Read Thado Chin Solchah 6 Bible Online

Solchah 6 - Thado Chin bible

Solchah 6

¹Hiche lai chun seijui ho amijat apunbe cheh cheh phatnun, niseh thil kihoma ameithaiteu adon lou jeh-un, Hebrew ho chunga Greek gam Juda ho aphun taovin ahi.

²Chuin somleni ho chun seijui mipi chu akou khomun, Keihon Pathen thu pailhah-a anneh thulam jeng kangaito dingu chu adol ahipoi.

³Hijeh chun, sopite, hiche kina hi kapansah thei dingu, nalah uva konin seiphat chang, Lhagao Theng le chihna dimset mi sagi lhengdoh-un;

⁴Ahin keiho vang taona le thu lhacha-a kapandet jing jeng dingu ahi, atiuve.

⁵Hiche thua chun mi jouse chu alunglhaijun, tahsan le Lhagao Thenga dimset Stephen toh, Philip toh, Prochorus toh, Nicanor toh, Timon toh, Parmenas, chule Juda chona chon Antioch kho-a Nicolas, hicheng chu alheng doh-un,

⁶Solchah ho angah adinsah-un; chuin atao jouvun, achunguvah akhut angam taove.

⁷Chuin Pathen thu chu ahung chaljal tan, chule Jerusalem'a seijui ho amijat hapunin apung lhehjeng taovin; thempuho jong tamtah tahsan thun anung taovin ahi.

⁸Chuin Stephen chu tahsanna le thilboltheina dimin, mi lah-a thil kidang le melchihna loupitah aboljin ahi.

⁹Ahivangin Libertine [1] kikhopna atiu kikhopna-a miho phabep, (Cyrene mi, Alexandria mi, chule Cilicia mihole Asia gam miho) akipat doh-un, Stephen chu akinelpi taove.

¹⁰Ahivangin aman Lhagao le chihna-a athusei chu anelthei tapouvin ahi.

¹¹Chuin amahon mi atilgu uvin, Hichepa hin Mosi le Pathen ataitom kajauve ati sah-un ahi.

¹²Chuin amahon mipi ho, upaho, chule danthu sunho chu atilseuvin, Stephen chunga achuvin, amanun, houvaipoloi henga akaijun ahi.

¹³Amahon hettohsah lhem asemun, hicheho chun, Hichepa hin hiche Intheng hile dan hi tanglouva ataitomjia;

¹⁴Hiche Nazareth Jesu hin hiche Intheng hi aphet lhah-a, Mosi danthu peh hi abol lamdang ding ahitai, tia asei kajauve, atiuvin ahi.

¹⁵Chuin vaihom na-a touho jouse chun, amachu ave veuvin ahile, amaiso vantil maiso bangin amuvin ahi.