Read Thado Chin Rome 4 Bible Online

Rome 4 - Thado Chin bible

Rome 4

¹Chuti ahile tahsa lama ipuluiju Abraham'in amu chu ipi isei dingu ham?

²Ajeh iham itile ama chu natoh vanga chonpha kisim ahile kisonna anei ahi, ahinla Pathen lamah aneipon ahi.

³ Ajeh chu Pathen lekhabun ipi aseijem? Abraham'in Pathen atahsan jal-in atahsan chu ama dingin chonphatnin akisimtai.

⁴Natongte sum san hi lungsetman kiti louvin, asan ding abatnin akiseijon ahi.

⁵Ahinla Pathen helou natoh beija chonpha chansahpa tahsana chu, atahsan chu chonphatna kisima ahi.

⁶Natong louva Pathen'in michon pha-a asimho chu phatthei achan dingjeu chu, David'in jong aseijin,

⁷ Asuhkhelnau kingaidama, Chule achonsetna kikhu khumho chu anun nomui.

⁸Pakaiyin achonsetna asimlou dingpa chu anun nome, ati.

⁹Chuti ahile chuche phattheina chu cheptante chung jenga ham, cheptan louho chunga jongham? Ajeh chu eihon Abraham atahsan chu ama dinga chonphatna-a kisim ahitai, itiu ahi.

¹⁰Achutile iti aum petna chonpha kisim ham? Acheptan jouha, cheptan louva aum laija ham? Cheptana aum jou hilouvin, cheptan louva aum lai ahi:

¹¹ Chule cheptan louva uma atahsanho jouse pa ahi theina dingle, amaho dinga chu chonphatna-a akisim theina dinga, chule cheptan jeng jong hilouva ipuluiju Abraham cheptan louva aum laija atahsan chu,

¹²Hiche tahsan nungjuija cheptanho pa jong ahi theina dinga, cheptan louva uma tahsan vanga chonphat chu hetna-a melchih na-a cheptan chu amu ahi.

¹³ Ajeh chu Abraham le achilhah chu, vannoi goulo ding ahi tia thutep chu danthua kon hilouvin, tahsana kona chonphat vanga joh ahibouve.

¹⁴ Ajeh iham itile danthua kona chonpha kisimhon alouva ahile, tahsan chu ahomkeo ahitai, chule thutep jong chu pannabei ahitai.

¹⁵Ajeh chu danthun lunghan akonsah ahi; danthu beina-a chun suhkhel jong aumpoi.

¹⁶ Hijeh-a chu lungsetna-a ahi theina-a, danthu noija umho chang jeng hilouva Abraham tahsan noija um achilhahte jousen, hiche thutep alo dingu chu adet theina dinga, amahon alo dingu chu tahsan vanga alo dingu ahibouve.

¹⁷ Mithiho hinsah theija, aum louho auma banga kou Pathen, Abraham'in atahsan chu, ama angsunga Abraham chu ibon chaova ikonnao ipuluiju ahi; chule hitin jong akisune, Keiman nangma vai tamtah kona puluija kasem ahitai, ati.

¹⁸ Chule kiholna neilou ahivangin, nachilhah hijatpi khu hi ding ahi tia, asei thucheng dungjuija, khonungle vai tamtah pului ahung hi ding chu kiholin atahsanin ahi.

¹⁹ Chule kum jakhat jen alhina, athisa tobang atahsa le Sarah chin jong chu ngaiton, atahsan daideh louhelin aumin,

²⁰Pathen thutep chu tahsan lellin aumpon ahi.

²¹Pathen'in athutep chu bol jong bol thei ahi ti ahechenin, Pathen avahchoijin atahsan ahat chehjotan ahi.

²²Hiche jeh-a chu atahsan chu ama dinga chonphatna kisima ahitai.

²³Tahsan chu ama ding jenga chonphatna-a kisima kisun ahipoi; eiho dinga jong kisun ahi.

²⁴Pakai Jesu Khrista athia kona kaithoupa tahsana eiho, eiho dinga jong chonphatna-a kisim ding ahi.

²⁵ Hiche Jesu chu eiho suhkhel jeh-a kipedoh ahitai; chule eiho chonpha ikisimna dinguva kaithouva uma ahitai.