Read Thado Chin Rome 3 Bible Online

Rome 3 - Thado Chin bible

Rome 3

¹Chuti ahile Juda mi hi ipi phachomam? Chule cheptan jong iham aphatna?

²Imalam jouse-a phachom tah ahi, abulpen chu, Pathen thu chengse amaho kipedoh-a kichinsah anahi.

³Khat touvin tahsan hih jongleu i-hiding ham? Amaho tahsan lou chun Pathen tahsan umje hi manlou asochom em?

⁴ Chuti hihhen; Pathen chu dihtah hihen lang, mi jouse chu ajou hihen; hiche thudol hi, Nangma, nangma thuseija chonpha tia nakisima, Thupitan na-a jong najo theinan, tin akisunin ahi.

⁵Ahivangin ichonphat lounao hin Pathen chonphatna chu akichetsah cheh-a ahile, ipi isei dingu ham? Lunghanga talen peji-a Pathen dihlou ham? (Mihem dan banga kasei ahi).

⁶Chuti ahipoi, chuti ahile Pathen'in vannoi leiset thupi iti atan dingham?

⁷Keima jousei jeh-a Pathen dihje chu ama loupina khopma letset tah-a akihaphon cheh-a ahile, michonse tia themmo changa iti ka umnah lai dingham?

⁸Chule keiho neihehset uva, kimkhatnin kasei loubeh-u; phatna ahung umna dingin setna bolu hite, tin aseijuve, tia neingoh-u bangchun, eihonjong hiti chun seiju hite natijiu hilouham? Chutobang thusei ho themmo achanu chu dihtah ahi.

⁹Chuti ahile, keiho Juda mi hi midang sanga phajo kahiuvem? Iti nama jongle kaphajo pouve. Ajehchu Juda mi chule Greek mi abona chonset noija um cheh ahi, tia kahilchah sa cheh-u ahitai.

¹⁰ Hiti jong hin akisune, Chonpha koima aumpoi, khatcha jong aumpoi.

¹¹Koima ahetoh thema aumpoi, Koima Pathen hola aumpoi,

¹²Lam hilouva akihei sohkei taovin, abon chaovin manlou asohgam taove. Apha lama chona aumpoi, khatcha jong aumpoi.

¹³ Alol homu lhan kihong ahin; Aleijun lheplhahna thu jeng aseijun, Anel noijuvah gulse gu aumin;

¹⁴ Akam sungula sapsetna le thugilouvin adimin;

¹⁵ Akengu thisona ding lamah ajangin;

¹⁶Alampi jouseu-ah man naleh hesohna aumin;

¹⁷Lungmonna lampi aheta pouve;

¹⁸ Amitmuvah Pathen gin aumpoi.

¹⁹Mi jouse kam binna dingle vannoi leiset pumpi Pathen thutana-a aum theina dinguva, danthun asei chengse hi danthu thua nungho jah-a kisei ahi, ti iheuve.

²⁰ Danthu juija thilbola mi koima a-angsunga them changa umlou ding ahi, ajehchu danthua kona chonsetna kihedoh ahi.

²¹Ahin tu vangin danthua hilouhelin, danthule themgaoho thuhetsah Pathen chonphatna chu akilang dohtan ahi.

²² Chuche Pathen'a kon chonphatna chu Jesu Khrista tahsan vanga mijousele atahsante jouse chunga kilanga ahi: koima imachom aumpoi:

²³Ajeh chu mi jouse hi chonsea ahitan, Pathen loupina chu changlela ahiuve;

²⁴Khrista Jesu'a kilhatdohna aum jeh-a, Pathen lungset vanga chonphat moh chonbou ahiuve.

²⁵Pathen'in alungdesot vanga masanga chonsetna kichaisaho talen pelouva aum jeh-in, achonphat vetsahna dinga tahsan vanga athisan chu kithoidamna hidinga apehdoh ahin;

²⁶Ama chonpha ahina dingle, Jesu tahsan chan chu chonpha-a asim theina dinga, tulaija hi achonphatna avetsah ahi.

²⁷Chuti ahile kisonna hoithona hoibaham? Kinotdoh-a ahitai. Itobang danthua ham? Danthu juija natoh naham? Ahipoi, tahsanna danthu-a joh ahibouve.

²⁸Chuti ahi jeh chun danthu juija natoh vang hilouva, tahsan vanga mi chonpha kisim ahi, tia kangaitou ahi.

²⁹Pathen chu Juda mite changseh Pathen ham? Chidang namdangte Pathen jong hilou ham? Chidang namdang te-a jong ahi.

³⁰ Ahin Pathen khatseh ahi jeh chun, cheptanho chu tahsana kona chonpha asima, chule cheptan louho chu tahsan vanga chonpha asim ding ahi.

³¹Chuti ahile itahsan jeh uva hi danthu kisumanga ham? Ahipoi; danthu kiphudetjoh ahibouve.