Read Thado Chin 1 Corinth 1 Bible Online

1 Corinth 1 - Thado Chin bible

1 Corinth 1

¹Pathen phasah-a Christa solchah dinga kikou Paul leh sopi Sosthenes,

² Corinth-a um Pathen houbung, Christa Jesu'a kisuthenga, mitheng dinga kikoute henga, gamtina I-Pakaiyu (amahole eiho Pakai) Jesu Christa min pan chengsetoh;

³I-Pau Pathen le Jesu Christa-a konin lungsetna leh lungmon naheng uvah umhen.

⁴Christa Jesu'a Pathen lungset nangho henga kipeh jeh chun nangho chungchang thuah Pathen kathangvah jinge.

⁵Ijakai-ah, thuseina tincheng leh, hetna tichenga aman nahaosah-u ahitai.

⁶Nangho lah-a Christa thu kahettohsah chu kiphut det ahitai.

⁷Chutia chu nangho thilpeh lhasam louhela, I-Pakaiyu Jesu Christa hung kit ngah-a umjing nahiuve.

⁸Chule aman nangho akhon ni geija nakoidet jing dingu, chutengle nangho I-Pakaiyu Jesu Christa nikho ni chuleh themona beihela naum dingu ahi.

⁹Pathen tahsan umtah ahi, aman Achapa I-Pakaiyu Jesu Christa kithopi dinga nakoulut-u ahitai.

¹⁰Tun sopite, nangho thukhat kisaovin, nalah uva kikhen telna umlouvin, lungkhat le lung ngaito khat na lolhing tah-in kipunkhom mun, tia I-Pakaiyu Jesu Christa mina katem nahiuve,

¹¹Ijeh-inem itile, kasopite ho, nachung chang thu-u nalah uva kinel noh baotam aume, ti Chloe te inko seinan kajai.

¹² Tu-a kasei chu hiche ahi, nangho amilipmin, Keima Paul'a kahi, keima Apollo'a kahi, keima Cephas'a kahi, keima Christa'a kahi, nati sohkeijun ahi.

¹³Christa chu nahop khen khenu hitam? Paul chu nangho dinga thingpel'a kikhenbeh mongam? Ole Paul mina baptize nachan mongum?

¹⁴ Crispus leh Gaius tailou, adang koimacha baptize kachansah lou jeh chun Pathen kathangvah-e;

¹⁵Achuti loule keiman keima mina baptize kachan ahi, tia sei umkha ding ahi.

¹⁶ Chule keiman Stephanas insung mite chu baptize kachansah ahin, chuche tailou chu adang koima baptize kachansah kahepoi.

¹⁷Baptize chansah dinga hilouva, Kipana Thupha hille dinga bou Christan eisol ahi; chihna thua seiding hilouvin, achuti loule Christa thingpel chu imacha hilou sohkha ding ahi.

¹⁸Thingpel thu chu amangthai dingho dingin ngolna ahi; asohcha eiho ding vangin Pathen thahat ahi.

¹⁹ Hiti jong hin akisune, Keiman michingho chih chu kasuhmanga, Lungthim themho lungthim moh kahisah ding ahi.

²⁰ Miching hoiham? Lekha sun mihil hoiham? Tukhanga minel kala hoibaham? Vannoi leiset chihna chu Pathen'in asuh ngol hilouham?

²¹Ajehchu Pathen chihna-in, leiset mihem ten amaho chihna-a Pathen ahetlou phatnuva, ngolhoi thu hila atahsanho huhhing chu Pathen'in pha asah ahi.

²²Juda ten melchihna angeh jiuvin, chule Greek miten chihna aholjiuve;

²³Keihon vang thingpel chunga Christa kikhetbeh thu kahilleu ahin, hichu Juda te dingin kipal lhuhna ahin, chule Greek te dingin ngolna ahi;

²⁴Amavang Juda hihen Greek hileh, akikouho ding vangin Christa chu Pathen hatna le Pathen chihna ahi.

²⁵Ijeh-inem itile Pathen ngolna chu mihem sanga gamchenga chingjo ahin, chule Pathen hatmona chu mihem sanga gamchenga hatjo ahi.

²⁶Ijeh-inem itile, sopite, nanghon nakikou dolu hi ngaito temun, leiset tahsa phe lama miching tamtah, thanei tamtah, chule milun tamtah akikou pon ahi.

²⁷Ahivangin Pathen'in michingho jachat sahna dinga, vannoi'a angolteho alhena; ahat apaoho jachat sahna dinga, vannoi'a hatmoteho alhen ahi.

²⁸Vannoi leisetna thil kidah um le thil noinung cheng chu Pathen'in alhena, chule aumlou jong chu aumsaho imacha hilou sona dinga alhen ahi;

²⁹Hichu ama angsunga leiset mihem akisonga koima aum louhelna ding ahi.

³⁰Nangho vang chu ama vanga Christa Jesu'a um nahiuve, amachu Pathen'a kona eiho dinga chihna, chonphatna, kithensona, kilhatdohna-a kisem ahi.

³¹ A kisun dung juijin, Koi hile akisonga chu Pakaiya kisonghen, ati.