Read Thado Chin Rome 11 Bible Online

Rome 11 - Thado Chin bible

Rome 11

¹ Achutile Pathen'in amite chu apailhah hitam? Ahipoi. Ajeh chu kei jong Abraham chilhah-a Benjamin phunga Israel mi khat kahi.

²Pathen'in ahet masatsa amite chu apailhapoi. Pathen lekhabu thun Elijah thu asei hi nahet lou uham? Aman Israelte chungchang thu Pathen henga alhutnin,

³ Pakai, amahon nangma themgaoho athatgamun, nang houna maicham asuchimun, keima changseh kaumtai, kei jong tha dingin eitup jingui, ati.

⁴ Ahivangin Pathen'in adonbutna chu ipi aseijem? Keiman keija dingin Baal anga dilsu louhel mi sangsagi kakikhen nai, ati.

⁵Chutobangma chun tulaijin jong lungsetna kilheng amoh moh aumnai.

⁶Amavang hichu lungset man ahile, thilbol vanga ahipoi; chuti ahiloule lungsetna hi lungsetna hita lou ahi. Ahinla, hichu natoh vang ahile lungset vang ahitapoi, chuti ahiloule natoh hi natoh hitalou ahi.

⁷Iti hitante ahile? Israel miten aholu chu amu louvu ahin, Pathen lhentehon bou amu ahi; adang chengse chu alung tahcheh taovin ahi.

⁸ Pathen lekhabua hitin akisune, Pathen'in tuni gei hin amaho khu imutsetna lhagao apen, amu thei louna dingun mit apen, jah thei louna nakhang apen ahi.

⁹ David jongin, A-an nehnao dokhang chu amaho dingin thangle pel hihen, Chule akipalnao le akiditnao hihen.

¹⁰Amu mona dingun amitnu thimhen, Chule nangman atingu bonsah jingin, tin aseijin ahi.

¹¹Keiman, ahile alhuhna dinguva kipala hiuvam, kati. Ahinaisaipoi. Amavang amaho thangset sahna dinga, amaho suhkhel vanga chu chidang namdangte dinga sochatna ahitai.

¹²Chule amaho suhkhel chu vannoi'in haona-a aneija, chule amaho hakam chu chidang namdang ten haona-a aneija ahile, abulhin nau chu chusanga ijatna chungnung cheh ding hitam!

¹³Keiman chidang namdang mi nangho jah-a kasei ahi, keima chidang namdangte dinga solchah-a kapan jeh hin,

¹⁴Ijem tia kanam chanpite kathangsetsah-a alah uva abang bang asochat theina dingun katin, lhacha kapana hi kaloupisah lheh jeng ahi.

¹⁵Ajeh chu amaho kipaidoh vannoi'in kichamna-a aneija ahile, amaho kilah kit chu athia kona hinna ding tailou, adang ipi hi dingham?

¹⁶Chule changbong lum amasa athena ahile, changlhah tum jouse apumpia atheng ahi; chule ajung athenle, abah chengse jong athenga ahi.

¹⁷Ahinla abah abang bang akiheboh-a ahile, nangho gam olive bou nahiuvin, abah lah-a kijoma nahiuve, Olive thingphung ajunga kona phattheina changkha nahitah-a nahile,

¹⁸Abahho chungah kithang-at hih-in. Kithang-at jongle chun, ajung vah-a nang nahipoi, ajungbou chun nang navahjoh ahibouve.

¹⁹Hichea hin nangman, Keima kijopna dinga abahho kisubonga ahitai, tin nate.

²⁰Aphai, atahsan lou jeh-a hicheho chu kisubonga ahin, nangma natahsan jala nadindet ahi. Hoitho hih-in, kichajon;

²¹Ajeh chu Pathen'in abah tahbeh bon akhen loule, nangma jong khenpon nate.

²²Chuti ahi jeh chun Pathen phatjele lungkhohje chu veuvin; alhuho dinga chu lungkhoh tah ahin, nangma ding vanga phatah ahi. Aphatna-ah um jingin, achuti loule nang jong naki satlha ding ahi.

²³Amaho chu tahsan louva aum jing louvule, kijom kit ding ahiuve, Pathen'in amaho chu ajop kit thei ahi.

²⁴Ajeh iham itile apena patna gam Olive phunga kona kisatlha-a nangma, angai louva Olive phung phatoh kijop nahile, apena patna abah tahbeh ho chu olive toh iti kiha jopmat cheh ding hitam!

²⁵Sopite, hiche thuguh hi helouva naum dingu kanompoi, ajole hung kichihsah khauvinate; chidang namdangte akimsoh kahse-a Israel mite kimkhat chunga lungtahna chua ahi.

²⁶ Chutichu ahin Israelte jouse huhhing-a um cheh ding ahi. Hiche thudol hi, Sion'a kona Huhhing-a hung ding ahin, chule Aman Jacob phunga kona Pathen ngaisah louna asuhmang ding ahi,

²⁷ Achonsetnao kalahmang tengle, Hiche hi amahotoh kakitepnao hi ding ahi, tin akisune.

²⁸Kipana Thupha thudola amaho khu nangho jala melmate ahiuvin, lhenchom lam thudola apu apateu jala deitahte ahiuve.

²⁹Ijeh ham itile Pathen'in manbeija athilpehho le akouho chu akhelkit theihoi ahipoi.

³⁰Masangin Pathen thua nunglou nahiuvin, tu vangin amaho louchal jeh-a lungsetna mu-a nahitaove.

³¹Chule chutobangma chu amahon jong, lungsetna namu jaluva hi lungsetna amu theina dinguva, tu-a louchala ahiuve.

³²Ijeh ham itile Pathen'in mi jouse alungset theina dinga thua nunlou na-a akhumchah ahitai.

³³ Pathen chihna le hetna haoje hi athuh lheh jenge! Avaihom athutan hetphah hoi ahipoi, chule alampiho holdoh theihoi ahipoi!

³⁴ Ajeh chu Pakai lungthim chu koiham ahea? Chujongle lungthim pe-a anapanga koiham?

³⁵ Alepeh kit dinga thilpha anape masa koiham?

³⁶Ajeh chu ama-a konle, ama vanga, chule ama dinga thil jouse ana uma ahi. Loupina jouse atonsot geijin ama-a hi jinghen. Amen.