Read Thado Chin Solchah 9 Bible Online

Solchah 9 - Thado Chin bible

Solchah 9

¹Saul vang chu Pakai seijui ho gihsal le that dingin ahai haina laijin, thempu chungnung henga achen,

²Chuche lampi tahsan chan chu koi hijongle amu mu numei jong pasal jong akana Jerusalem'a ahinkai theina dingin, Damascus-a kikhopnaho-a dingin lekha agathume.

³Hichun achele Damascus kho alhun ding konin, phulou helouvin van'a kon vah khatnin avel asalvah soh jenge.

⁴Chuin ama tolah alhun, chule ajah-a, Saul, Saul, nangin ibola suhmang dinga neibolset jingham? tia kisei aw ajan ahi.

⁵Chuin aman, Pakai, nang koi nahim? ati. Chuin Pakai chun, Suhmang dinga nabolset Jesu chu kahi, nang dingin thihtul monghem lho ahahsai;

⁶Chule aman kithing pumle lungdong tah-in, Pakai ipi neibolsah nom em? atin ahi. Chuin Pakai chun ajah-a, Thouvin lang khopi sunga luttan; chule nabol ding nakiseipeh ding ahi, ati.

⁷Chule alhonpiho chu pao louvin adingun, aw vang chu ajauvin mi koima amupouve.

⁸Chuin Saul tolla kon chun athouvin, chuin amit ahasahle ima amutapoi. Hichun akhutnin akaijun Damascus'a chun apuilut taove.

⁹Chuin khomu lou leh an ne lou twi don louvin ni thum aumin ahi.

¹⁰Tun Damascus-a chu amin Ananias atiu seijui khat uma ahin; Pakai chun gaovin akimusah-in ajah-a, Vo Ananias, atin ahile, aman, Ven, Pakai, hikoma kaumnai, ati.

¹¹Chuin Pakaiyin ajah-a, Kipatdoh-in, Lamjang atiu khosung lamlena khun gachenlang, Judas in'ah Tarsus kho-a mi amin Saul atiu chu gaholin; ijeh-inem itile ven, ama atao pettah ahi;

¹²Chule aman mi khat amin Ananias ahunga, kho amu theina dinga alu chunga akhut angap amui, ati.

¹³Ahivangin Ananias'in adonbutnin, Pakai, keiman chuche mipa umchan, Jerusalem'a nangma mithengho itobanga khoh-a abolsetje thu chu mi tamtah-a kona kajah ahitai;

¹⁴Chule hikoma jong nangma min pan jouse kan dinga thempu pipuiho-a kona thu anei ahi, ati.

¹⁵Ahivangin Pakaiyin ajah-a, Chen: amakhu chidang namdangho henga, lengho henga, chule Israel chate henga kamin polutle dinga kamanchah lhen hija ahi.

¹⁶Ijeh-inem itile aman keima min jala ichana genthei hesoh athoh ding ham kavetsah ding ahi, ati.

¹⁷Chuin Ananias chu agachen, in'a chun alutnin, chuin alu chungah akhut angamin; Sopi Saul, nahunga lampia nakimusah Pakai Jesu chun kho namu theina dingle Lhagao Thenga nadimna dinga eihinsol ahi, ati.

¹⁸Chuin chupettah chun amitna konin lip tobang ahung pullhan ahile kho amutai; chuin ama akipatdoh-in baptize achangtai.

¹⁹Chuin an anen, atha ahattai. Chujouvin ni ijat-ham Damascus-a seijui ho toh aum khomtaove.

²⁰Chuin kikhopna intin-ah Christa chu Pathen Chapa ahi thudol ahillhang paitan ahi.

²¹Chuin athusei ja jouse chun kidang asa lheh jengun, Jerusalem'a hiche min panho jouse sucheh-a chu ama hi hilou hija, Chule amaho chu kanchoma thempu pipuiho henga kailut dinga hikoma hunga hilou ham? atiuve.

²²Saul chula athahat akhang cheh cheh-in, hiche Jesu hi Christa ahi mong monge ti photchena aseijin, Damascus-a um Juda ho chu anel khupjin akisuh dongsah jitan ahi.

²³ Chuin ni tamtah jouvin, Juda ho chu Saul that dingin akihousom taove.

²⁴Ahivangin agutuhnau chu Saul'in ahedohtai. Chuin amahon ama chu atha theina dingun sunle jan-in kotpiho jong chu angahjiuvin ahi;

²⁵Ahinla aseijuihon jan-in apuijun, bomin kul pangah akhailha taovin ahi.

²⁶Chuin ama Jerusalem alhunin, seijuiho toh kiloi ding agon ahile, amahon ama chu seijui khat ahi ti atahsan lou jeh-un, akichao vin ahi.

²⁷Ahin Barnabas'in apuijin solchah ho henga apui lutnin, ajah uva, Lampia Pakai amua, ajah-a thu asei, chule Damascus-a hakat tah-a Jesu min ahillhangle chu aseitan ahi.

²⁸Chuin ama amaho chutoh Jerusalem'a alutle apotleuvin,

²⁹Pakai Jesu minin hakattah-in ahillhanglen, chule Greek gam Juda ho chu anelkalin; ahinla amahon ama tha dingin agotauvin ahi.

³⁰Chuin sopiten hichu ahet phatnun, Caesaria-a apuilhasuh-un, Tarsus kho-a asolmang taove.

³¹Chutichun Judah gam sungse-a, Galilee gam sungse-a, chule Samaria gam sungse-a houbung chu adet chehcheh-un, mongtah-in aumtaove; chule Pakai gingpuma hinkho mangin, Lhagao Theng lungmonsahna achangun, amaho apung tultul taovin ahi.

³²Chuin ahitin ahi, Peter gamtina avahle avahlen, Lydda'a um mitheng ho heng geijin agalhung suh tai.

³³Chukoma chun, mi khat amin Aeneas atiu, alangthi jeh-a kum get ajalkhuna lum agamudoh-in ahi.

³⁴Chuin Peter'in ajah-a, Aeneas, Jesu Christan nadamsah ahitai: thouvin lang nalupna kisemin, ati. Chuin chupettah chun ama athoudoh paijenge.

³⁵Chuin Lydda'a cheng jousele Sharon'a cheng jousen ama chu amuvin, Pakai lamah akihei taove.

³⁶Joppa-a chu seijui khat amin Tabitha atiu aumin, hichu Dorcas tina ahin, amanu chu thilphabol le mi thilpeh-a bulhingtah ahi.

³⁷Chule ahitin ahi, hiche laichun ama chu anan ahile athitai; chuin amahon asilun, indan chungnunga alupsah taove.

³⁸Chuin Lydda chu Joppa kom nai ahi jeh chun, seijui hon chua chun Peter aume ti ajauvin, geisang louva ahenguva ahung nadingin, ahenga mi ni asolun ahi.

³⁹Chuin Peter akipatdoh-in amani chutoh alhontai. Chuin alhunin amahon indan chungnunga chun apuijun; meithaiho jouse chu akimvela adingun kap pumin, Dorcas'in ahin laija abolpeh-u sangkhol le ponsil hochu avetsah-un ahi.

⁴⁰Ahivangin Peter'in amaho chu abonchauvin apotdoh sah-in, adilsun ataotai. Chuin along lama chun akiheijin, Tabitha, thouvin, ati. Chuin aman un amit ahinha sah-in; chuin Peter amu phat chun atoudoh tai.

⁴¹Chuin aman akhut apen akaithou tai; chuin mithengho le meithaiho akouvin, amanu chu ahingin apetai.

⁴²Chuin hichu Joppa kho-a jouse chun ahesoh taovin, mi tamtah-in Pakai chu atahsan taove.

⁴³Chuin ahitin ahi, Peter chu Joppa kho-a savun sem Simon in'ah ni tamtah aumin ahi.