Read Thado Chin Rome 5 Bible Online

Rome 5 - Thado Chin bible

Rome 5

¹Chuti ahin tahsan vanga eiho chonpha kisim ihitah jeh-un, I-Pakaiyu Jesu Christa vanga Pathen toh kichamdela um ihitaove.

²Chujongle ama vanga chu hiche lungsetna idin detnaova hi tahsan vanga lut ihitaove, chule Pathen loupina-a chu kinema kipah jinga um ihitaove.

³Chule chuti jengseh hilouvin, hesohna chun thohhat asosahji ihetbangun, ihesoh gentheinao jenga jong iloupi jiuve;

⁴Thohhat chun aphat photchena asosahjin, photchena chun kinepna asosahjin ahi, ti iheuve.

⁵Chule hiche kinepna chun eijumso pouve, ajeh chu eipeh-u Lhagao Theng vanga chu ilung sunguva Pathen ngailutna long lut ahitai.

⁶Ihatmo laijuvin aphatchan michonseho khelin anathitan ahi.

⁷Michonpha chung changah koima pouvin ahinna tohponte; mipha chungchanga ahinna toh ngam jong mi khattou umkhat nante.

⁸Ahin Pathen'in eingailutnau photchena eimusah-un ahi; ajeh iham itile eiho chonsetna i-um laitah-un Christa eiho khelin athitan ahi.

⁹Chuti ahi jeh chun eiho tun, Christa thisan vanga chonpha kisim ihitah jeh-u chun, achungchona ama vanga Pathen lunghan na-a kona huhhing-a umtei ding ihiuve.

¹⁰Ajeh chu adouva ipan laitah uva Pathen Chapa thi chun Pathen toh eisuhchamu ahitah-a ahile, akicham jeh-a chu achungchona ama hinna vanga huhhing-a umtei ding ihiuve.

¹¹Chuti jeng jong hilouvin, tun Pathen toh eisuhcham uva, I-Pakaiyu Jesu Christa vanga Pathen'a pa jong ikipao ahi.

¹² Hiti chu ahin, mi khat jeh-a vannoi'a chonset lut, chule chonset jeh-a thina lut ahi; chutima chu mi jouse chonset jeh-a thina chu mi jouse chunga lhungsoh ahitai.

¹³Ajeh chu danthu kipeh masang peh-a chu vannoi leisetna chonset anaumsa ahin; ahivangin danthu um louna-a chu chonset jong kisim lou ahi.

¹⁴Ahivangin Adam'a pat Mosi geijin Adam suhkhel banga sukhel louho chunga jong, thina chun vai analosa ahi. Adam chu ahung dingpa lim banga um ahi.

¹⁵Ahivangin manbeija thilpeh chu suhkhela toh kibang ahipoi; ajeh chu mi khat suhkhel jeh-a midang jouse athia ahile, achungchon cheh-a Pathen lungset le mi khat, Jesu Christa lungset vanga thilpeh chu mi tamtah chunga letsetna chua ahitai.

¹⁶Chule thilpeh chu, achonsea mi khat jeh-a chutoh akibangpoi; ajeh chu mi khatna kona chu themmo channa lama thu kitan ahin, manbeija thilpeh vang chu suhkhelna tamtah-a kona them changa kisima ahi.

¹⁷Ajeh chu mi khat suhkhel jeh-a, mi khat vanga chu thina-in vai alotah-a ahile, lungsetna le chonphat thilpeh letset changho chu achungchon cheh-a, mi khat, Jesu Christa vanga hinna-a vai alo dingu ahi.

¹⁸Chutichu ahin suhkhelna khat jeh-a mi jouse themmo chansahna thutana um ahi; chutima chu chonphatna thilbol khat vanga hinna lama them chansahna manbeija thilpeh chu mi jouse chunga hung uma ahitai.

¹⁹Ajeh chu mikhatnin thupeh apallhah jeh-a mi tamtah chonse kisosah ahitan; chutima chu mikhatnin thupeh anit jeh-a chu mi tamtah chonpha kiso ding ahi.

²⁰Amavang suhkhel punna dinga danthu hung lutbe ahi. Ahinla chonset punna chana chu lungsetna hapun cheh-a ahi.

²¹Chutia chu chonsetnin thina-a vai alo bangtah-a chu, I-Pakaiyu Jesu Christa vanga tonsot hinkemlou geija dinga chonphat vanga lungsetna-in vai alo theina ding ahi.