Read Thado Chin Rome 14 Bible Online

Rome 14 - Thado Chin bible

Rome 14

¹ Tahsana hat louva chu nalah uva lauvin, amavang atahsan bukim louna chu oimo-a nol ding ahipoi.

²Mikhatnin imajouse neh theijin atahsanin, ahatmoa chun anche jengbou anei.

³Anea chun anelou chu musit dahen; chule anelouvan anea chu oimo hihhen; ijeh ham itile ama chu Pathen'in alahsa ahi.

⁴Mi insung soh oimo-a nang koi nahim? Adinle alhuh a-pakaipa-a bou ahi. Ahi, Pathen chun adinsah thei ahijeh-a chu ama chu adinsah ding ahi.

⁵Mi abang khatnin nikho khat nikho dang dang sangin ajabol tumin, abang kimkhatnin nikho jouse kibangin ajabolin ahi. Mi jousen ama lung sunga kihetchen chehhen.

⁶Nikho jabola chun Pakai choi-atna-a ajabol ahin; nikho jabollou chun Pakai dinga ajabollou ahi. Chule ima ne-a jong chun Pathen alhai jeh chun Pakai choi-atna-a aneh ahi; anelou jong chun Pathen athangvah-a Pakai dinga anehda ahi.

⁷Ijeh ham itile eiho koima ama dinga hinga ihipouve, chule koima ama dinga thia ihipouve.

⁸Ihinle Pakai dinga hing ihiuvin, ithiu jongle Pakai dinga thia ihibovui; hijeh chun hing jong leuhen Pakai dinga hing ihiuvin, thi jong leuhen Pakai dinga thia ihiuve.

⁹Ajeh chu athi le ahing Pakai ahikop theina dinga, Khrista thia, chua thoudoh kitna, chule hing kitna ahi.

¹⁰ Ahin ibola nangin nasopi na-oimo ham? Chujongle nangin nasopi ibola musit nahim? Ajeh chu Khrista laltouna anga ibon chaova idin dingu ahinalaije.

¹¹ Ajehchu, Pakaiyin aseije, Keima hingjing kahito lhonna, khup jouse ka anga dilsu cheh ding, chule lei jousen Pathen henga aphondoh ding ahi; tin akisune.

¹²Chuti ahi jeh-a chu ibon chaova Pathen henga eima chonchan cheh ikisei dingu ahi.

¹³Hijeh chun tukal ki-oimoto tapou hite; hiche sang chun hiche hi ngaito jovin, sopi anga lung lhahna le kipal lhuhna koi lou ding ahi.

¹⁴Thil angai monga thenglou aumpoi, ti hi Pakai Jesu'ah kahechenin katahsan lheh jengin ahi; amavang mi khattouvin thilboh ahi tia angaito chu, ama dinga hichu athenglou ahiji.

¹⁵Na nehle chah chunga nasopi alung phatmole, ngailutna thua chonta lou nahi. Adinga Khrista thia ahitan, ama chu nangman naneh nachah-in sumang hih-in.

¹⁶Hijeh chun naphatnao chu seisetnin um hihhen;

¹⁷Ajeh chu Pathen lenggam chu anneh twidon thua ahipoi; chonphatna, lungmonna, Lhagao Thenga kipana joh bou chu Pathen gam thupi ahi.

¹⁸Ajeh iham itile koi hileh chuti thua Khrista lhacha-a pang chu Pathen lung lamtah ahin, mihemin jong, Aphai, tia aphot chen ahi.

¹⁹Hijeh chun kichamdela umna dingle khantou theina kibolpehto lam juiju hite.

²⁰Nehle chah jeh-in Pathen natoh suse hihhelun. Thil jouse athengnai, ahinla ikhat neh-a lung lhahna chu anepa dinga setna ahi.

²¹Sa neh hijongle, lengpitwi don hijongle, adang ipi hijongle, nasopi kipal lhuhna ahiloule lhasetna, ahiloule thalhomna chu bolda hela pha ahi.

²²Tahsana nanei jem? Nanei chu Pathen angah nangman hetnin nei jingin; aphalam ahi ti ngaito-a themo-a kingaito loupa chu mi nunnom ahi.

²³Amavang lungsa-ih puma nepa chu themmo changa ahitai; ajeh iham itile tahsanna neija aneh ahipoi; chule ipi hijongle tahsanna nei louva bol chu chonset ahi.