Read Thado Chin Solchah 8 Bible Online

Solchah 8 - Thado Chin bible

Solchah 8

¹Saul jong chun athao chu aphatsah ahi. Chuche ni-a pat chun Jerusalem'a um houbung suhmangna dinga bolsetna khohtah aum pantan ahile, solchah ho chengse tailou adang chengse, Juda gamle Samaria gamah avahcheh taovin ahi.

²Pathen'a kipetum ho chun Stephen chu avuijun hakan akauve.

³ Saul vang chun houbung suhmangna habolin abolin, intin-ah alutnin anumei apasal'in ajandoh-in, songkul'a akhum akhumin ahi.

⁴Hijeh chun avahchehho chu gamtinah avahleuvin, thu chu ahille taove.

⁵Chuin Philip Samaria khopi-a achesuh-in, ajah uva Christa chu aphongjal letai.

⁶Chuin melchihna abol ho chu amuva athuseiho ajah phatnun, mipi chengse chun Philip thusei ho chu lungkhat tahle lunglut tah-in angaitaove.

⁷Ajehchu lhagao boh vop mi tamtah-a konin lhagao bohho chu hapen nin apengun, ahung potdoh-un; chule langthi le elbai jong tamtah boldama um ahi.

⁸Chuin chuche khopi sunga chun kipa thanop nasatah aumtan ahi.

⁹Ahivangin hiche khopi-a chun amin Simon kiti mitpheldoi choi khat anaumin, ama chun milen khat kahi tia Samaria miho chu kidang satah-a anaumsah ahi:

¹⁰Amahon ama thu chu anangai lheh jengun, aneopena pat alenpen geijin, Hichepa hi Pathen thahat chungnung chu ahi, atiu ahi.

¹¹Sotpeh-a pat aman amitpheldoija amaho chu kidang satah-a aumsahsa ahi jeh-a, athu angai lheh jengu ahi.

¹²Ahivangin Philip'in Pathen lenggam thu le Jesu Christa min ahillhang atahsan phatnun, anumei apasal'in baptize achang taove.

¹³Chule Simon, amatah jongin atahsantan, baptize achan jouvin Philip toh aum khomjom lhonin, melchihna le bolmo thil kidang kibolho chu amun, kidang asa lheh jengin ahi.

¹⁴Chuin Jerusalem'a um solchah hon Samaria mihon Pathen thu ajoptaove ti ajah phatnun, Peter le John agahsol taove.

¹⁵Amani chu alhunsuh phat lhonin, Lhagao Theng achan theina dingun amaho ding chun ataopeh lhone;

¹⁶Ajehchu hiche geija chu alah uva khatchabeh chunga chu loulai ahin; Pakai Jesu mina baptize changmai maibou anahiuve.

¹⁷Chutah chun alu chunguva akhut angam lhonin ahile, Lhagao Theng achang taove.

¹⁸Chuin Simon'in solchah ho khut ngap vanga Lhagao Theng kipeh chu amun, amani chu sum peh agon,

¹⁹Koi chung koi chung hijongle kakhut kangaple ama chu Lhagao Theng achan jeng jengna dingin, keima jong hiche thilboltheina hi neipeuvin, ati.

²⁰Ahivangin Peter'in ajah-a, Nangman Pathen thilpeh suma choh dinga nangaito jeh chun, nasum chu nangtoh manthan!

²¹Pathen mitmu-a nalungput adih lou jeh chun, hiche thua hin lhahna naneipoi, chan jong naneipoi.

²²Hijeh chun hiche nagitlouna-a konhin nalung heijin, nalung sunga gitlou natup chu angaidam theikhat le Pathen henga taovin.

²³Ajehchu Chonsetna khatveng vungna thinkha-a lhalutna, chule gitlouna-a kikan nahi chu kahedohtai, ati.

²⁴Chuin Simon'in adonbutnin ajah-a, Nathuseiho chu khatcha jong kachunga alhun louna dingin, Pakai henga neitao peh-un, ati.

²⁵Hiche chun amanin Pakai thu ahettohsah lhona asei jou lhonin, Jerusalem lama akile kit lhonin, Samaria kho tamtah-ah Kipana Thupha chu ahil lhangpeh lhontai.

²⁶Chuin Pakai vantil khatnin Philip jah-a thu aseijin, Kipatdoh inlang lhang lama Jerusalem'a kona Gaza jotna lampi-a khun chesuh-in; chumun chu gamthip ahi, ati.

²⁷Chuin ama akipatdoh-in achetai; chule veuvin, Ethiopia gama mi khat nukiso, Ethiopia lengnu Candace noija thunei chungnung tah, agou jouse chunga vaihom, Jerusalem'a Pathen hou dinga chea ahin;

²⁸Akile kit lama kangtalai ja akitol puma themgao Isaiah lekhabu chu asim ahi.

²⁹Chuin Lhagaovin Philip jah-a, Khuche kangtalai khu naijin lang kiloipin, ati.

³⁰Chuin Philip ahenga alhaijin ahile, Isaiah themgao lekha chu asim ajan, ahengah, Nasim chu nahet nah-em? ati.

³¹Chuin aman, Mi khattouvin eihilchet loule iti kahet thei dingham? ati. Chuin Philip chu kangtalai chunga kaldoh-a akoma tou dingin akoutai.

³² Amapan Pathen lekhabu anasim asimmun lai chu hiche hi ahi: Ama chu tha dinga kikai kelngoi bangin akaijun; kelngoi nou amul vouho anga hampoh louhela aum bangin, Ama jong akam kapoi.

³³Akineosah nalamin achunga thutan dih aki subeijin; akhang thu koiham aseiphong dinga? ijeh-inem itile leisetna kona ahinna asuhmangu ahi.

³⁴Chuin nukiso chun Philip adonbutnin, Themgao chun hiche hi koi thudola aseiham? Ama thudola aseiha, midang thudola aseiham? ati.

³⁵Chuin Philip akamkan, chuche Pathen lekhabua thua chun apanin, Jesu thu aseitan ahi.

³⁶Chuti chun lampi-a chu ache che lhonle, twi umna mun khat agei lhonin; chuin nukiso chun, Ven, hikoma twi aume; baptize kachanmona ding ipi umam ati.

³⁷Chuin Philip'in, nangman nalung pumpi-a natahsan le chang thei jin nate, ati. Chuin aman adonbutnin, Jesu Christa chu Pathen Chapa ahi ti katahsane, ati.

³⁸Chuin akangtalai chu angahsah-in, Philip le nukiso chu ani lhonin twijah akumlha lhonin, chuin Philip'in ama chu baptize achansah tai.

³⁹Chuin twija kona ahungdoh lhon phatnin, Pakai Lhagaovin Philip chu alhohmang tan ahile nukiso chun amukit tapon, kipah thanom tah-a achena dinga achepaitan ahi.

⁴⁰Philip vang chu Azotus khopi-a amudoh-ui. Chuin aman ajotpaijin, Caesaria alhun kahsen khopitinah Kipana Thupha chu ahillhang pehtan ahi.