Read Thado Chin Rome 16 Bible Online

Rome 16 - Thado Chin bible

Rome 16

¹Isopinu-u Phoebe, Cenchria houbung lhachanu hi Pakai minin mithengte chonna-in lomtah-a analauvin;

²Chule nahunao angaichatna chan-ah anahuvin tia nangho amanu hitoh kakihettosah nahiuve; ajeh iham itile amanu hin mi tamtah ahun chule keimatah jeng jong eihun ahi.

³ Jesu Christa-a katoh khompi kahinkho huhna-a alol do-a Priscilla le Aquila kasalam anapeuvin;

⁴Kei chang hilouvin chidang namdangte lah-a houbung mi jousen jong apahchauvin ahi.

⁵Chule a-in'a kikhom houbung mite jong chu salam anapeuvin. Kasahtah Epaenetus Asia gama Christa tahsan masapen chu salam anapeuvin.

⁶Nangho dinga na hatoh-a tonggim Mariam jong kasalam anapeuvin.

⁷Ka-inkote kasoh chanpi Andronicus le Junia solchah ho lah-a minchepen keima sanga Christa-a lut masa amani jong chu kasalam anapeuvin.

⁸Pakaiya kasahtah Amplias chu kasalam anapeuvin.

⁹Christa-a itoh gimpiu Urbane le kasahtah Stachys salam anapeuvin.

¹⁰Christa-a mi kitah kichen Apelles salam peuvin. Aristobulus te insung miho jong salam peuvin.

¹¹Ka-inko Herodion kasalam anapeuvin. Narcissus te inko Pakaiya um cheng chu kasalam anapeuvin.

¹²Pakaiya na hatohgim Typhene le Tryphosa salam anapeuvin. Dei umtah Persis Pakaiya na ahatoh lheh jengin, ama chu kasalam anapeuvin.

¹³ Pakaiya lhen Rufus le kanu tobang anu chu salam anapeuvin.

¹⁴Asyncritus, Phlegon, Hermas, Patroba, Hermes, hicheng chule aumpiu sopite chengse salam anapeuvin.

¹⁵Philologus le Julia, Nereus le asopinu, Olympus, chule amahotoh kikhom mithengte chengse salam anapeuvin.

¹⁶Khatle khat salam kiboh tovinlang thengtah-in kichopmun, Christa houbung mite jousen salam napeuve.

¹⁷Vo sopite, kangehnao ahi, thu nakihil chengu chu akaleh-a, kikhen chehna dingle kipal lhuhna semteho chu anamelgel unlang, amaho-a konin anachom umun.

¹⁸Ijeh-inem itile chutobang miho chun I-Pakaiyu Jesu Christa lhacha na tong louvin, a-oisung dingu lhacha na tong jengbou ahiuve; chule kamthemle thungei ngeijin suhset neilouho lung dohan alhemlha jiuvin ahi.

¹⁹Nasei ngaijeu chu vannoi'ah akithang dohtan ahi. Hiche jeh chun nachung uvah kakipah lheh jenge; amavang nangho apha lama chingunlang ase lamah lunglhom leu chun kalung ahi.

²⁰Chule chamna lungmonna Pathen'in Satan chu nakengto noijuva achil ngemvah ding ahinai. Pakai Jesu Christa lungset chu nalah uva umjing hen, Amen.

²¹ Katoh khompi Timothy chule ka-inko Lucius, Jason chule Sosipater hiteho chun salam nahinpeuve.

²²Chule hiche lekhasun Tertius, keiman Pakaiyah nangho salam nahinpeuve.

²³ Keimale houbung mite jouse lhunna Gaius chun salam napeuve. Hiche khopi-a sumdol Erastus le sopi Quartus'in salam napeuve.

²⁴I-Pakaiyu Jesu Christa milungsetna chun nabon chaovin umpiuvin, Amen.

²⁵Kathupha hille Jesu Christa thuphon bangtah-a, tonsotna patna ki-im thuguh chu tu-a akiphondoh bangtah-a,

²⁶Tahsan thua ahung nunna dinguva tonsotna Pathen thupeh dungjuitah-a, themgaoho lekhabun aphondoh-a, chitin le namtin jouse ahetsah ahitan;

²⁷Nangho sudet thei Pathen chinga khatseh chu Jesu Christa vangin tonsot geijin loupi jinghen, Amen.