Read Thado Chin Solchah 7 Bible Online

Solchah 7 - Thado Chin bible

Solchah 7

¹Chuin Thempu chungnung chun, Hiche thuho hi atahbeh ham? ati.

² Chuin Stephen'in, Sopite le pate, ngaijun: Ipuluiju Abraham Haran kho-a achen masanga Mesopotamia gama aum laijin, loupi Pathen ahenga akilah-in ajah-a,

³Nagam sunga kon le na-insung mite lah-a konin kipatdoh-in, chule keiman kavetsah ding gama hungin, ati.

⁴ Chutah-in ama Chaldia gama konin ahungdoh-in, Haran'ah achengtan ahi; chuin hia kon chun apa thi nungin, Pathen'in, tu-a nachennao, hiche gama hin achenlut sahtai.

⁵ Ahin chua chun Pathen'in akengto ngapna kham jong mun alo ding apepoi. Ahivang chun amale anunga asonho geijin alo dinguva kapeh ding ahi tin, chapa anei loulai peh chun athutep tan ahi.

⁶ Chuin Pathen'in, asonho chu hetlou gama pem ding, chule amahon soh-a aloilut dingu, chule kum jali jen kinomsahna anei dingu ahi, tin anaseijin ahi.

⁷ Chule asohchan nateu vaipi chu keiman athu-u katan ding; chuche joule hung potdoh uva, hiche kom mun'a hi keima eijen dingu ahi, ati.

⁸ Chuin kitepna cheptan thu apen; chutichun Abraham'in Isaac ahingin, aniget nin achep atanin; chuin Isaac chun Jacob ahingin, Jacob'in pului somleni chu ahingin ahi.

⁹ Chuin puluiho chun Joseph chunga thangset abolun, Egypt gama ajoh mangun; ahinla Pathen'in ama chu aumpin,

¹⁰ Agim agentheina jouse-a konin ahuhdoh-in, Egypt lengpa Pharaoh ang sungah khotonale chihna apen, chuin aman Egypt gam chungale, ama insung jouse chunga gamvaipon apansahtai.

¹¹ Chuin Egypt gam sung jousele Canaan gama kel alhan, gentheina chungnung tah alhungin ahile; ipului teovin neh ding amu tapouvin ahi.

¹²Ahivangin Jacob chun, Egypt gama anneh aume ti ajah jah-in, ipu ipateu chu amasa penin agah soldoh-e.

¹³ Chuin aniveina-in Joseph chun asopite chu akihetdoh sahtan ahile, Joseph insungmi chu Pharaoh hetchenin aumtai.

¹⁴ Chuin Joseph'in mi asolin, apale a-inkote abonchan mi somsagi le nga chu ama heng lamah agakou sahtai.

¹⁵ Chuin Jacob Egypt lama achesuh-in; chuin athitan, ipu ipateu jong athi taove;

¹⁶ Chuin alongu chu Shechem'a apo galkaijun, Abraham'in Shechem'a Hamor chapatehoa kona dangka-a achoh lhana chun alupsah taove.

¹⁷ Chuin Pathen'in Abraham athutep chu aguilhun aphat alhin konin, miho chu Egypt gama apungun atamcheh atamcheh jengun,

¹⁸Joseph hephalou leng chom khat Egypt gam chunga avaipoh gei chun.

¹⁹ Hichepa chun ivaiju dohathemin abolin, ipu ipateu chu abol gentheijin, achasen hou chu ahin louna dingin apaidoh sah jin ahi.

²⁰ Hiche lai chun Mosi apengin ahile, Pathen'a dingin ahoi lheh jengin; apa in'ah lha thum avah-un;

²¹ Chuin ama akoidoh phatnun, Pharao chanun akilahdoh-in, achapa dingin akivahtan ahi.

²²Chuin Mosi chu Egypt miho chihna le themna jouse ahilun; chuin ama chu thu le thilbolin thahat tah ahitai.

²³ Chuin ama chu kum somli alhin phatnin, asopiho Israelte chu gavil ding alunga aumtan ahi.

²⁴Chuin alah uva khat alam louhela bolgenthei thoh amun ahile ahuh-in, bolgenthei thohpa phu chu alan Egypt mipa chu avolih tai;

²⁵Aman, Pathen'in ama khutna amaho chu ahuhdoh ding ahi chu asopiho chun henaovinte ati ahin; hinla amahon ahepouve.

²⁶Chuin ajingin alah uva mi ni akidelin ahile ama ahenguva agachen, suhcham ding agon; Vo miteni, nangni sopicha nahiuve; ibola nanghole nangho ahilouva nakiboltou ham? ati.

²⁷Ahivangin aheng akom ahilouva bolpa chun ama chu asondoh-in, Keiho chunga vaipole thutana koiham natunga?

²⁸Jani-a Egypt mipa natha banga chu tha dinga neigot ham? ati.

²⁹ Hiche aseija chun Mosi ajamin, Media gama apemin, chukoma chun chapa ni ahinge.

³⁰ Chuin kum somli alhin phatnin, Sinai mol gamthipmah, Pakai vantil'in hamboh-a meikongin akimusah-in;

³¹Chuin Mosi'n hichu amu phatnin, athilmu chu kidang asan; chuin agavechen dingin agache naijin ahile, chua chun Pakai aw ahung gingin,

³²Keima napu napate Pathen, Abraham Pathen, Isaac Pathen, Jacob Pathen kahi, ati. Hichun Mosi akihot hot jengin ave ngam tapoi.

³³Chuin Pakai chun ajah-a, Nakenga konin nakengchot chu sutlhan; ijeh-inem itile nadinna mun chu mun theng ahi.

³⁴Egypt gama um kamite hesoh genthei chentah-in kamun, apenu kajan, ahuhdoh dinguva hung kumlha kahi; tun hungin nangma Egypt gamah solinge, ati.

³⁵ Hiche Mosi, Keiho chunga vaipole thutana koiham natunga, tia aledohpa tah-u chu, Pathen'in hamboh-a akimusah vantil chu akithopin asemin, vaipo le huhdoh hikop dingin asoltan ahi.

³⁶ Ama chun Egypt gamah, chule twikhanglen san le gamthipmah kum somli sungin thil kidang dangle melchihna abolin, amaho chu apuidohtai.

³⁷ Pakai na Pathen'un nangho dinga, nasopiteu lah-a kona keima tobang themgao khat asodoh sah ding, athu nangaidiu ahi, tia Israel chate jah-a seija hiche Mosi chu ahi.

³⁸ Sinai molsanga ajah-a thuseija vantil le ipu ipateu toh gamthip gama houbung'a umkhoma, chule eiho pehson ding hinna thu mu-a ama chu ahi.

³⁹Ipu ipateovin ama thua nun ding chu anom hih-un, ama asondoh-un, Egypt lama alungu aheijun,

⁴⁰ Aaron jah-a, eilamkai dingu pathenho neisem peh-un; ijeh-inem itile Egypt gama kona eipuidoh uva Mosi la hoija itia ahi kahepouve, atiuve.

⁴¹ Chuin amahon hiche pet chun bongnou lim asemun, milim houna ding chun gan athatnun, amaho khut sema chun athanomun ahi.

⁴² Hijeh chun Pathen'in akiheimang sanin, van janelpi hou dingin amaho chu alhatai. Themgaoho lekhabua, Vo Israelte, gamthip gama chu kum somli sunga sa kithat le ganlha-a keima neihou jiuvem?

⁴³Nanghon Molok Ponbuh le pathen Rephan ahsi hou dinga alim nasemu napoleji bouvui. Hijeh-a chu keiman nangho Babylon kal lampeh-a Katol mang ding nahiuve, tia kisei bang chu ahi.

⁴⁴ Alim kigon namu bang bang chun houbuh san, tia Mosi hilpa thupeh dungjuija kisa hettohsahna houbuh chu, gamthip gama chu ipu ipateovin ananeiju ahi.

⁴⁵ Chujouvin ipu ipateu le Joshua'in hichu aneisonpeh-un, ipu ipateu masang sanga Pathen'in anodohho vaipiho gam alo laiju chun apo lutpeh-un, David nikho lai geijin aumin;

⁴⁶ Ama chun Pathen mitmu-a deisahna amun, Jacob Pathen umna ding athumin;

⁴⁷ Ahinla in chu Solomon'in asahpeh jobove.

⁴⁸Ahi jeng vangin, Chungnung pen chu khutna kisa houin'a chun achengpoi; themgaovin,

⁴⁹ Pakaiyin, Van katouna ahin, lei ka kengphang ngapna ahi; itobang in neisahpeh dingham? Kacholngahna mun hoikom ham?

⁵⁰Thil jouse hi aboncha kakhut sem hilouham? ati, tia asei banga chu.

⁵¹ Nangho milouchal teho, lungsung le nakhanga chep tanlou teho, nanghon a-imatih chanin Lhagao Theng nadoudal jingui; napu napateu bol bang chu nanghon nabolui.

⁵²Themgao koipen chu napu napateu vin abolset lou umam? Chondihtah hung ding thu sei masaho athatgamun; tun amatah chu amatsah le athatnin nangho napangui;

⁵³chule vantil thupeh ahi tia nalah sonu danthu chu nanitpouve, ati.

⁵⁴Chuin thu chucheng ajahtah-un, alungchang kikaldoh abang jengun, aha agoi khumun ahi.

⁵⁵Ahivangin ama Lhagao Theng adimsetnin, van lam ave aven ahile, Pathen loupile, Pathen khut jet lama Jesu adin chu amun,

⁵⁶Veuvin, vanho akihona Pathen khut jet lama Mihem Chapa adin kamui, ati.

⁵⁷Ahivangin amaho hatah-in a-aosot jengun, akol asimun, thakhat tah-in anovin;

⁵⁸Chuin khopam lama anodoh-un, songin asep aseptaove. Ahetohho chun Saul atiu gollhang khat keng khophang koma apon chengseu akoijun ahi.

⁵⁹Chutia chu amahon Stephen songa ase pettah-u chun ama ataovin, Pakai Jesu, kalhagao lan, ati.

⁶⁰Chuin adilsun hatah-in asamin, Pakai, hiche chonsetna hi amaho minin sun hih-in, ati. Chuin hiche chu aseijin a-imu damdel tai.