Read Thado Chin Rome 2 Bible Online

Rome 2 - Thado Chin bible

Rome 2

¹ Hiche jeh chun, Mi oimo-a pang, vo mihem, koi hile chun nangman jong nadonbutna ding aumpoi; ajeh iham itile nangman mi na-oimona lama nangma themmo kichanbou nahi, ajeh chu mi oimo-a pang, nangmatah jongin chutobang chu naboljin ahi.

²Chutobanga chonho chunga chu Pathen'in thutah dungjuija athu-u atan ahi, ti iheuvin ahi.

³Vo mihem, chutobanga chonte oimo-a pang nangman chutobang chu nabolji-a ahile, Pathen thutan na-a chun hoinange, tia nakiginchat mong hinam?

⁴Ole Pathen phatna-in nalung heina dinga nangma napui chu helouva phatna, lungdehat, khongaisot ahao hi nahsah louva nahim?

⁵Nalungtahle lungheilou dungjuija chu, Pathen'in thudih atan ni hung kiphonle alunghan ni-a dinga chu nachunga lunghanna nakikhol khom ahi.

⁶ Pathen'in mi jouse atoh dungjui cheh-a asansah ding ahi.

⁷Thilpha bola pontho-a lungdesot hatna, loupina, jana, chule kemlou holte chu hin kemlou apeh ding ahi;

⁸Kichangchuna kichamsah, thutah thua nung louva chonphatlou thua nungho vang chu achunguva lungsatle lunghan chua,

⁹Setna bol miho jouse lhagao chunga, amasa Juda mi chule abana Greek mite lhagao chunga, hesoh gentheile lungdonna khohtah chu ding ahi.

¹⁰Thilpha bol chengse vang chun loupina, choi-atna, chule lungmonna kipe ding ahi, Juda mi masan tin chule Greek mi hi ding ahi.

¹¹ Ajeh chu Pathen'in mi dat aneipoi.

¹²Ajeh chu danthu neilouva chonseteho jouse chu danthu beija manghel ding ahiuvin; chule danthu noija chonseteho jouse chu danthua athu kitan ding ahi.

¹³Ajeh iham itile Pathen mitmu-a michonpha ho chu danthu ngaija jaho ahipouve; danthu dungjuija bolteho bouchu chonpha-a kisim ding ahi.

¹⁴Danthu neilou chidang namdangte jengbonin, apenpi lungpoh-in danthun anungun, danthu aneilou vangun amahole amaho danthun akisemun ahi.

¹⁵Alung sunguva danthu natoh kisun ahi ti chu atahlangun, hiche ase apha ahetnao chun ahettohsah-un, chule alunggel uva chun themosah ahiloule khat le khat themmo kichan aumsah jiuvin ahi.

¹⁶Hicheng chu kathupha seiphongle dungjuija, Pathen'in Jesu Christa amanchah-a mihemte guhthim thu atan nikho leh chuti ding ahi.

¹⁷Nangma Juda mi-a kisei nahi-a, danthua kinem nahi-a, Pathen'a kisong nahi-a,

¹⁸Alungdei he-a, thilpha chu pha sa-a, danthua kona kihila het neija,

¹⁹Chule danthua hetna le thutah umdan neija nakiginchat jeh-a, mitcho ho kaihoile leh muthim lah-a umho salvah-a,

²⁰Michinglou ho chihsah-a, naosen ho hila nakingaito ahin;

²¹Chuti ahile mihil-a panga nang, nangma jong nachanga kihil jilou nahim? Guchat louna dinga thu hila pang, nangman naguhji hilou ham?

²²Jonthanhoi bol louna dinga thuseija, nangman jon nabolji hilou ham? Milim hou ho-a nangma, nangman milim houna in'a thil nachomji hilou ham?

²³Danthu-a kisong nangman, danthu nasuhkeh-a kona Pathen nahsah mo-a nabolji hilouham?

²⁴ Akisun bang bangin, nangho jeh-in Pathen min chidang namgdangte lah-a taitomin aumin ahi.

²⁵Nangma danthua nanunle nacheptan chu phatchomna nanei ding ahin, danthua nanun lou vangle nacheptan chu tan lou ahitai.

²⁶Chuti ahi jeh-a chu cheptanlou chun danthua chonphatna thudol chu nit taleh, achep tanlou chu cheptana kisim lou dingham?

²⁷Apena cheptanlou mong danthu nit soh chun, lekhajem'a thule cheptan dan neija jong danthu sukeh-a nangma, nathemmosah lou dingham?

²⁸Apolama mi mu-a Juda mi hichu Juda mitah ahipoi, apolam ati chunga cheptan jong chu cheptan ahipoi.

²⁹ Asunggila Juda mi hibou chu Juda mi ahin, chule lekhajem'a hilouva lhagaova lunggil lam cheptanho chu cheptan ahi; ama chu mihem pachat lo-a hilouvin Pathen pachat alojoh ahi.