Read Thado Chin Rome 7 Bible Online

Rome 7 - Thado Chin bible

Rome 7

¹Ole sopite, mihem ahinlai chansebovin danthun achungah thu aneije, ti nahet louvu ham? Danthu themho kahouna ahi.

²Numei jineija chu a-inneipu ahinlai chansea danthun a-inneipu toh akanbeh jing ahin, ajipa athi vangle, a-inneipu danthua kona chu ongdoh jia ahi.

³Chuti ahi jeh chun a-inneipu hinpetnin midang ji hitahen hile, chutengle amanu chu ajonga kiti ding ahi. A-inneipu thi teng vangle, danthua kona onga ahitan, pasal dang ji hijongle ajonga hita lou ahi.

⁴Nangho chungchang thua jong chutima chu ahi, sopite, Pathen lama iga theina dingule achom khat, athi lah-a kona thoudohpa-a nahi theina dinguva, Christa tahsa vanga danthu lama thisah-a um nahitaove.

⁵Ajeh chu tahsaphe-a i-um laiseu chun danthua kona chonsetna lama chalohna chun thina lama iga theina dinguva, itibah chunguva na anatohji ahi.

⁶Ahin tu vangin lekhajem luija hilouva, lhagao thah-a ijen theina dinguva ithiuva, eikituhnao danthua kona kilhadoh ihiuve.

⁷ Achutile ipi isei dinguham? Danthu hi chonsetna ham? Ahipoi; chonset chu ipi ahi anahe lou kahi, danthua kona kahetdoh ahibouve; ajeh chu, Papset bol hih-in, ti hi danthun asei lou hile, ipi ahi kanahet lou ding ahi.

⁸Ahinla chonset chun agomkomcha atohkhan, chuche thupeh-a kon chun kalunga papset imajouse asosahtan ahi; ajeh chu danthu beija chonset chu athi ahi.

⁹Masanglai chun danthu um louva anahing jing kahin, chuche thupeh ahung um phat chun chonset chu ahingdoh kitnin keima kathitai.

¹⁰Chule hinna dinga thupeh chu thinajoh-in kananeitan ahi;

¹¹ Ijeh ham itile chonset chun agomkomcha atokhahjia, thupeh-a chu eilheplhah-a, hiche chun eitha ahi.

¹²Chutichu ahin danthu athenge, thupeh jong athenge, adih lheh jengin aphai;

¹³Ahile apha chu keima dinga thina mongham? Ahipoi. Apha chu amanchah-a chonset chun kachunga thina asodoh-a kona chu, hichu chonset ahi tia akiphon dohna dinga chule thupeh vanga chonset chu setna chungnung tah ahi chu, akichetna dinga chonset jeh joh-a ahibouve.

¹⁴Ajeh chu danthu chu lhagao lam thil ahi ti iheuve, keima vang tahsa lam mi chonset soh-a kijoh-a kahi.

¹⁵ Ajeh chu keiman ipi kaboldoh kahepoi, ajeh iham itile kalunggot lou lam jeng kaboljin; kahot lam jengbou kabol jin ahi.

¹⁶Kalunggot lou lam kabola ahile, danthu chu apha ahi tia oija kahi.

¹⁷Ahivangin tun abola keima hita louva keija cheng chonset chun abol ahitabouve.

¹⁸Ajeh chu keima sunga kasa chunga hin phat achengpoi, ti kahei, ajeh chu lunggotna vang chu aumin thilpha boldoh najohbou umlou ahi.

¹⁹Ajeh iham itile apha kalunggot lam chu kaboljipon, aphalou kalunggot lou lambou chun kachon jingjitan ahi.

²⁰Kalunggot lou lam kabolji ahile, abola chu keima hilouva keija um chonsetjoh chu ahibouve.

²¹Chutichun thilpha bol kagot komle, setna chu kakoma ahung umjin, hiche umdanje hi kahetan ahi.

²²Kami sungnungin Pathen danthua kathanom lhehji nan,

²³Ahivangin kalung lam danthu douva katibah chunga um, chonset danthu, soh-a eipui lutji-a katibah chunga hin danthu chom khat aum kamujin ahi.

²⁴Ohe! mi gentheitah chu kanahi! Hiche thina tahsa-a kon hin koijin eihuhdoh tantem?

²⁵I-Pakaiyu Jesu Christa vangin Pathen kathangvah-e. Chutichu ahi jeh-a keiman kalungtah-a Pathen danthu noija kauma, kasa-a chonset danthu soh na katoh ahi.