Read Thado Chin Rome 10 Bible Online

Rome 10 - Thado Chin bible

Rome 10

¹Sopite, lunga kagotle Israelte dia Pathen henga katao nomna chu, huhhing-a ahung umtheina dingu hi, ahipene.

²Pathen lama agunchuve ti chu keiman kahetsah ahi; ahivangin hichu hetna neija gunchu ahipoi.

³Ajeh chu amahon Pathen chonphatna ahetlou jeh-ule, amaho chonphatna phudoh ding agot jeh-un, Pathen chonphat na-ah alut tapouve.

⁴Christa chu atahsan jouse dinga, chonphatna amu theina dinguva danthu chaina ahi.

⁵ Ajehchu Mosi'n chonphatna danthu anahilchet na-a, chonphatna nitpa bou chuche achonphat vanga chu hing ding ahi, anatin ahi.

⁶ Tahsana chonphat vang chun hitin aseije, Nangman nalung thimin, Koiham van'a kal ding? (hichu Christa gapuilhah ding aseina ahi);

⁷ahiloule, Koiham lei onga kumlha ding? (hichu athi lah-a kona Christa kaithou ding aseina ahi), ti hih-in.

⁸Ahin ipi aseijem? hiche thu chu nakomah aume, nakam sungle nalung sungah aume; (hichu kasei phongleu tahsan thu chu ahi).

⁹Hitia chu nangman nakama Pakai Jesu chu naphon doha, chule Pathen nin ama chu athilah-a konin akaithouve ti nalunga natahsan le, asohcha ding nahi.

¹⁰Ajeh chu chonphatna dinga lunga tahsan ahin, sochatna dinga kama phondoh ahi.

¹¹ Pathen lekhabu thun, Koi hileh ama tahsan chan chu jachatna-a chulou ding ahi, ati.

¹²Ijeh-inem itile Juda mitele Greek mite chu imacha chom ahipouve; abonchauva chungah Pakai khatsehbou aume, ahenga tao jouse dinga phatna haotah ahi.

¹³ Koi hile Pakai mina tao chan chu huhhing-a umding ahi.

¹⁴Achutile atahsan louvu chu iti akou dinguham? Athu ajahkhah louvu chu iti atahsan dinguham? Thusei phongle beija iti ajah dinguham?

¹⁵ Chule akisol louvule iti asei phongle dinguham? hitijong hin akisune, chamna kipana thupha seiphong leho, thilphaho thudola kipana thu poleho keng iti hoi hitam!

¹⁶ Ahivangin mi jousen Kipana Thupha angaipouve. Ajeh chu Isaiah'in jong, Pakai, kathuphonle-u koiham atahsana, ati.

¹⁷Chuti ahijeh chun, jah-a kona tahsan umdoh, chule jah chu Pathen thua kona hung umdoh ahi.

¹⁸ Ahileh amahon ajah lou uham? Ajanauve. A-awginu gamtina athangin, Chule athu uvin kolkimvel achansoh tai.

¹⁹ Ahivanga kasei ahi, Israel miten ahetlou uham? Amasan Mosi'n aseijin, Keiman nangho vai neilou vai khat thangset sah-uving ting, Lungthim neilou vai khatna kona kalunghansah ding nahiuve, ati.

²⁰ Isaiah'in jong hakattah-in aseijin, Eihol louten eimudoh-un, Eidong loute hengah kakiphongtai, ati.

²¹ Ahin Israel jah-a, thua nungloute le nel hatte chunga kakhut kajah nilhum keije, tin aseije.