nungin a-inneipi chu thilsoh umchan hepha louvin, ahung lutjelin ahi.

⁸Chuin Peter'in adonbutnin, ajah-a, Hijat manseh bouva hi gam chu najoh lhonham? atile amanun, Ahi, hijatbou chu ahi, ati.

⁹Ahinla Peter'in amanu jah-a, I-atile Pakai Lhagao patep dinga naki thukop lhon hitam? Ven, na-inneipu vuiho kot bul ahung geitaove; amahon nang jong naputdoh dingu ahi, ati.

¹⁰Chuin amanu chu chupettah chun akeng bulah alhun athipaitai. Chuin gollhangho chu ahung lut ule amanu athi chu ahung mu uvin, apudoh kitnun, a-inneipu komah agavui taove.

¹¹Chuin houbung pumpi chungle chucheng thu jaho jouse chungah kichatna nasatah achutan ahi.

¹²Chule mipi ho lah-a melchihna le thil kidang tamtah solchah ho khutna konin akibol jengtan ahi. Amaho chu lungkhat tah-in Solomon kempum'a chun aumun ahi.

¹³Ahin midang koimachan amaho lah-a lhah ding chu angapchapon ahi: ahinla mipin amaho chu avesang lheh-ui.

¹⁴Chule atahsana numei le pasal Pakai henga akibelap jengun;

¹⁵Chutitah chun Peter avale komle ale beh mi phabep chunga achuhna dingin, damlouho khosung lamlenah ahinpouvin jalkhun le talaijah alupsah jiuvin ahi.

¹⁶Chule Jerusalem kimvela khopiho-a konin mipi chu ahung khomun, adamlouho le lhagaoboh bolgimho ahinpuijun ahile, abonchau chun boldamin aumjitaove.

¹⁷Ahin thempu chungnungle aloiho jouse (amaho chu Saddukai loi ahiuvin), lunghan nan adimun,

¹⁸Akipat doh-un, solchah ho chu amanun, jalhang henna-a ahentauve.

¹⁹Ahinla jan-in Pakai vantil'in kot ahongin, amaho pamah apuidoh-in, ajah uva,

²⁰Cheovinlang houin'ah gadingun, hiche hinna thu jouse hi miho gahilun, ati.

²¹Chuin hichu ajah phatnun, ajing khovah matah-in houin'a alut paijun athu ahiltaove. Ahin thempu chungnung chu aumpi aloihotoh ahungin, houvaipoloile Israel chate a-upaho chengseu akou khomin, khatteho chu gapui dingin songkul in'a chun mi asoltan ahi.

²²Ahinla sottol hochu ahunguva songkul sunga ahung mulou phatnun, amaho akileuvin ahenguva,

²³Songkul inla bitkeijin akikhahchahnan, angahho jong kotphunga adin jingu kagatoh-un, kot kahonule asungah koima kamutapouve, agatiuve.

²⁴Chuin thempu chungnungle houin vaipo, chule thempu pipuihon thu hicheng chu ajah phatnun, hichea kon chun ipi ahung sohdoh tadem, tin achung changuvah alung dong lheh jeng taovin ahi.

²⁵Chuin mi khat ahungin ajah uva, Veuvin songkul'a nahenhou chu houin'ah adingun miho thu ahilui, ahung ti.

²⁶Chutah-in vaipo chu sottol hotoh akonun kangchan agapuijui; ajehchu miho chun songin eisep getnunte ti akichatnu ahi.

²⁷Chuin apuilut phatnun, amaho chu houvaipoloi ang sungah adinsah-un: chule thempu chungnung chun amaho chu adongin,

²⁸ Hiche min hin mi hildaovin, tia hachang khama kakhamu nahiu hilouham? ahin veuvin, nathuhilu Jerusalem nadipsoh taove; chule hichepa thisan phu hi keiho chunga chuhsah dingin nagouve, ati.

²⁹Ahivangin Peter le solchah ho chun adonbutnun, Mihem thu sanga Pathen thua kanunjoh dingu ahi.

³⁰Ipu ipateu Pathen'in nanghon thinga nakhai uva natha-u Jesu chu akaithou tan ahi.

³¹Ama chu Pathen'in Israelte lungheina dingle chonset ngaidamna dinga, Pipui le Huhhingpu hidinga akhut jetna achoisang ahitai.

³²Chule hitiho-a hi Ama dinga ahetoh-a keiho kahiuve; chule athua nungho dinga Pathen'in apeh Lhagao Theng jong chu ahi, atiuve.

³³Ahivangin amahon hichu ajahtah-u chun alungchang kikaldoh abang jengun, tha dingin agotauvin ahi.

³⁴Ahivangin houvaipoloi lah-a mi khat, Pharisai mi, amin Gamaliel, danthuhil, mijousen ajalheh ahin, adingdoh in, solchah ho chu chom chakhat soldoh dingin thu apetan ahi.

³⁵Chuin aman ajah uva, Nangho Israel mite, hiteho chunga nathil bol gotnu hi chingthei jun.

³⁶Ijeh-inem itile tumasang lai chun Theudas kiti mi khat asohdoh-in, ama chun milen kahi atin; ama henga chun mi ja li jen akaijin; chuin ama chu athat taovin ahile, athua nungho jouse chu acheh gamun, ima hilou asohtaove.

³⁷Hichepa jouma chun, min kisut laijin, Galilee gama Judas aumdoh kitleuvin, ahenga mi kimkhat aloimangin; ama jong chu amangthah-in, athua nungho jouse jong acheh gamtaovin ahi.

³⁸Chule tu-a kaseipeh nahiuve, Hiche miho-a kon khun kikhin dalun, limsah daovin; ijeh-inem itile hiche thil kingaito le thil kibola hi mihem phudoh ahile, suhmangin hung umnante.

³⁹Ahivangin Pathen'a kon ahile, sumangjou pouvin nate; ajole Pathen kidoupi hikha getnun nate, ati.

⁴⁰Chuin ama sei chu aphatsah-un, solchah ho chu akouvun, avovin, Jesu minin thu sei kit hihhelun tin akhamun, alhataove.

⁴¹Hitichun houvaipoloi anga kon chun achedoh-un, Amin jala jachatna thoh dinga kiloma sim ahi jeh-un, akipah lheh-un ahi.

⁴²Chuin niseh-in houin le in tinah Jesu Christa thuhil le seiphong atangdeh pouve.