Read Thado Chin Rome 13 Bible Online

Rome 13 - Thado Chin bible

Rome 13

¹Thunei chungnungte thu thun mi jouse nungcheh hen; ajeh chu Pathen thusah louva thuneija aumpoi, chule aum chengse hi Pathen pansah cheh ahiuve.

²Chuti ahi jeh chun chuche thuneite douva chu Pathen thu douva ahi, chule adouho chun achunguva thutanna akiloikhum dingu ahi.

³Ajeh iham itile vaipoho chu thilpha bolpa dinga kichat um hilouvin, ase bolpa dingabou kichat uma ahi. Thunei ho kicha louhelin umleng ti nagotnem? Thilpha bolin, chutile apachat nachan ding ahi;

⁴Ajeh chu nangma phattheina dinga ama Pathen sottola pang ahi. Ase nabol vangle kichan, aman chemjam adop khu moh-a adop ahipoi; ajeh chu ama Pathen sottol ahin, ase bolpa chunga lunghanga phula-a pang ahi.

⁵Hijeh chun lunghanna ding ahipon, ase apha hetna jala jong athua nun ding ahi.

⁶ Hiche jeh-a chu kai jong napehjiu ahi; ajeh chu amaho Pathen sottol hiuva hiti chu abol jing jengu ahi.

⁷Peh dingdol jouse chu peuvin; kai pehdol kai peuvin; se choina dolah se choijun; gin dingdol chu ginun; ja dingdol chu jauvin.

⁸Khatle khat kingailutto cheh tailouvin koima imacha bat hih-un; ajeh chu michom dang ngailu-a chun Pathen danthupeh chu asuhbulhit ahitai.

⁹ Ajeh iham itile, Jon bol hih-in, Tol that hih-in, Gucha hih-in, hetphotna dihlou mang hih-in, Papse hih-in, ti thupeh dang um jongle, Nangman nangma naki ngailut bangin naheng nakoma ngailun, tia hin akai khom sohkeijin ahi.

¹⁰Ngailutna-in hengle kom setna abolpoi; hijeh chun ngailut hi danthu bukipna ahi.

¹¹Chule chuche ti louvin phat umchan hi naheuve; tu hi nangho dingin imutna kona khah phat ahitai; ajeh chu eihon itahsan tiluva sang chun tu hin isochatnao anaitan ahi.

¹²Jan asotjo achetai, sun ahung naitai; hiche jeh chun khaije, muthim natoh pailhau hitin khovah vonin kivonuhite.

¹³Suna bangin hoitah-in umu hite; juneh motchonle jukhama um louvin, huhle jonthanhoi nei louvin, kinahnale kithangset beihelin umu hite.

¹⁴Pakai Jesu Christa chu kivonjoh bouvun, naphe phatna dingu tahsa lam ngaichat suhbulhit ding imacha go hih-un.