Read Thado Chin Rome 6 Bible Online

Rome 6 - Thado Chin bible

Rome 6

¹Achutile ipi isei dingu hitam? Lungsetna apun chehna dinga ichonset jing dingu ham?

²Chutiponte! chonset lama athisa eiho, chonsetna iti ihin jing nahlai dingu ham?

³Eiho Christa Jesu'a baptize chang chengse hi athina-a baptize changa ihiu hi nahet lou uham?

⁴ Hiche jeh-a chu Pa loupina vanga Christa athi lah-a kona akaithou banga chu, eiho jong hinkho thah lam chu ijot theina dinguva, baptize chana hi athina-a amatoh kivuitha-a ihi taovin ahi.

⁵Ajeh chu ama thi lim banga ithiuva amatoh thikhom ihiule, atho kit lim banga jong itho kit dingu ahi;

⁶Tu nung kalsea eiho chonset soh-a i-um louna dinguva, chonset po tahsapum suhmanga aum theina dinga, imi luiju chu amatoh thingpel'a kikhetbeh tha-a ahitai, ti chu iheuve;

⁷Ijeh ham itile athia chu chonsetna kona ongthola ahitai.

⁸Chule eiho Christa toh ithiu ahitah-a ahile, amatoh ihin dingu jong ahi, ti chu itahsan un ahi;

⁹Ajeh chu athi lah-a kona kikaithou Christa chu imatihchanna thi lou ding ahi, thina-in achungah thu aneitapoi, ti iheuve.

¹⁰Athi chu chonset lama tonsot geija dinga khatvei thia ahitai; ahin vang chu Pathen lama hinga ahi.

¹¹Hiche bang chun nangho jong chonsetna lamah athisan kigel unlang, I-Pakaiyu Jesu Christa jal-in Pathen lamah ahingin kigelun.

¹²Hijeh chun natahsa lung got lama chonna dingin, natahsa thithei chunga chun chonset vaipohsah hihhelun.

¹³Chujongle natibah chengseu chonphat louna manchah-in chonsetna lamah pedoh hihhelun, ahin athi lah-a kona hingdoh kahi tin, Pathen'ah kipeuvin, natibah chengseu jong chu chonphatna manchah din Pathen'ah pedoh jovin.

¹⁴Ajeh chu chonset chun nachung uva thu neitalou ding ahi, ijeh ham itile danthu noija um nahitapouvin, lungsetna noija umjoh nahiuve.

¹⁵Iti tantem ahile? Danthu noija um louva lungsetna noija um ihi jeh uva chu, ichonset dinguham? Chutiponte.

¹⁶Koi heng koi heng hijongle athua nung dinga asoh-a nalutna chu; thina dinga chonsetna lam hijongle, chonphatna dinga thua nunna hijongle, athua naumpa soh chu nahi, hichu nahet louvu ham?

¹⁷Masangin nangho chonset soh nanahiu ahin, ahivangin lunggiltah-a chutobang thu kihil chu nit dinga kipedoh-a athu noija um nahitaovin,

¹⁸Chule chonsetna kona kichoidoh-a chonphat soh nahiu ahitan, hiche jeh chun Pathen thangvah-in umhen.

¹⁹Natahsa pheu hatmo jeh-a keiman mihem thu banga kasei ahi; ajeh chu nanghon masang laija natibah chengu then louna dinga chonset chunga chonsetna lama soh banga napehdoh jiu ahin, hiche bangtah chun tun natibah chengseu chu thenna dingin chonphatna lamah soh bangin pedoh jengun.

²⁰Nangho chonset soh nahi laijun chonphatna lam dola onga nahiuvin ahi.

²¹Chutichu ahin tu-a najachat piu thulam dola hi hiche laija chu aga ipi namuji uvem? Ajeh chu hitiho chu achaina thina ahibouve.

²²Tu vangin nangho chonsetna kona onga Pathen soh nahitah jeh-un, thenna lamah ga naneitaove, chule aleh chu tonsot hin kemlou ahi.

²³Ijeh ham itile chonset man thina ahi, Pathen thil mohpeh vanghi Pakai Christa Jesu vanga tonsot hinna ahi.