Read Thado Chin Rome 1 Bible Online

Rome 1 - Thado Chin bible

Rome 1

¹Paul, Jesu Christa soh khat, solchah khat hidia kikou, Pathen thupha seiphong ledia kisepdoh chun:

²Malaija alekhabu thenga athemgaoho kama athutepsa,

³Tahsa lam dolla David chilhah-a kisim, I-Pakaiyu Jesu Christa, a Chapa thudol,

⁴Thenna lhagao lama vanga chu athi-a kona athodoh kit chun Pathen Chapa chu thunei tah-a atun ahi chu aphongdoh tai.

⁵Chidang namdangte jouse lah-a mi tahsan thua nunsah dinga ama vangle ama min jala lungsetnale solchah mun changa kahitai;

⁶Nangho jong amaho lah-a chu Jesu Christa kouna changho nahiuve;

⁷Rome'a cheng mithenga kikou Pathen deite jouse hengah, i-Pau Pathen le Pakai Jesu Christa-a konin lungsetna le lungmon nalah uva umjing hen.

⁸Natahsanu vannoi jouse-a akithan jeh-in, nabon chaova chungah Jesu Christa vangin ka-Pathen kathangvah masan ahi.

⁹Katao chanin tang louvin naminu kapha jingin, Achapa Thupha thua lhagaova alhacha kapan Pathen chu ahetoh ahi.

¹⁰Tubeh-a hi naheng uva kahungna dingin, Pathen thusah-a phat kijen kom khat kato-a kahungjin teiteina dingin kathum jingjin ahi.

¹¹Nadetna dinguva lhagao lam thilpeh phabep nangho kapeh theina dingun, nangho mu kangah lel lheh jengin ahi.

¹²Hichu nangho jong keima jong khat tahsana kona khat le khat ikitil khou touva, nangho lah-a lunghalna kanei theina dinga kati ahi.

¹³ Chule sopite, chidang namdangte lah-a katohgim ga kamutah banga nangho lah-a jong kamu theina dinga, tamtahvei naheng uva hung ding kakigotji chu nahet louvu kanompoi, ahivangin tu masangsen eisumo aum jingjin ahi.

¹⁴Greek mitele paomah ham mahte ahin, mithemle mimol ahin, abonchauva kabat ahi.

¹⁵Chutichu ahin, nangho Rome khopi-a um chengse jong Kipana Thupha kahil theichan hil dinga kigosa dema umjing kahi.

¹⁶ Ajehchu Christa Kipana Thupha hi kajachatpi hihhele, ajehchu koi hile atahsan chan chu huhhing na dinga Pathen thahat ahin, amasan Juda mi ahin, chule Greek mi jong ahunghi.

¹⁷ Ajeh iham itile asunga tahsan le tahsana kona Pathen chonphatna kilanga ahi; hiche thudol chu, Michonpha vang chu atahsan vanga hing ding ahi, tin akisune.

¹⁸Ajehchu chonphat louna-a thutah doudal ho, mihemte Pathen ngaisah louna le chonphat louna jouse chunga van'a konin Pathen lunghanna ahung kilangin ahi;

¹⁹Ajeh chu Pathen lam thudol het theina chu amaho-a akilangnai; ajeh chu Pathen'in hichu ahenguva amusah ahitai.

²⁰Ijeh ham itile leiset semtila pat Pathen athahat kemloule Pathen ahije mutheilou thilteho chu athilsema kihedoh-a, kichentah-a kimu ahi jeh chun, amaho athuphatna dingu aumpoi.

²¹ Ajeh chu Pathen lah ahenauvin, Pathen bangin avahchoi pouvin, thang jong athangvahji pouve; athil ngaitou ahomkeo ahin, angol lungu athimtan ahi.

²²Akichihsah nau lamah angoljo taove.

²³ Chule kemtheilou Pathen loupina chu, kemthei mihem le alha-a leng vachaho, akeng li nei gamsaho le a-opma kitholtho ganhing limin akhelun, ahou taove.

²⁴Hiche jeh-a chu alah uva atiu ja umloutah-a bol dinga, amaho lunggot lam then louna lama, Pathen'in apehdoh ahitai.

²⁵Amahon Pathen thutah chu jouvin alhengun, chule asempau khelin thilsemjoh ahouvun ajenleuvin ahi. Hiche Sempa chu tonsot geija nunnom jing ahi. Amen.

²⁶Hiche jeh-a chu Pathen'in amaho jachat umtah huhna lama apehdoh ahitai, anumeiho jongun apenpiu angai monga achonnau apaijun akaleh lamin achonun ahi.

²⁷Apasal-hou jong angai monga numeitoh achonnau apaijun, huh lama alipmun, pasal le pasal jachat umtah-in akibolun, achon gitlounao chu amahon ati chunguva akisan taovin ahi.

²⁸Alunguva Pathen hetding amaho nom lou ahiuvin, hiche bangtah-a chu Pathen'in jong amaho lung chatvaina lama apehdoh ahitai.

²⁹Amaho chonphat louna jouse; jonthanhoi, engset, papset, mi kisuhmo sah, thangset, toltha, minelnoh, dohabol, doulung poh, kihou lhih adimset nun ahi.

³⁰Guhthima miseise, mihoutom, Pathen hotlam, chonval, hoitho, kithang-at, chonset thah boldoh, nulepa thua nunglou,

³¹Hetna neilou, thutep palkeh, hepina neilou, lhep lung damo, lungsetna neilou ahiuve.

³²Hitobanga chonho chu athi dinga lom mong ahiuve, hiche Pathen thutansa chu ahena saovin achuti chonun ahi, amaho chang jong hilouvin, chutia chonho chu aphasah-un ahi.