Read Thado Chin Rome 9 Bible Online

Rome 9 - Thado Chin bible

Rome 9

¹Keiman Christa-a thutahbeh kasei ahi, kajoupoi;

²Kalunga lunghesohna nasatahle thohlel tang louhela aum hi, ase apha kahetna kalungin Lhagao Thengah eihettohpin ahi.

³Ajeh chu keimatah-in tahsa lama kanam mite, kasopite khela Christa-a kona manna lama dinga sedoh-a uma, sapset lhunna-a umhel jeng ding kanagot ahi.

⁴ Israelte ahiuvin; cha hina chu amauva ahin, loupina, thulhun jouse, danthu peh, Pathen houna, chule thutep jouse la amaho-a ahin;

⁵Pute pate jong amaho-a bou ahin, tahsaphe lama Christa jongla amaho lah-a kon ahibouvin, ama chu imajouse chunga chungnung pen Pathen ahin, akhang akhanga pachat tohtah ahi. Amen.

⁶Ahivangin Pathen thu chu imacha hilouva um ahipoi. Ajeh chu Israel lah-a kon jouse Israel ahipoi.

⁷ Chule Abraham chilhah ahisohkei vangun aboncha keijun achate ahipouve; Isaac'a kona bou nachilhah tia kisei ding ahi, tia asei ahi.

⁸Hichu hiti hi ahi, tahsa-a chate chu Pathen chate ahipoi; thutep chatebou chu chilhah tia kisim ahi.

⁹ Thutep chu hiche hi ahi, Hiti phattah hile kahung ding ahin, chutengle Sara'in chapa khat ahin ding ahi.

¹⁰ Chucheng jeng ahipoi, ahin Rebecca jong chu mi khatna kona, ipuluiju Isaac'a kona agai laijin,

¹¹Achateni so masangin chule apha ase imacha abol masangin, toh vanga hilouva akoupa lunglam le Pathen'in alhen dungjuija, lunggotsa chu adetna dinga,

¹²Amanu jah-a, A-upajo chun anaopa soh na atoh ding ahi, tia kiseija anahi.

¹³ Hiche thudola hin, Keiman Jacob kana ngailun, Esau vang kanahot ahi, tin akisune.

¹⁴Achutile ipi isei dingu ham? Pathen'ah chonphat louna aume iti dingu ham? Ahipoi.

¹⁵ Aman Mosi jah-a, Keiman kalungsetpa chu lungset ningting, kahepipa chu kahepi ding ahi, ati.

¹⁶Chuti ahi jeh chun hiche hi alunga tuppa vang jong hilouva, adelpa vang jong hilouva, alungsetpa Pathen vanga konjoh ahibouve.

¹⁷ Pathen lekhabu thun Pharaoh jah-a, Nachunga kathilbol theina kavetsah theina dingle, vannoi leisetna kamin kiphon jalna ding monga nangma katundoh nahi, ati.

¹⁸Chutichu ahin Pathen'in ahepi nomchan ahepijia, alunggot chan chu alung asuhtahji ahi.

¹⁹Hichea hin nangman kei jah-a, Achutile ibola eithem mosah jiham, neitin nate. Ajeh chu alunggot chu koiham akham theija?

²⁰ Ahipoi, vo mihem, Pathen douna-a donbut nang koi nahim? Thilsem chun asempa jah-a, Ibola hitia neisem ham, tintem?

²¹Bellei lhang khatna bel khat lutah-a dena, khat lulouva den ding, abel lei chunga chu beldengpan thu anei hilouham?

²²Ahin, Pathen'in alungsat vetsahnale athil bolthei hetsahna ding lung ngaito-a, mangthah dinga gotsa um lungsatna belho chunga alung adesotle;

²³Chule loupi nikho-a dinga masanga patna agotsa, ahepi belho chunga aloupina hao chu hetsah dinga,

²⁴Aman eiho jengjong, Juda lah-a kon jengseh hilouva, chidang namdangte lah-a kon jonga eikouvu hilouham?

²⁵ Chutobang chun Hosea lekhabua, Kamite hikhalouho chu keiman kamite kati ding, kadeilounu chu kadeinu kati ding ahi.

²⁶ Nangho keima mite nahipouve tia ajah uva kiseina laitah-a chu, Amaho Pathen hing chate kiti ding ahiuve, tia kisei bang chu ahi.

²⁷ Israelte thudol Isaiah'in asamlen, Israel chate twikhanglen kama neldi jatnin tam jongleu, amoh thembou sohcha ding ahi.

²⁸Ajehchu aman natoh chu achaija chule chonphatna-a phat asuh chom ding ahi; ajehchu Pakaiyin leisetna hi chomcha khat bou na atoh ding ahi.

²⁹ Hiche thudol hi Isaiah'in masangin aseije, Janel Pakaiyin chikhai ding einakhen louvu hile, Sodom dung isun diu ahin, Gomorrah toh ibah dingu ahi, ati.

³⁰Achutile ipi isei dingu ham? Chonphatna del louhel chidang namdang ten chonphatna chu aphah-u ahitai; hichu tahsan vanga chonphatna ahi.

³¹Ahin Chonphatna danthu dela Israel ten, hiche chonphatna dan chu aphajou pouve.

³²Ijeh ham? amahon tahsana hollouva, dan thilbolla ahol jeh-u ahi. Kipal lhuhna songa kipal lhu-a ahitaove.

³³Hiche thudol jong hi akisune, Veuvin, keiman Sion'ah kipalna song le lung lhahna songpi kakoije; koihile ama tahsan chan chu jachatna-a chulou ding ahi.